Thenge La Hna Qaja Hnei Luka
14 Ame ngöne la ketre Sabath ne traqa Iesu troa xeni thene la ketre tan i ange Faresaio, hnei angatr hna goeëne hnyawa nyidrë. 2 Nge hanawang! E cili fe la ketre trahmanyi hna tithe hnei mec, matre kola cipa la lue ime me lue ca i angeic. 3 Ame hnei Iesu hna pane hnyinge kowe la itre ka inine la Wathebo, me itre Faresaio ka hape: “Hapeu, meköti kö troa aloine la trene mec ngöne la drai Sabath, maine waea?” 4 Ngo lapa thaupe kö angatr. Qa ngöne lai, nyidrëti a xome jë lai trahmany, me aloinyi angeic, me upi angeic hmaca. 5 Öni nyidrëti jë hi koi angatr ka hape: “Maine troa kei e hnine la hnaop la nekö i nyipunie maine kau pena e drai Sabath, hapeu, drei e nyipunie la ka tha tro kö a huli nyëne qaa lai?” 6 Haawe, pë ju hi ka atreine sa koi nyidrë.
7 Nge ame hë la nyidrëti a öhne la aqane iëne angatr la itre göhnë ka mama, nyidrëti a hamëne ju la ketre ceitun. Öni nyidrë: 8 “Ame la kola hë eö troa xen, the lapa* kö ngöne la göhnë ka mama. Ke maine jë, hna hane fe hëne la ketre atr ka draië catre kö hui eö. 9 Nge e cili, tro pë hë la atre ce könë epon a traqa koi eö me hape: ‘Nue pi la göhnë i eö koi nyidrë.’ Nge tro hë eö lai a hmahma, me lapane la göhnë ka tha mama. 10 Ngo e kola hë eö, lapane ju la göhnë ka co catr, matre e traqa jë öhnyi eö hnene la atre hë eö, tro hë angeice lai a qaja koi eö ka hape: ‘Sineeng, trohemi pe kowe la göhnë ka draië.’ Nge e cili, tro ha atrunyi eö qëmekene la nöjei hna könën. 11 Ke ame la atre sipu selë angeice kö, tro ha thaipiën, ngo ame la atre ipië, tro ha adraiën.”
12 Thupene lai, öni nyidrëti jë hi kowe la atre könë nyidrë ka hape: “Ame la eö a hnëkë nyikein, maine nyine xeni hej, the könëne kö la itre sinee i eö, maine trejin me eö, maine itre atr hnei eö hna atre, maine itre trenamo ka lapa easenyi eö. Ke ijiji angatre hi troa könë eö hmaca, matre të koi eö. 13 Ngo maine eö a hnëkë xen, hëne jë la itre ka pë ewekë, me itre sinatr, me itre ka peje ca, me itre timek; 14 nge tro hë eö a madrin, ke pëkö nyine tro angatr a të hmaca koi eö. Ngo tro pe eö lai a kepe thupen ngöne la ijine troa amelene hmaca la itre atr ka meköt.”
15 Nge ame la kola drenge lai hnene la ketre atr hna könën, öni angeic: “Manathithi la atre xeni* ngöne la Baselaia i Akötresie.”
16 Öni Iesu jë hi koi angeice ka hape: “Hnene la ketre atr hna kuci xeni atruny koi hej, me könëne la ka ala nyim. 17 Matre, nyidrëti a upe pi la ketre hlue i nyidrë hmekune la hawa ne xen, matre troa qaja kowe la itre hna könën ka hape: ‘Traqa pi, ke ase hë hnëkën asë.’ 18 Ngo, hnei angatr hna nyiqaane qeje jole koi nyën. Önine la hnapan, ‘Hnenge hna itö hlapa, nge nyipiewekë tro ni a pane tro troa wang. Matre menu hë ni, ngo tha ijijinge kö troa traqa.’ 19 Nge önine fe la ketre ka hape, ‘Hnenge hna itöne la treene lao kau, nge eni hë la a tro troa wai nyudren. Matre menu hë ni, ngo tha ijijinge kö troa traqa.’ 20 Nge önine hmaca kö la ketre ka hape, ‘Eni petre hi la a ase faipoipo, matre tha ijijinge kö troa traqa.’ 21 Haawe, bëeke jë hi la hlu troa qaja la itre ewekë cili kowe la maseta. Matre hnene la maseta ne la hnalapa hna elëhni, me qaja kowe la hlue i angeice ka hape: ‘Canga tro jë kowe la itre gojenyi ka tru, me ngöne la itre neköi gojeny, nge ce bëeke jë memine la itre ka pë ewekë, me itre sinatr, me itre timek, me itre ka peje ca.’ 22 Ame hë e thupen, önine la hlue kowe la maseta i angeic ka hape, ‘Maseta, ase hë kuca la hnei nyipëti hna amekötin, ngo hetre göhnë pala kö.’ 23 Önine hmaca jë hi la maseta kowe la hlue ka hape, ‘Tro hmaca jë kowe la gojenyi me kowe la itre hmene gojeny, nge iele angatre jë troa lö hnin la umang, matre tiqa pi ej.’ 24 Ke eni a qaja hnyawa koi nyipunie laka, pëkö ala casi qaathene lo itre hna könën ka troa lö, me xeni heji theng.”
25 Nge hnene la ka ala nyimu hna ce tro me Iesu, ame hnei nyidrëti hna ujë jë, me qaja koi angatre ka hape: 26 “Maine tro la ketre atr a xötrethenge ni, nge tha pane methinëne* kö la kem, me thin, me ifëkuku, me ha nekön, me trejin, me xa, me sipu mele* i angeic, tha ijiji angeice kö troa ketre atre drei ni. 27 Nge maine tha tro kö la ketre a ajöne la sinöe ne iaxösisi* i angeic me xötrethenge ni fë, tha ijiji angeice kö troa ketre atre drei ni. 28 Nge drei e nyipunie la ka pi xupi uma nge tha tro kö angeic a pane lapa, me mekune hnyawa la thupen me wang ka hape, ijiji angeice kö troa afenesine la uma?* 29 Maine jë, tro angeic a ami trepen, ngo thatreine hë afenesin, nge e cili, tro ha nyiqaane hnyima sai angeic hnei itre atr, 30 me hape: ‘Ase hë angeice nyiqaane xupi uma, ngo tha afenesine kö.’ 31 Maine tro la ketre joxu a tro troa isi me ketre joxu, hapeu tha tro kö nyidrëti lai a pane lapa me hnyinge kowe la itre atresi ka hape, ijiji nyidrëti kö memine la ala 10 000 lao sooc troa ngaane lo ketre joxu ka 20 000 lao sooc? 32 Nge e tha ijiji nyidrëti kö, nge nanyi petre kö la ketre joxu, haawe, tro pë hë nyidrëti lai a upe la itre qeneqaja i nyidrë troa thele tingeting. 33 Ketre tune mina fe, loi e xecie hnyawa koi nyipunie laka, maine tha hnei ketre kö hna inu* memine la itre ewekë i angeic, thatreine kö angeice lai troa ketre atre drei ni.
34 “Lolo la sootr, ngo maine troa patre la mene ne ej, tro lai a pui loi tune kaa? 35 Nge goi pë fe eloine ej kowe la ihnadro, me kowe la a i feja, matre, itre atr a trije ej. Haawe, ame la atr trene hnangenyë troa dreng, drenge ju.”