Zefania
2 Icasikeu jë epun, eje hi, icasikeu jë,
Epun itre atrene la nöje ka tha hmahma kö.
2 Qëmeken troa trongëne la wathebo,
Qëmeken troa tro la drai tune la ikupeine qitr,*
Qëmeken tro la elëhni atraqatre i Iehova a traqa koi epun,
Qëmeken tro la drai ne elëhni i Iehova a traqa koi epun,
3 Thele Iehova jë epuni asë, itre ka ipië e celë fen,
Ka drengethenge la itre wathebo* i nyidrë ka meköt.
Thele jë la meköt, nge thele jë la ipië.
Maine jë, tro ha juetrë epun ngöne la drai ne elëhni i Iehova.
4 Ke tro ha nuetrije la traon e Gaza;
Nge tro ha apatrenyi Asekelona.
5 “Ekölöhini la itre ka lapa ngönegejë, ene la angetre Kerethi!
Kola ameköti epun hnene la trengewekë i Iehova.
Kanana fe, nöje ne la angetre Filisiti, tro ni a lep apatrenyi ö,
Pë hmaca kö ka troa lapa thei ö.
6 Tro ha cia a i öni ngöne la ngönegejë,
Nge tro ha hetre timi hna kuj kowe la itre ka thupë mamoe, me hnë axö mamoe.
7 Tro hë ej a nyi götranen la angetre Iudra ka lapa pe;
E cili, tro hë angatr a xeni haö.
Nge ame e jidr, tro angatr a meköl hnine la itre uma i Asekelona.
Ke tro Iehova Akötresi angatr a meku angatr,
Me bëeke fë la itre hna kötre fë.”
8 “Drenge hë ni la aqane ijelë i Moaba me aqane iqaqa ne la angetre Amona,
Lo itre ka hnyima fë la nöjeng, me nyitru troa thapa la götrane i angatr.
9 Celë hi matre, maine nyipici laka, ka mele ni,” öni Iehova, joxu ne la itre trongene isi e hnengödrai me Akötresi Isaraela,
“Tro Moaba a tui Sodroma,
Nge tro la angetre Amona a tui Gomora,
Götran hna haöth hnei ka ithiny, gaa tiqa hnei sotr, nge ketre hnapapa ka hut.
Tro la itre atren la nöjeng ka lapa pe a atrekënö angatr,
Nge tro la munëne la nöjeng a xom asë la itre ewekë i angatr.
10 Hane hi la hnei angatr hna troa kapa hnane la pi tru i angatr,
Ke hnei angatr hna pi draië me hnyima fë la nöje i Iehova, joxu ne la itre trongene isi e hnengödrai.
11 Tro Iehova a axouenyi angatr;
Ke tro nyidrëti a lep apatrene* la nöjei haze ne la fen,
Nge tro la itre hnapeti ne la itre nöj a thili* koi nyidrë,
Qa ngöne la isa göhne i angatr.
12 Epuni fe, angetre Aithiope, tro ha humuthi epuni hnene la tauang.
13 Tro hë nyidrëti a xejë la ime i nyidrë kowe la götrane kolopi me lep apatrenyi Asuria,
Tro hë nyidrëti a apatrenyi Nineve, me aqaqacilën ej tune la hnapapa.
14 Tro hë la ume öni, me nöjei pengöne öni wael* a meköl nyipin ej.
Tro la kati* me kifoda* a meköl e jidr nyipin la itre ikapan* ej.
Tro ha drenge la ketre nine nyima qa ngöne la mamalama.
Tro ha hetre tra etë ngöne la qene qëhnelö;
Ke tro ha cinajön me maniëne la itre inehe arasi.
15 Hane hi la traon ka pi tru, nge pëkö hna xouen,
Lo ka hape, ‘Eni hi, nge pë ju hë.’
Ame enehila, itre atr a sesëkötre ngazo hnei angeic,
Ke göhnene pë hë la itre öni wael!
Ame asë hi la itre ka tro ezi angeic, ke tro angatr a qej me amamai faitr.”