Zakaria
7 Nge ngöne la hna 4 ne macatre ne mus i Dariu, hnei Iehova hna ithanata koi Zakaria. Kolo drai 4 ne la hna 9 ne treu, lo treu Kiselu.* 2 Hnene la angetre Bethela hna upi Sarezera, me Regemelek me itre atre i angeic, troa xëwe* koi Iehova, 3 me hnying kowe la itre atre huuj ngöne la uma ne hmi i Iehova joxu ne la itre trongene isi e hnengödrai, me itre perofeta ka hape: “Tro kö ni a treij me tha xen ngöne la hna 5 ne treu, tune lo hnenge hna kuca ngöne lo itre xaa macatre?”
4 Hnei Iehova joxu ne la itre trongene isi e hnengödrai hna ithanata hmaca koi ni, me hape: 5 “Qaja jë kowe la itre atrene la nöj, me itre atre huuj ka hape: ‘Ame ngöne lo 70 lao macatre, lo epuni a tha xen me treij ngöne la hna 5 me hna 7 ne treu, ke hapeu, thatraqai ni kö lo? 6 Nge ame lo epuni a xeni me ij, ke tha thatraqai epuni kö lo? 7 Hapeu, tha hnëqa i epuni kö lo troa drengethenge la hna qaja hnei Iehova jëne lo itre perofeta, lo kola mele tingeting e Ierusalema, me ngöne la itre traon ezin, me ngöne la Negeb me Sefela?’”
8 Hnei Iehova hmaca hna ithanata koi Zakaria. Öni nyidrë: 9 “Hane hi la hna qaja hnei Iehova joxu ne la itre trongene isi e hnengödrai: ‘Amekötine jë cememine la nyipi meköt, nge itö ihnimi nyipici jë, me utipin. 10 The atrekënöne kö la sine föe, me nekön hna mecitrij hnei kem, me trenyiwa, memine la atre pë ewekë. Nge the mekune kö e kuhu hni i epun troa iakötrë.’ 11 Ngo xele kö angatre ma dreng. Hnei angatre pala hi hna nuetriji ni. Hnei angatr hna thinge la itre hnangenyë i angatr matre tha tro kö a dreng. 12 Hnei angatr hna axetine la hni i angatr tune la ketre diama, me xele ma drenge la wathebo,* me itre trengewekë hnei Iehova joxu ne la itre trongene isi e hnengödrai, hna qaja hnene la ua i nyidrë, jëne la itre perofeta ekö. Matre hnei Iehova joxu ne la itre trongene isi e hnengödrai hna elëhni.”
13 “‘Pine laka, tha hnei angatre kö hna drei ni lo eni* a hë angatr, ketre tun, tha hnenge kö hna drei angatr lo angatr a hë ni,’ öni Iehova joxu ne la itre trongene isi e hnengödrai. 14 ‘Ame hnenge hna aije angatr jëne la udreli, ngöne la itre nöj hnei angatr hna thatre. Pëkö ka lapane la nöj thupei angatr. Pëkö ka tro me bëek kowe la nöj. Ke hnei angatr hna kuca matre nöje ka iaxoueny hë la nöje ka lolo.’”