Salamo
Mikitam* i Dravita.
16 Akötresieti fe, thupë ni ju, ke eni a zae thei nyipë.
2 Öning koi Iehova: “Iehova, nyipëti la Qaane la itre lolong.
3 Tru la madrineng pine la itre atr ka hmitrötr e celë fen,
Me itre ka hlemu.”
4 Nyimutre la itre akötr ne la itre ka xötrethenge la itre xaa haze.
Tha tro kö ni a neng la madra ne la itre huuje i angatr,
Nge tha tro kö la qëng a qaja la ëje i angatr.
5 Iehova la edröng me trepe imeng.
Nyipëti a thupëne la edröng.
6 Hna tuluthe koi ni la itre götran gaa lolo.
Madrine catre ni kowe la edröng.
7 Tro ni a atrunyi Iehova atre eamo ni.
Ame fe e jidr, itre mekuna ne la hning* a ameköti ni.
8 Hnenge pala hi hna ami Iehova qëmekeng.
Pine laka, nyidrëti ngöne la götrane macang, tha tro jë kö ni a enienij.*
9 Qa ngöne lai, madrine* hë la hning, nge lolo hë la meleng.
Eni* a mele tingeting.
10 Ke tha tro kö nyipëti a nue ni ngöne la Hua.*
Tha tro kö nyipëti a nue la atr ka mele nyipici troa öhne la hnaop.*
11 Nyipëti a ini ni la jëne mel.
Qëmekei nyipë, tiqa catre hnei madrin;
Ngöne la götrane maca i nyipë, hetre madrin* ka epine palua.