Atre Cainöj

2 Ame hnenge hna qaja e kuhu hning ka hape: “Tupathe ju la nöjei madrin, nge wange ju la itre thangan ka loi.” Ngo ame pe, ka gufa fe la itre ewekë cili.

 2 Hnenge hna qaja göi hnyima ka hape: “Ka hmo lai!”

Me göne la nyine iamadrinë ka hape: “Nyine uën?”

3 Hnenge hna pi atre la madrin ka xulu qa ngöne la hna iji waina, ngo cememine la inamacan; nge goi huliwa menu fe ni, matre wange la huliwa ka sisitria nyine tro la itre atr a kuca, ngöne la itre hnepe drai ne angatr a mel fene la hnengödrai. 4 Hnenge hna kuca la itre huliwa ka tru, me xupe la itre umang, me traa vin koi ni. 5 Hnenge hna traan atrun la itre iengen me sinöe, me kuci park. Nge hnenge hna traane la nöjei pengöne sinöe nyine xeni wen. 6 Hnenge hna kuje la itre basë, matre fie la itre sinöe* hna hnyipi traan. 7 Hnenge hna xome la itre hlu, trahmanyi me föe, nge hetre itre hlu hna hnahon ngöne la umang.* Tru catre fe kö la itre öni ka tru me ka co hnenge hna itön, hune la itre ka tro pa e Ierusalema. 8 Hnenge hna xawane la sileva me gool, me itre trengamo ne la itre joxu me provës. Nge hnenge hna acasine koi ni la itre trahmanyi me föe ka nyima, memine la ka amadrinëne la itre nekö trahmany: Ene la föe, eje hi, nyimu föe. 9 Eni la ketre atr ka tru, nge ka sisitria kö ni hune la itre ka tro pa e Ierusalema. Nge tha patre kö qaatheng la inamacan.

10 Tha ase kö ni xelene la ketre ewekë hnenge hna ajan.* Tha ase kö ni cipane la ketre madrin kowe la hning, ke hnene la hning hna madrin kowe la hnenge hna catre huliwa. Nge celë hi thangane* la hnenge hna huliwa catr. 11 Ngo ame la eni a mekune hmaca la itre huliwa ne la lue imeng, memine la aqane huliwa meci ni, ke öhne ju hi ni laka, ka gufa asë hi, kösë kola nyinyape thenge la eny. Ka pëkö ca aliene* la itre huliwa hna kuca fene la jö.

12 Thupene lai, hnenge hna lapa mekune la inamacan, memine la itre huliwa ka hmo, memine la troa huliwa menu. (Ke nemene hmaca kö la nyine troa kuca hnene la atr ka nyihnane la joxu? Ene hmekuje hi la hna kuca ha.) 13 Nge öhne ju hi ni laka, hetre eloine la troa inamacan hune la troa huliwa menu. Ketre tun, hetre eloine la lai hune la jidr.

14 Ka goe la luemeke ne la atr ka inamacan, ngo kola tro mit la atr ka hmo. Nge trotrohnine hë ni laka, casi hi la pun koi nyidroti asë. 15 Ame hnenge hna qaja e kuhu hning ka hape: “Casi hi la pun koi ni memine la hmo.” Matre nemene la eloin e tro ni a inamacane catr? Öninge jë hi e kuhu hning: “Ketre ka gufa fe lai.” 16 Ke tune la hmo, canga tro hi sa thëthëhmine la atr ka inamacan. Tha hmitre ju kö, nge tha tro hmaca kö a meku nyidroti asë. Nge troa meci tune kaa la ka inamacan? Tune la hmo.

17 Ame hnenge hna methinëne la mel, ke hna ahleuhleunyi ni hnene la itre huliwa hna kuca fene la jö. Ka gufa asë hi, kösë kola nyinyape thenge la eny. 18 Hnenge hna methinëne la itre ewekë hnenge hna huliwa meci kow fene la jö, ke tro pë hë a kepe thupen hnene la ka troa nyihnai ni. 19 Nge drei la ka atre ka hape, tro angeic elany a inamacan maine hmo? Ngo ame pe, angeic la ka troa musi kowe la itre ewekë hnenge hna kapa qa ngöne la trengecatreng, me aqane huliwa inamacane ni fene la jö. Ketre ka gufa fe lai. 20 Ame hna hleuhleu la hning pine la aqane huliwa meci ni fene la jö. 21 Ke maine jë, tro la ketre atr a huliwa mec thenge la inamacan, me atrehmekun, me atrein, ngo tro pë hë angeic a nu asë kowe la ketre atr ka tha hane kö huliwa troa hetrenyi lai. Ka gufa fe lai, nge ketre akötre ka tru.

22 Nemene la eloine kowe la atr la troa huliwa mec, me eatrëne la trenge aja* i angeic troa huliwa catr fene la jö? 23 Ke e nöjei drai ne la mele i angeic, akötre me hleuhleu la hnei angeic hna kapa qa ngöne la huliwa i angeic. Nge goi tha mano fe la hni i angeic e jidr. Ka gufa fe la ewekë cili.

24 Pëkö xaa ewekë ka tru kowe la atr hune la troa xeni me ij, me madrin qa ngöne la hna catre huliwa. Nge trotrohnine hë ni laka, qaathene la ime ne la nyipi Akötresie la ewekë cili. 25 Ke drei la atr ka xeni me ij tui eni?

26 Ame la nyipi Akötresie, nyidrëti a hamë inamacan, me atrehmekun kowe la atr hnei nyidrëti hna hnim. Ngo nyidrëti pe a upe la atr ka ngazo troa kapa me xawan kowe la hnimina ne la nyipi Akötresie. Ka gufa fe la ewekë cili, kösë kola nyinyape thenge la eny.