Hosea
4 Nöje Isaraela fe, drenge ju la hna qaja hnei Iehova,
Ke Iehova a kootrëne la itre atrene la nöj.
Eje hi, pëkö nyipici, me ihnimi nyipici, me atrehmekun göi Akötresie ngöne la nöj.
2 Ase hë haöth ej hnei sisinyi thoi, me thoi, me ihumuth, me atrekënö, me nyixetë.
Eje hi, kolo pala hi a aneni madra hnene la nöj.
3 Qa ngöne lai, tro la nöj a hnëmec,
Nge tro ha patre trootro la itre atren.
Tro ha mec la itre öni wael, me itre waco ne hnengödrai,
Me itre ie e kuhu hnagejë.
4 “Ngo tha tro kö la ketre atr a wesitrën maine cil kowe la nöj,
Ke ceitune la nöje i ö me itre ka icilekeu memine la atre huuj.
5 Qa ngöne lai, tro eö a kei ngacama lai pala kö,
Nge tro la perofeta a ce kei me eö, kösë jidri hë.
Nge tro ni a lep ahumun* la thine i ö.
6 Pëhë nyine tro la nöjeng a qaja,* ke pëkö atrehmekun thei angatr.
Pine laka, hnei ö hna thipetrije la atrehmekun,
Tro fe ni a thipetriji ö, matre tha tro hmaca kö eö a atre huuj koi ni.
Pine laka, hnei ö hna thëthëhmine la wathebo* ne la Akötresi ö,
Tro fe ni a thëthëhmine la itre nekö i ö.
7 Hnene laka, kolo pala hi a elë la etru i angatr, kolo fe a elë la itre ngazo i angatr koi ni.
Tro hë ni a saze la elolo i angatr koi hmahma.*
8 Angatr a xen qa ngöne la itre ngazo ne la nöjeng,
Angatre pe hi a lapa treqene tro la nöjeng a kuca la ngazo.
9 Casi hi la aqane troa amekötine la nöjeng memine la itre atre huuj:
Tro ni a hnyingë pengöne la aqane ujë i angatr,
Me të thenge la itre huliwa i angatr.
10 Tro angatr a xen, ngo tha tro jë kö angatr a mej.
Tro ha nyimutre la itre hnei angatr hna ce meköl* memin, ngo tha tro kö angatr a hnaho atruny,
Ke pëkö ca metrötre i angatr koi Iehova.
11 E troa nyi föe ne gojeny,* me iji waina, me waina ka hnyipixe,
Ke kola apatrene la aja troa kuca la meköt.*
12 Kola hnying hnene la nöjeng kowe la itre idrola sinöe,*
Me kuca la hna upi angatr hnene la sine tö ne kuci haze,
Ke kola amenu angatr hnene la pi kuci ngazo.*
Nge ame la angatr a nyi föe ne gojeny,* angatre hi lai a xele ma dreng la Akötresi angatr.
13 Angatr a tro fë huuj hune la he ne la itre wetr,
Me huhajine la itre huuje i angatr hune la itre sasala,
Fene la itre isinöe libene* me sitirak,* me itre xaa sinöe ka tru,
Ke ka menyik la itre gaa xapon.
Celë hi matre, kola nyi föe ne gojeny* la itre nekö i epuni jajiny,
Nge kola nyixetë la itre tresi i epun.
14 Tha tro kö ni a nyithupen kowe la itre nekö i epuni jajiny pine nyi föe ne gojeny,*
Me kowe la itre tresi i epun pine nyixetë.
Ke itre trahmany a lapa cas memine la itre föe ne gojeny,
Nge angatr a ce huuj memine la itre ka salemë ngönetrei göi hmi.
Tro ha luzi la nöje ka pë inamacan.
15 Isaraela fe, ngacama tro ju hë eö a nyi föe ne gojeny,*
Epi tha tro kö a upezö Iudra.
The traqa kö e Gilegala me e Beth-aven,
Nge the sisinyi kö göi Iehova Akötresie ka mel!
16 Ke ceitu i Isaraela memine la kau föe ka tha idrei.
Tro jë kö Iehova a thupë angatr enehila, tune la atre thupëne la neköi mamoe trahmanyi ngöne la hna axö öni*?
17 Hnime catre Eferaima la itre idrola.
Matre nue angeice pi kö!
Nge itre tan* i angeic a ajane la hmahma.
19 Tro hë la lue iapene la enyi a hakuthi* angeic,
Nge tro angatr a hmahma pine la itre huuje i angatr.”