Levitiko
10 Ame hë e thupen, hnei Nadaba me Abiu, lo lue nekö i Arona, hna isa xome la trepene eë i nyidro, me ami eë, me atë hun ej la nyine dreu ka pui loi. Nge hnei nyidro hna huujëne qëmekei Iehova la ketre eë hna wathebon, nge tha hna upi nyidroti kö troa kuca. 2 Ame hna trotro pi la eë qaathei Iehova me dreuthi nyidro, nge meci ju hi nyidro qëmekei Iehova. 3 Matre öni Mose jë hi koi Arona: “Hane hi la hnei Iehova hna qaja: ‘Tro ha ahmitrötrë ni hnene la itre atr ka lapa easenyi ni, nge tro ha atrunyi ni qëmekene la nöj asë.’” Ngo tha sa pi kö Arona.
4 Ame hnei Mose hna hë Misaela me Elizafana, lue nekö i Uziela, ketre keme i Arona, me hape: “Alemi jë, nge xome jë la lue trejin me epon qa ngöne la götrane gaa hmitrötr, nge tro sai nyidroti pi tröne la lapa.” 5 Nge hnei nyidro hna easeny, me xome la lue ka mec, cememine la hna heetre i nyidro ka qea. Nge hna xomi nyidro kowe la ketre götran tröne la lapa, tune lo hnei Mose hna ahnithe koi nyidro.
6 Matre öni Mose koi Arona me lue nekö i angeic, Eleazara me Ithamara, ka hape: “Tha tro kö a nue la itre ipene he i epun troa cia, nge tha tro kö a kuie zezene la itre iheetre i epun, wanga meci pi epun, nge wanga elëhni jë Akötresie kowe la nöj asë. Ngo qanyine pë hë la itre trejin me epun qa Isaraela troa treije pine la lue atr hnei Iehova hna humuth hnei eë. 7 Tha tro kö epuni a tro qa ngöne la hnë lö ne la itat ne icasikeu, wanga meci pi epun, ke hna sië epun hnene la oel nyine iëne i Iehova.” Ame hnei angatr hna kuca thenge lo hnei Mose hna qaja.
8 Thupene lai, öni Iehova jë hi koi Arona: 9 “Ame pë hë eö me itre nekö i ö, tha tro kö epuni a iji waina maine ka haitr qëmekene tro epuni a lö ngöne la itat ne icasikeu, wanga meci pi epun. Celë hi wathebo ka epine palua kowe la nöjei xötr atr thei epun. 10 Celë hi ka troa aisapengönëne la ewekë ka hmitrötr, me ewekë ka tha hmitrötre kö, memine la ewekë ka pui ngazo, me ewekë ka pui loi, 11 matre troa inine la angetre Isaraela, la itre wathebo hnei Iehova hna qaja jëne Mose.
12 Nge öni Mose koi Arona me kowe la lue nekö i angeic ka mele pe, ene Eleazara me Ithamara, ka hape: “Xome jë la munëne la huuj ne la itre wene feja, qa ngöne la itre huuj ne eë koi Iehova, nge hnëkëne jë la falawa ka pë levenen, nge xeni jë ezine la ita ne huuj, ke celë hi ewekë ka nyipi hmitrötr. 13 Nge tro epun a xeni lai ngöne la götrane gaa hmitrötr, ke celë hi edrö i ö me itre nekö i ö hna xome qa ngöne la itre huuj ne eë koi Iehova. Celë hi ewekë hna ahnithe koi ni. 14 Hnëqa i ö me itre nekö i ö trahmanyi me jajiny, troa öni la imano ne la huuj ne jumejum ngöne la götrane gaa hmitrötr, memine la inaean hna ahmitrötrën. Ke celë hi edrö i ö me itre nekö i ö hna xom qa ngöne la itre huuj ne tingeting ne la angetre Isaraela. 15 Nge ame la inaean hna ahmitrötrën, memine la huuj ne jumejum, qa i angatr troa tro fë memine la itre igiris ne la itre huuj ne eë, matre jumejume la huuj ne jumejum qëmekei Iehova. Celë hi edrö ka epine palua koi ö me itre nekö i ö, tune lo hna ahnithe hnei Iehova.”
16 Ame hnei Mose hna thele la hna kuca kowe la mamoe trahmany ne la huuj ne ngazo, nge hnei angeic hna atre pë hë e thupen laka, ase hë dreuth. Matre hnei Mose hna elëhni koi Eleazara me Ithamara, lo lue nekö i Arona ka mele pe. Nge öni angeic jë hi koi nyidro ka hape: 17 “Hnauëne laka, tha hnei epone kö hna öni la huuj ne ngazo ngöne la götrane gaa hmitrötr, ke ewekë lai ka nyipi hmitrötr, nge hna hamëne lai koi epun matre apatrene la ngazo ne la nöj, me kuca qëmekei Iehova lo huuj ne ialoinekeun thatraqane la nöj? 18 Tha hna traqa fë kö la madran ej ngöne la götrane gaa hmitrötr. Maine ju, qa i epuni lo troa canga öni la huuj ngöne la götrane gaa hmitrötr, tune lo hna ahnithe koi ni.” 19 Ngo sa jë hi Arona ka hape: “Pane dreng! Ngöne la drai ce, hnei nyidro hna tro fë la huuj ne ngazo, memine la huuj ne dreuth asë qëmekei Iehova. Maine xeni ju ni la huuj ne ngazo thupene la ewekë ka traqa koi ni, ke hapeu, tro jë kö Iehova a madrine koi ni?” 20 Ame hnei Mose hna kapa madrin la hna qaja hnei Arona.