Salamo
HNAALUENE ITUS
(Salamo 42-72)
Thatraqane la atre jumi traem. Masekil* ne la itre nekö i Kora.
42 Tune la drube föe ka thel agöne la itre tim,
Eni fe a thele nyipë, Akötresinge fe.
2 Eni a thele Akötresie, tune la atre ka pi ij.
Eu la tro ni a traqa me cil qëmekei Akötresie?
3 Itre trenge timidrang la ang e lai me jidr;
Ngöne la drai ka pexej, itre ka hnyimasai ni a qaja ka hape: “Ekaa la Akötresi ö?”
4 Eni a mekun lo itre ewekë celë, nge eni a nenge la itre aliene hning,
Ke hnenge ekö hna ce tro* memine la ka ala nyim;
Hnenge hna tro metrötr* qëmekei angatr kowe la uma i Akötresie,
Nge kola sue madrin me ole hnene la ka ala nyim,
Kösë angatr a atrune la ketre feet.
5 Hnauëne laka, eni a kucakuca?
Hnauëne laka, eni a seseu?
Tro ni a treqe Akötresie, nge tro hmaca kö ni a atrunyi nyidrë,
Ke nyidrëti la Atre Iamele Ka Sisitria ne la meleng.
6 Akötresinge fe, kucakuca ha ni.
Celë hi matre eni a meku nyipë,
Qaane la nöje Ioridrano me itre hene wetr e Heremona,
Uti hë la wetre Mizera.*
7 Hnenge hna drenge la uliline la itre tim ka jui nyipë
Ene la mejene la itre tim ka kaca i nyipë.
Hna heti* ni hnene la itre hoke ne gejë i nyipëti asë.
8 Ngöne la drai, tro Iehova a amamane koi ni la ihnimi nyipici i nyidrë,
Nge ame e jidr, tro la nyima i nyidrë a ce me eni, ene la ketre thithi kowe la Akötresieti ne la meleng.
9 Tro ni a qaja koi Akötresie lo giting, ka hape:
“Hnauëne laka, hnei nyipëti hna thëthëhmi ni?
Hnauëne la tro ni a treije trootro pine la ithupëjia ka akötrë ni?”
10 Ngazo* la aqane hnyimasai ni hnene la itre ithupëjiang;
Ngöne la drai ka pexej, angatr a hnyimasai ni me hape: “Ekaa la Akötresi ö?”
11 Hnauëne laka, eni a kucakuca?
Hnauëne laka, eni a seseu?
Tro ni a treqe Akötresie, nge tro hmaca kö ni a atrunyi nyidrë,
Ke nyidrëti la Atre Iamele Ka Sisitria ne la meleng me Akötresing.