Thenge La Hna Qaja Hnei Mareko
16 Ame hë e Sabath, hnei Maria Magadalena me Maria thine i Iakobo, me Salome hna itöne la itre haö ka pui lolo, göi troa tro me köle la ngönetrei Iesu. 2 E hmahmakanyi ne la pane drai ne la wiik, thupene la kola fetra la jö, traqa pi hi angatr kowe la hua.* 3 Angatr a ihnyingënekeune ju ka hape: “Drei la ka troa ukune koi së la etë qa ngöne la hnë lö?” 4 Ngo ame hë la angatr a traqa, öhne ju hi angatr laka, ase hë ukune lo ietë, ngacama tha fene ietë kö. 5 Nge ame la angatr a lö, öhne ju hi angatr la ketre nekö trahmanyi ngöne la götrane maca, angeic a nango lapa. Nge ka wië me ka qea la iheetre i angeic. Ame hnei angatr hna pane goe catr. 6 Angeic a qaja ju koi angatr ka hape: “The xou kö. Epuni a thele Iesu, lo atre Nazareta hna athipe hune la sinöe. Patre hë nyidrëti la, ke ase hë amele nyidrëti hmaca. Goeëne ju hi la göhnë i nyidrë. 7 Tro jë, nge qaja ju kowe la itretre drei nyidrë me Peteru ka hape, ‘Tro pa i nyidrëti hë e Galilaia. Nge tro nyipunieti a iöhnyi me nyidrë e cili, tune lo aqane qaja i nyidrëti koi nyipunie.’” 8 Ngo ame hë la angatr a tro qa lai, angatr a canga tro ananyine pi la hua, ke angatr a hai me xou atraqatr. Matre, pëkö hnei angatr hna qaja kow, ke tru catre la trenge xou i angatr.*