Zakaria
6 Ase jë hi lai, hnenge hmaca hna gala draië me öhne la 4 lao ikariota ka fetra e nyipine la lue wetr. Hna kuca hnei kopa la lue wetre cili. 2 Hna hule la pane ikariota hnei itre hos ka madra, nge hna hule la hnaaluen hnei itre hos ka wetrewetr. 3 Ame la hnaakönine ikariota, ke hna hule hnei itre hos ka wië, nge ame la hna 4, ke hna hule hnei itre hos hna thathahan.
4 Öninge kowe la angela ka ithanata me eni: “Joxung, nemene la itre ikariota cili?”
5 Önine la angela: “Kolo hi lo 4 lao u ne hnengödrai ka tro, thupene la hna pane cil qëmekene la Joxu ne la fene hnengödrai. 6 Ame la ikariota hna hule hnei itre hos ka wetrewetr, ke ej a tro kowe la nöje kolopi. Ame la itre hos ka wië, itre ej a sasaithe la hnagejë.* Nge ame la itre hos hna thathahan, itre ej a tro kowe la nöje kolojë. 7 Nge tru la trenge aja ne la itre hos hna thathahan troa nyinyapëne la fen.” Öni nyidrëti jë hi: “Tro jë troa nyinyapëne la fen!” Ame hnene itre ej hna nyinyapëne la fen.
8 Thupene lai, hnei nyidrë hna hë ni me hape: “Goeën! Ame la itre ka tro kowe la nöje kolopi, ke hnei angatr hna amë la ua i Iehova ngöne la nöje kolopi.”
9 Hnei Iehova hmaca hna ithanata koi ni. Öni nyidrë: 10 “Xome jë la hna traqa fë hnei Heledaia, me Tobia, me Iedaia qaathene la itre hna kötre fë. Ngöne la drai cili, tro eö a ce tro memine la itre trahmanyi ka traqa qa Babulona, kowe la hnalapa i Iosea nekö i Zefania. 11 Tro eö a xome la sileva me gool, me kuca la ketre korona* me atë hune la he i Iosua nekö i Iehozadaka, atre huuj ka sisitria. 12 Thupene lai, tro hë eö a qaja koi angeic ka hape:
“‘Hane hi la hna qaja hnei Iehova joxu ne la itre trongene isi e hnengödrai: “Hane hi la trahmany hna hën ka hape, Ziin. Tro angeic a cia qa ngöne la götrane i angeic, me xupe la uma ne hmi i Iehova. 13 Angeice hi la ka troa xupe la uma ne hmi i Iehova, nge angeice hi la ka troa kapa la lolo. Tro angeic a lapa hune la therone i angeic me mus; tro fe angeic a atre huuj hune la therone i angeic. Nge tro ha tro loi* la lue hnëqa cili. 14 Nge tro la korona* a lapa e hnine la uma ne hmi i Iehova, matre tha tro kö a thëthëhmi Helem, me Tobia, me Iedaia, me Hen nekö i Zefania. 15 Nge tro ha traqa qa gaa nany la itre atr troa ixatua matre xup la uma ne hmi i Iehova.” Nge tro hë epuni e cili a atre laka, Iehova joxu ne la itre trongene isi e hnengödrai, la ka upi ni koi epun. Eje hi, tro ha eatrëne lai, e tro epuni a isin troa drenge la nine i Iehova Akötresi epun.’”