Esodro
3 Mose la ka thupëne la hnënge öni i Iethero lo hmihmi angeic, atre huuj e Midiana. Ame la angeic a engëne trongëne la ume öni kowe la götrane kuë ne la hnapapa, traqa ju hi angeice kowe la wetre ne la nyipi Akötresie e Horeba. 2 Matre hnene la angela i Iehova hna mama koi angeic ngöne la ukahlokine eë, nyipine la ketre isinöe ka ithiny nge ka lapalapa. Nge Mose a goeëne la isinöe e mel, ngo tha ae kö. 3 Matre öni angeic: “Tro ni a pane wange la ewekë ka ketre pengön, matre atre la kepin matre tha ae kö lai sinöe ka lapalapa.” 4 Nge ame la Iehova a öhne laka, angeic a easenyi troa goeën, nyidrëti a hë angeice jë qa nyipine la isinöe ka lapalapa, me hape: “Mose! Mose!” Matre öni angeic: “Eni hi la!” 5 Öni nyidrë: “The easenyi kö, nge una pi la lue ibutre i eö, ke nyipi hmitrötre la götran hnei eö hna cile ngön.”
6 Nge öni nyidrë: “Eni hi la Akötresi ne la keme i eö, me Akötresi Aberahama, me Akötresi Isaaka, me Akötresi Iakobo.” Ame hnei Mose hna thunge la ialameke i angeic, ke xou i angeice ma goeëne la nyipi Akötresie. 7 Nge öni Iehova hmaca: “Tha sihngödri kö koi ni la aqane akötrëne la nöjeng e Aigupito, nge drenge hë ni la itre treije i angatr hnene la itre ka folosa angatr. Atre hnyawa hi ni la itre akötre i angatr. 8 Tro ni a uti troa thepe angatr qa ngöne la ime i angetre Aigupito, me xomi angatre qa lai, me tro sai angatr kowe la nöje ka lolo nge ka tru. Nöje gaa neni gala hnei melek me miel, zi angetre Kanana, me Heth, me Amora, me Perizi, me Hivi, me Iebusi. 9 Ke traqa ha koi ni la itre treij ne la nöje Isaraela. Nge öhne hë ni la aqane axösisi angatr hnene la angetre Aigupito. 10 Matre enehila trohemi, tro ni a upi eö koi Farao, nge tro eö a xome la nöjeng Isaraela qa Aigupito.”
11 Ngo öni Mose kowe la nyipi Akötresie: “Ke drei ni matre troa wai Farao, me xomi angetre Isaraela qa Aigupito?” 12 Sa jë hi nyidrë ka hape: “Tro ni a ce me eö. Nge matre xecie jë koi eö laka, eni la ka upi eö, hane hi la hatren, e ase jë eö xome la nöj qa Aigupito, tro epuni a nyihluene* la nyipi Akötresie hune la wetre celë.”
13 Nge öni Mose kowe la nyipi Akötresie: “E tro ni a tro koi angetre Isaraela me hape, ‘Hnene la Akötresi ne la itre qaaqaa i epun hna upi ni koi epun,’ nge e tro angatr a hnyinge ka hape, ‘Ke drei la ëje i nyidrë?’ Tro ni a sa tune kaa koi angatr?” 14 Matre önine la nyipi Akötresie koi Mose: “Tro Ni a Ej, La Hnenge Hna Mekun* Troa Ej.” Nge öni nyidrëti hmaca jë: “Hane hi la nyine tro eö a sa koi angetre Isaraela, ‘Hnei Tro Ni a Ej hna upi ni koi epun.’” 15 Nge öni Akötresieti hmaca koi Mose:
“Hane hi la nyine tro eö a qaja koi angetre Isaraela, ‘Iehova, Akötresi ne la itre qaaqaa i epun, me Akötresi Aberahama, me Akötresi Isaaka, me Akötresi Iakobo la ka upi ni koi epun.’ Hane hi la ëjenge uti hë epin, nge tro ha meku ni ngöne la ëje celë, hnene la nöjei xötr atr asë. 16 Enehila, tro jë icasinekeune la nöjei qatr ne Isaraela, nge hape jë: ‘Hnei Iehova Akötresi ne la itre qaaqaa i epun, me Akötresi Aberahama, me Akötresi Isaaka, me Akötresi Iakobo, hna mama koi ni. Öni nyidrë, “Hnenge hna meku epun, nge öhne hë ni la hna kuca koi epun e Aigupito. 17 Celë hi matre eni a sisinyi troa thepe epun qa ngöne la akötr, lo hna kuca koi epun hnei angetre Aigupito. Nge tro ni a tro sai epun kowe la nöje i angetre Kanana, me Heth, me Amora, me Perizi, me Hivi, me Iebusi. Nöje gaa neni gala hnei melek me miel.”’
18 “Tro angatr a drei eö, nge tro eö me itre qatr ne Isaraela a tro kowe la joxu me hape, ‘Hnei Iehova Akötresi angetre Heberu hna ithanata koi hun. Matre nue huni pi troa tro kowe la hnapapa, ke köni drai ne tro huni a tro, matre tro huni a huuj koi Iehova Akötresi hun.’ 19 Ngo atre hi ni laka, tha tro kö la joxu ne Aigupito a nue epuni troa tro, e tha hna uku angeice kö hnene la ketre ime ka catr. 20 Ngo loi e tro ni a pane saathe la imeng, me lepi Aigupito, ene la troa kuca la nöjei iamamanyikeu ka tru. Nge thupene lai, tro hë angeic a nue epun. 21 Nge tro ni a kuca matre tro la angetre Aigupito a hnimi epun, matre ame hë la epuni a tro, tha tro kö epuni a tro pë ewekë. 22 Nge tro la nöjei föe a sipon kowe la itre föe ka lapa easenyi angatr, me kowe la itre föe ka lapa thei angatr, la itre ewekë sileva, me gool, me itre iheetr. Nge tro hë epuni a heetrëne la itre nekö i epun, trahmanyi me jajiny. Nge tro epuni a eöth asë la itre ewekë i angetre Aigupito.”