Levitiko

12 Öni Iehova hmaca jë hi koi Mose: 2 “Hape jë kowe la angetre Isaraela: ‘Maine tro la ketre föe a upune* me hnahone la nekö trahmany, tro hë angeic a pui ngazo koi 7 lao drai, tune lo ijin angeic a pui ngazo, ke kola traqa la meci itre föe. 3 Nge ame hë la kola 8 lao drai ne la nekönatr, tro ha xötrehatrenyi nyën. 4 Nge tro pala hi la föe a apuiloinyi angeic qa ngöne la madra ka neni koi 33 lao drai. Nge tha tro kö angeic a ketr la ewekë ka hmitrötr, me lö kowe la götrane gaa hmitrötr, uti hë la kola fenes la itre drai ne apuiloinyi angeic.

5 “‘Nge maine angeic a hnahone la nekö jajiny, tro hë angeic a pui ngazo koi 14 lao drai, tune lo ijin angeic a pui ngazo, ke kola traqa la meci itre föe. Nge tro pala hi angeic a apuiloinyi angeic qa ngöne la madra ka neni koi 66 lao drai. 6 Nge ame la kola fenesi la itre drai ne apuiloinyi angeic göne la nekö trahmany maine nekö jajiny, tro hë angeic a tro fë kowe la atre huuj, ngöne la hnë lö ne la itat ne icasikeu, la ca neköi mamoe trahmanyi ka ca macatren, nyine huuj ne dreuth asë, memine la neköi piny maine meketrë, nyine huuj ne ngazo. 7 Tro pë hë la atre huuj a tro fë itre ej qëmekei Iehova, me kuca lo hna majemin, ene la huuj ne ialoinekeun thatraqai angeic, nge tro ha apuiloinyi angeic qa ngöne la madra ka neni. Celë hi wathebo kowe la föe ka hnaho nekö trahmany maine nekö jajiny. 8 Nge maine tha ijiji angeice kö troa tro fë la mamoe, loi e tro angeic a tro fë la lue meketrë maine lue neköi piny, matre cas nyine huuj ne dreuth asë, nge cas nyine huuj ne ngazo. Nge tro la atre huuj a kuca lo hna majemin, ene la huuj ne ahmitrötrën* koi angeic, nge tro ha apuiloinyi angeic.