Habakuka
1 Hane hi la hna meköle goeën hnei Habakuka* perofeta:
2 Iehova fe, uti hë eu la tro nyipëti a drei simine la eni a sipo ixatua?
Uti hë eu la tro nyipëti a drei simine la sipong troa apatren* la iakötrë?
3 Hnauëne la nyipëti a amamai ni la ka tha meköti kö?
Nge hnauëne la nyipëti a nue la iakötrë?
Hnauëne la kola iapatreny me isi xötreithi ni?
Hnauëne la kola tru hnei iwesitrë me icilekeu?
4 Pëhë trengecatrene la wathebo,
Nge tha ase pi kö trongëne la meköt.
Itre atr ka ngazo a qanangazone la itre atr ka meköt;
Celë hi matre, tria ha la meköt.
5 “Goeëne jë la itre nöj, nge wange ju!
Haine jë nge sesëkötre jë;
Ke ngöne la ijine mel epun, troa traqa la ketre ewekë
Ketre ewekë hnei epuni hna tha jelenyipicin e troa porotrikën koi epun.
6 Ke eni hë la a upe la angetre Kaledaia,
Ketre nöj ka iaxösisi nge ka pë utipin.
Angatr asë hi a trongën la itre nöje ka tru
Matre troa thapa la ifekë uman.
7 Itre hna xouen nge ka iaxoueny.
Angatre kö la ka sipu acil la meköt me musi* angatr.
8 Ka nyenyape catre kö la itre hose i angatr hune la itre leopar,
Nge ka iheje catre kö hune la itre luko e jidr.
Itre hose ne isi i angatr a nyenyape kolem;
Itre hose i angatr a traqa qa gaa nany.
Itre ej a sesë tune la aeto ka uti kowe la tha i angeic.
9 Angatr asë hi a traqa troa iakötrë.
Angatr a ce ut kösë enyi ne koië,
Nge ame la etrun la itre hnei angatr hna oth, ke kösë ngöni.
10 Angatr a hnyima fë la itre joxu
Me hnyima sane la itre ka huliwa i joxu.
Angatr a hnyima fë la itre hna eköhagen;
Angatr a jë xawane la dro, matre thapa la itre hna eköhagen.
11 Thupene lai, angatre hmaca a trongëne la gojenyi angatr tune la eny,
Ngo tro kö angatr a xeni pun,
Pine angatr upe kowe la itre haze* i angatr la trengecatre i angatr.”
12 Iehova fe, tha ka mele kö nyipë qaan ekö?
Akötresinge fe, Atre Ka Hmitrötr, tha ka hane kö nyipëti mec.*
Iehova fe, hnei nyipëti hna ië angatr troa eatrëne la hna amekötin;
Gitinge fe, hnei nyipëti hna acili angatr matre troa nyithupen.*
13 Ka hmitrötre catr la luemeke i nyipë troa goeëne la ngazo,
Nge thatreine kö nyipëti kapa la ngazo.
Nga hnauëne kö hö la nyipëti a nue la itre ka mele thoi
Me lapa thaup la kola ulum la atr ka meköt hnene la atr ka ngazo?
14 Hnauëne la nyipëti a xome ceitune la itre atr me itre ie ne hnagejë,
Me xome ceitu angatr me itre öni ne hnagejë ka pë masetan?
15 Angeic* a ee angatr asë hnei ge ne thiny.
Angeic a ee angatr ngöne la ieötre i angeic ne nyi ie,
Me hlemi angatr ngöne la ifile i angeic.
Celë hi matre, tru catre la madrine i angeic.
16 Qa ngöne lai, angeic a tro fë huuj kowe la ifile i angeic
Me huuj* kowe la ifile i angeic;
Ke jëne itre ej, tru catre hë la a i angeic,*
Nge nyipi xen la a i angeic.
17 Matre hapeu, tro pala kö angeic a nengeneng la ifile* i angeic?
Tro pala kö angeic a pë utipin me axösisin la itre nöj?