Habakuka
2 Tha tro kö ni a trotrij la göhnë ne thup,
Tro ni a cile ngöne la ihag atraqatr.
Tro ni a treqene matre wang la hnei nyidrë hna troa qaja jëne eni
Memine la nyine tro ni a sa ngöne la kola haji ni.
2 Ame hnei Iehova hna sa koi ni me hape:
“Cinyanyine jë la hna meköle goeën, nge sija hnyawane ju hune la itre sine etë,
Matre hmaloi* troa e catrën.
3 Ke hetre ijine kö troa eatr la hna meköle goeën,
Ngo eje ha nyenyape kowe la ijine troa eatrën,* nge tha tro kö ej a thoi.
Ngacama ej a hmitr,* ngo lapa treqene ju kö!*
Ke tro kö ej a eatr.
Tha tro kö ej a hmitr!
4 Goeëne jë la ka pi tru;
Tha ka meköti kö angeic.
Ngo tro la ka meköt a mel hnene la aqane mele nyipici* i angeic.
5 Eje hi, pine laka ka iaö la waina,
Tha tro kö la atr ka pi tru a eatrën la mekuna i angeic.
Angeic a kuca matre tro la trenge pi xen i angeic a tune la Hua;*
Tune la mec, tha ka hane meji kö angeic.
Angeic pala hi a acasine la itre nöj asë
Me xawan thatraqai angeic la nöjei nöj.
6 Ngo hapeu, tha tro kö angatre la a hnyimasai* angeic, me ijelë, me sili ijelaxötra göi angeic?
Tro angatr a hape:
‘Ekölöhini la atre xawane la ifekë ewekën
Nge ka nyixane pala hi la gufa i angeic!
Uti hë eu?
7 Hapeu, tha tro jë kö a aca tro cile koi ö hnene la itre hnei ö hna gufa kow?
Tro angatr a mejë me jumejum catrë ö,
Nge tro hë eö a ceitu me ketre ewekë nyine thapa koi angatr.
8 Tro asë hi la itre atren la itre nöj ka mele pe a thapa la itre ewekë i ö,
Ke hnei ö hna atrekënö la itre nöj ka nyimutre,
Ke hnei eö hna anenine la madra ne la itre atr
Me akötrëne la nöj,
Ene la itre traon me itre atren.
9 Ekölöhini la atre huliwa qenatrekënö matre thupën la fami* i angeic,
Matre atë la trengene waco i angeic ngöne la gaa draië,
Me kötrene la ime ne la akötr!
10 Hnene la itre huliwa i ö hna ahmahmane la fami* i ö.
Eö kö a sipu ngazo koi ö, la eö a humuthe la itre nöj ka nyimutre.
11 Tro la ketre etë ne la ngöne uma a sue,
Nge troa sa hnene la ketre agö ne la hune uma.
12 Ekölöhini la atre xupi traon jën la hna aneni madra,
Memine la atre acili traon hna eköhagen jën la huliwa ka tha meköti kö!
13 Goeën! Maine troa kucakuca la itre nöj pine la ewekë nyine dreuthetrij
Nge tro la itre nöj a huliwa meci menu,
Ke hapeu, tha aja i Iehova kö lai, lo joxu ne la itre trongene isi e hnengödrai?
14 Ke tro ha haöthe la ihnadro hnei atr ka atrehmekune la lolo i Iehova
Tune la itre tim a hakuthe la trepene hnagejë.
15 Ekölöhini la atre tra imene la itre sinee i angeic,
Me nyixan hnei wesitr me elëhni, matre hmo jë angatr,
Nge matre goeën jë angeic la ka hmitrötre i angatr!
16 Tro hmaca kö a tru catr la hmahma i ö hune la elolo i ö.
Iji jë pena eö, nge amamane jë la hna tha xötrehatrenyi* ö.
Tro fe a hane traqa koi ö la ver ka ej ngöne la ime maca i Iehova,
Nge tro ha thahe la lolo i ö hnei hmahma;
17 Tro ha heetrë eö hnene la iakötrë hna kuca koi Lebanona,
Nge tro ha traqa koi ö la ngazo ka axouene la itre öni,
Ke hnei ö hna anenine la madra ne la itre atr
Me akötrëne la nöj,
Ene la itre traon me itre atren.
18 Nyine u la hnasaatr e ase hë tratraun ej
Hnene la atre tratraun?
Nyine u la idrola hna ahmun* ka hamë ini ka thoi,
Ngacama kola mejiune kow hnene la atre xup ej?
Angeic a kuca la itre haze ka pë alien nge ka hum.
19 Ekölöhini la atre qaja kowe la sine sinöe ka hape, “Hlë jë!”
Maine kowe la etë ka hum ka hape, “Cile jë nge ini huni jë!”
Goeën! Hna pelethi angatr hnei gool me sileva,
Ngo patre kö la mano ne mel thei angatr.
20 Ngo Iehova e hnine la uma ne hmi i nyidrë ka hmitrötr.
Loi e tro la ihnadro asë a lapa thaup qëmekei nyidrë!’”