Esodro

39 Angatr a kuca ju la itre iheetre hna cane hnyawan hnei theny ka bulu, me drela ka madra, me theny ka madra palulu thatraqane la huliwa e hnine la gaa hmitrötr. Angatr a kuca ju fe la itre iheetre hna ahmitrötrën thatraqai Arona, tune lo hnei Iehova hna amekötine koi Mose.

2 Angatr a cane ju la iefoda hnei gool, me theny ka bulu, me drela ka madra, me theny ka madra palulu, me nyipi lino hna el. 3 Angatr a lepelepe ju hnei hama la itre dröne gool, uti hë la itre ej a hmelele. Nge angatr a thupa aqeane pi matre troa ce el memine la theny ka bulu, me drela ka madra, me theny ka madra palulu, me nyipi lino. Nge hna sile la iefoda hnene la itre theny cili. 4 Nge angatr a cane ju la lue nyine he hna iap hune la iefoda, matre acatrene la lue pun. 5 Nge ame la otren hna el nge hna can hune la iefoda, lo ka acatren ej, casi hi la aqane can: gool, me theny ka bulu, me drela ka madra, me theny ka madra palulu, me nyipi lino hna el, tune lo hnei Iehova hna amekötine koi Mose.

6 Nge angatr a acatrene jë la itre etë soama ngöne la itre trepene gool. Nge angatr a sija ju hune la itre etë la itre ëjene la itre nekö i Isaraela, tune la aqane sija la nyine pelehatren. 7 Nge angatr a acatrene jë la lue etë hune la lue nyine he hna iape ne la iefoda, nyine nyi etë ne amekunën kowe la itre nekö i Isaraela, tune lo hnei Iehova hna amekötine koi Mose. 8 Nge angatr a sile ju la nyine he imano, tune la aqane sile la iefoda, hna kuca hnei gool, me theny ka bulu, me drela ka madra, me theny ka madra palulu, me nyipi lino hna el. 9 E kola sa luën ej, caasi hi la eqeane la 4 lao götran ej. Hnei angatre hna kuca la nyine he imano matre e kola sa luën, ej a ca iwanakoime* la eqean, nge ca iwanakoime la eisaisan. 10 Angatr a amingömingöne jë hnene la 4 lao xötr etë. Ame la pane xötr, ke sadio, me topazio, me bereketh. 11 Ame la hnaaluene xötr, ke semerado, me safairo, me aloma. 12 Nge ame la hnaakönine xötr, ke lesema,* me sevo, me amethusa. 13 Nge ame ngöne la hna 4 ne xötr, ke berulo, me soama, me iasepi. Hna acatrene la itre etë cili hune la itre trepene gool. 14 Ame la itre etë cili, hna ati ëjen la 12 lao nekö i Isaraela. Nge hna sija la itre ëj, tune la aqane sija la nyine pelehatren. Hna ati ëjene la itre etë cili, la ëjene la 12 lao tribu.

15 Angatr a kuca ju kowe la nyine he imano, la itre cein hna kuca hnei nyipi gool, nge hna el tune la itre eno. 16 Nge angatr a kuca ju la lue hnepe gool, me lue otru gool. Nge angatr a acatrene ju la lue otru ngöne la lue pune la nyine he imano. 17 Thupene lai, angatr a alöne ju la lue eno gool hnine la lue otru, ngöne la pune la nyine he imano. 18 Nge angatr a alöne ju la lue pune la lue eno ngöne la lue hnepe gool, me acatren hune la lue nyine he hna iape ne la iefoda ngöne la qëmeken. 19 Thupene lai, angatr a kuca ju la lue otru gool, me acatren ngöne la lue ezin la nyine he imano, e kuhu fen me e hnine la iefoda. 20 Nge hnei angatr hna kuca la lue xa otru gool, me acatren qëmekene la iefoda, fene la lue nyine he hna iap, ezine la hna itronyi ne la otren memine la iefoda, hune la otren hna el ne la iefoda. 21 Thupene lai, hnei angatr hna acatrene la nyine he imano hnene la ketre eno ka bulu, nge ej a lö hnine la itre otrue ne la nyine he imano, me itre otru ne la iefoda. Celë hi ka cilaxom la nyine he imano hune la iefoda, me hune la otren hna el, tune lo hna amekötin hnei Iehova koi Mose.

22 Nge hnei angeic hna kuca la iheetre ka qea nge ka pë imen ne lai iefoda, tune la aqane kuca ne la atre ca imaano. Nge hna can asë hnei theny ka bulu. 23 Nge ame la ulan ne la iheetr ka qea nge ka pë imen, ej e kuhu nyipin, tune la ulan ne la nyine he imano ne isi. Nge hna can xötreithe la ulan, matre tha tro kö a zezeny. 24 Nge ngöne la pune la iheetre ka qea nge ka pë imen, hnei angatr hna cane la itre grenad hnei theny ka bulu, me drela ka madra, me theny ka madra palulu hna el. 25 Nge hnei angatr hna kuca la itre neköi paate hnei nyipi gool, me athip itre ej nyipine la itre grenad, xötreithe la pune la iheetre ka qea nge ka pë imen. Nge nyipine la itre grenad: 26 Hna amë la ca neköi paate, thupene lai ca grenad, nge thupene la ca neköi paate, ca grenad, uti hë la kola lapan asë la pune la iheetre ka qea nge ka pë imen, lo hna heetrën thatraqane la huliwa, tune lo hna amekötin hnei Iehova koi Mose.

27 Nge hnei angatr hna cane la itre iheetr ka qea hnei nyipi lino, iheetr hna can hnene la ka ca imaano, thatraqai Arona me itre nekö i angeic. 28 Nge hnei angatr hna kuca la nyine atu he hnei nyipi lino, memine la itre nyine amingömingöi he hnei nyipi lino, me itre sine trauziz hnei nyipi lino hna el, 29 memine la otrene hni hna kuca hnei nyipi lino hna el, me theny ka bulu, me drela ka madra, me theny ka madra palulu hna el, tune lo hna amekötin hnei Iehova koi Mose.

30 Thupene lai, hnei angatr hna kuca hnei nyipi gool la ketre sine gool ka melemel, nyine hatrene ka hmitrötr.* Nge angatr a sija ju hun ej, tune la aqane sija la nyine pelehatren, ka hape: ‘Thatraqai Iehova la ehmitrötren.’ 31 Angatr a hnöthe ju la ketre eno ka bulu nyine atë hune la nyine atu he, tune lo hna amekötin hnei Iehova koi Mose.

32 Ame hna fenesi pi la huliwa thatraqane la uma maano, memine la itat ne icasikeu. Nge hnei angetre Isaraela hna kuca asë la hna amekötin hnei Iehova koi Mose, angatr a kuca asë jë la hna qaja.

33 Thupene lai, angatr a traqa fë pi koi Mose la uma maano, memine la itat, me itre ewekë ka ce tro memin: itre nyine acatren, me itre inehe, me itre agö, me itre sine feni, me itre trepene hna kuj; 34 memine la isitr hna kuca hnei kupeine mamoe hna amadran, memine la isitr hna kuca hnei kupeine fok, memine la imaano ne thewe hnahag; 35 memine la pua ne Anyipicin, me itre tan, me ithingen; 36 memine la laulau me itre ewekë ka ce tro memin, me itre falawa nyine amaman; 37 memine la ita ne laam hna kuca hnei nyipi gool, me itre laam hna amë kanoth, me itre ewekë ka ce tro memin, memine la oel kowe la itre laam nyine thina; 38 memine la ita ne huuj gool, me oel ne iën, memine la nyine dreu ka pui loi, me irido ka hmelele thatraqane la hnë lö ne la itat; 39 memine la ita ne huuj kopa, me ikalailai kopa, me itre tan, me itre ewekë ka ce tro memin, memine la trepene tim me trepen ej; 40 memine la itre imaano thatraqane la götrane gaa pë ihakun, me itre sine feni, me itre trepene hna kuj, memine la imaano thatraqane la hnë lö kowe la götrane gaa pë ihakun, me itre eno, me itre nyine saan, me nöjei ewekë thatraqane la huliwa hnine la uma maano, me huliwa hnine la itat ne icasikeu; 41 memine la itre iheetr hna cane hnyawan thatraqane la huliwa ne la uma ne hmi, me itre iheetre hna ahmitrötrën thatraqai Arona atre huuj, me itre iheetr hna troa heetrën hnene la itre nekö i angeic, ngöne la angatr a cilëne la hnëqa ne atre huuj.

42 Hnene la angetre Isaraela hna kuca asë la huliwa hnei Iehova hna amekötine koi Mose. 43 Ame hë la Mose a wange la huliwa hnei angatre hna kuca, öhne ju hi angeic laka, hnei angatre hna kuca hnyawane la huliwa, thenge la hna amekötin hnei Iehova. Ame hnei Mose hna amanathithi angatr.