Zakaria
10 “Sipone jë koi Iehova troa axulune la itre manie tixenuë.
Iehova la ka axulune la itre iaw ne ngazo drai,
Nge ka atrotrone la manie kowe la itre atr,
Me aciane la nöjei pengöne feja ngöne la hlapa.
2 Ke hnene la itre idrola ne hnalapa* hna qeje trenge iaö.*
Hnene la itre trene iöni hna meköl goeën la itre ewekë ka thoi.
Angatr a qaja la itre pu ka pë alien,
Nge angatr a thele troa iakeukawany, ngo pëkö ca hna akeukawan.
Celë hi matre, tro angatr a tro menu tune la itre mamoe.
Tro angatr a akötr, ke pëkö atre thupë mamoe.
3 Hna mele la elëhning kowe la itre ka thupë mamoe,
Nge tro ni a amekötine la itre tane ka iakötrë.*
Ke Iehova joxu ne la itre trongene isi e hnengödrai, a thupëne la hnënge mamoe i nyidrë, ene la nöje Iudra,
Nge nyidrëti a kuca matre tro angatr a tune la hos ka mingöming i nyidrë ngöne la isi.
4 Qaathei nyidrë la atr ka sisitria,*
Qaathei nyidrë la tan ka ixatua,*
Qaathei nyidrë la tane pehna ne isi,
Qaathei nyidrëti asë hi la nöjei tane huliwa.
5 Nge tro angatr a tune la itre atre isi
Ka waja la trëtr ne la itre gojenyi ngöne la ijine isi.
Tro angatr a isi, ke ce Iehova me angatr,
Nge tro ha thaipiëne la itre ka ti hos.
6 Tro ni a thele jën matre tro la nöje Iudra a hun,
Nge tro ni a amelene la itre matra i Iosefa.
Tro ni a bëeke sai angatr kowe la nöje i angatr,
Ke tro ni a utipi angatr.
Nge kösë tha hnenge kö hna hane nuetriji angatr,
Ke eni Iehova la Akötresi angatr, nge tro ni a sa koi angatr.
7 Tro la angetre Eferaima a tune la atre isi ka catr,
Nge tro la itre hni i angatr a madrin kösë hna iji waina.
Tro la itre nekö i angatr a öhne lai, me madrin.
Jëne Iehova, tro ha madrin la itre hni i angatr.
8 ‘Tro ni a qeji angatr nge tro ni a acasi angatr,
Ke tro ni a itö angatre hmaca.
Tro hë angatr a nyimutre catr, nge tro pala hi angatr a ala nyimu.
9 Ngacama eni a jumi angatr nyipine la itre nöj kösë itre itine feja,
Ngo tro pala hi angatr a meku ni ngöne la itre götrane gaa nany.
Tro hmaca angatr me itre nekö i angatr a mel, me bëeke hmaca.
10 Tro ni a bëeke sai angatr qa Aigupito,
Tro ni a acasi angatr me abëekë angatr qa Asuria.
Tro ni a tro sai angatr a tro Gileada me Lebanona,
Nge tha tro kö a ijije la göhnë koi angatr.
11 Tro ni a thupa la hnagejë me ajolën ej,
Nge hnine la hnagejë, tro ni a lepe la itre hoke ne gejë.
Tro asë hi la itre gaa jui ne la hneopegejë Nil a qaqacil.
Tro ha thaipiëne la pi tru i Asuria,
Tro ha ananyine la sine tö ne mus i Aigupito.
12 Jëne Iehova, tro angatr a hun,
Nge tro angatr a tro ngöne la ëje i nyidrë,’ öni Iehova.”