Zakaria
2 Hnenge hna gala draië me öhne la ketre trahmany ka ea la eno nyine tulu. 2 Öninge jë hi: “Eö a tro ië?”
Öni angeic: “Eni a tro troa tuluthe Ierusalema, matre wang la eisaisan me eqean ej.”
3 E cili, hnene la angela ka ithanata me eni hna tro, me itronyi pena memine la ketre angela. 4 Önine lai angela koi angeic: “Nyape pi troa qaja kowe lai nekö trahmany ka hape: ‘“Tro ha lapan e Ierusalema tune la itre neköi traon ka pë ihagen, ke tro ha tiqa hnei atr me itre öni. 5 Tro hë ni a tune la ketre ihag eë xötreithi angeic, me atiqanyi angeic hnene la elolong,” öni Iehova.’”
6 “Jë fe! Jë fe! Kötrene pi la nöje kolopi,” öni Iehova.
“Ke hnenge hna aije epun ngöne la 4 lao götran ne la fen,*” öni Iehova.
7 “Trohemi, Ziona! Kötre pi, eö ka lapa thene la jajinyi ne Babulona! 8 Ke hane hi la hna qaja hnei Iehova joxu ne la itre trongene isi e hnengödrai, laka thupene la hna atrunyi nyidrë, hnei nyidrëti hna upi ni kowe la itre nöj ka atrekënö epun: ‘Ame la ka ketri epun, ke ka ketr la wene dremune alamekeng. 9 Ke enehila, tro ni a xejë la imeng matre axouenyi angatr, nge tro hë angatr a tune la itre ewekë hna thapa thatraqane la itre hlue i angatr.’ Nge e cili, tro hë epuni a atre laka, Iehova joxu ne la itre trongene isi e hnengödrai la ka upi ni.
10 “Sue madrine jë, jajinyi ne Ziona! Ke eni a traqa, nge tro ni a lapa nyipi ö,” öni Iehova. 11 “Ngöne la drai cili, tro la itre nöj ka nyimutre a traqa koi Iehova, nge tro angatr a nöjeng. Nge tro ni a lapa nyipi ö.” Nge e cili, tro hë epuni a atre laka, Iehova joxu ne la itre trongene isi e hnengödrai la ka upi ni koi epun. 12 Tro Iehova a xomi Iudra matre ewekë i nyidrë ngöne la hnadro ka hmitrötr, nge tro hmaca nyidrëti a ië Ierusalema. 13 Epi tro la nöjei atr a lapa thaup qëmekei Iehova! Ke nyidrëti a tro qa ngöne la hnalapa i nyidrë ka hmitrötr, me nyiqane huliwa.