Salamo
Nyima ne Elë.
128 Madrine la atre xoue Iehova,
Nge ka trongëne la itre jë i Nyidrë.
2 Tro hë eö a xeni qa ngöne la huliwa ne la lue ime i ö.
Tro hë eö a madrin me mana.
3 Tro la föi ö a tune la ketre ivin ka ham ngöne la hnalapa i ö;
Tro la itre nekö i ö a tune la itre neköi ioliv* xötreithe la laulau i ö.
4 Goeën! Celë hi manathith hna troa kapa
Hnene la atre xoue Iehova.
5 Qaa Ziona, tro hë Iehova a amanathithi ö.
Ngöne la nöjei drai ne mele eö, epi tro eö a öhne la kola mana hnei Ierusalema
6 Me öhne la itre api ö trahmany.
Loi e eje hui Isaraela la tingeting.