Esodro

21 “Hane hi la itre hna amekötin nyine tro eö a qaja koi angatr:

2 “Maine tro eö a itöne la ketre hlu* atre Heberu, tro hë angeic a nyihlu koi 6 lao macatre, nge tro ha nue gufa angeic ngöne la hna 7 ne macatre, nge pëkö nyine tro angeic a të. 3 Nge maine ka traqa cas, tro hë angeic a tro cas. Nge maine hetre föi angeic, tro fe la föi angeic a ce tro me angeic. 4 Nge maine tro la maseta i angeic a hamë föi angeic, nge nyidroti a hnaho nekö trahmanyi me jajiny, ame la föe me ha nekönatr, ke ewekëne pë hë la maseta, nge tro hë angeic a tro cas. 5 Ngo e traqa jë la hlue qaja ielene ka hape, ‘hnime catre ni la masetang, me föeng, me ha neköng,* nge tha ajange kö troa tro,’ 6 tro hë la maseta i angeic a tro sai angeic kowe la nyipi Akötresie, me tro sai angeic ezine la qëhnelö, hmekune la hune qëhnelö, me kuje la hnangenyë i angeic hnene la nyine kuj, nge tro hë angeic a nyihluene la maseta i angeic uti hë mec.

7 “Nge e tro la ketre trahmanyi a salemëne la nekö i angeice jajiny troa hlu, tha tro kö a nue nyën tune la hna kuca kowe la itre hlue trahmany. 8 Nge maine tha hnimi nyëne kö hnene la maseta, nge maine xele kö angeic troa xomi nyën nyine ketre föe, nge maine tro la maseta a salemë nyëne koi ketre,* tha tro kö la maseta a salemë nyën kowe la itre trenyiwa, ke hnene la maseta hna mele thoi koi nyën. 9 Nge maine tro la maseta a xomi nyën nyine föene la nekö i angeice trahmany, tro la maseta a xomi nyën ceitu me sipu nekö i angeice jajiny. 10 Nge maine tro angeic a xome la ketre föe, tha tro kö angeic a acone la xen, me iheetr, me hnëqa ne trefën kowe la pane föe. 11 Nge maine tha kuca kö angeice la köni ewekë cili koi nyën, tro hë nyëne lai a tro, nge pëkö nyine nyithupen.

12 “Ame la atre lepe humuthe la ketre atr, tro fe a hane humuthi angeic. 13 Ngo maine tha hnei angeice kö hna thë, nge hnei Akötresie hna nue la ewekë cili, tro ni a amamai eö la götrane tro angeic a kötre zae. 14 Nge maine tro la ketre trahmany a elëhni kowe la atre lapa ezi angeic, me thë troa humuthi angeic, tro ha humuthe la atre cili, ngacama angeic a kötre zae ngöne la ita ne huujeng. 15 Ame la atre lepi keme me thin, tro ha humuthi angeic.

16 “Maine tro la ketre atr a kötre fë me salemëne la ketre atr, nge e öhne jë thei angeice la ketre atr hna atrekënö, tro ha humuthi angeic.

17 “Ame la atre ejine la keme me thine i angeic, tro ha humuthi angeic.

18 “Hane hi la nyine troa kuca e traqa jë isi la lue trahmany, maine tro la ketre a tranyi ketre hnei etë maine jeng,* nge tha meci kö angeic, ngo kolo hi a lapa fë eatr: 19 Nge maine atreine hi angeice cil me tro fë sine tö, tha tro kö a hetre pune kowe la ka isi. Ngo tro hi a kuiëne la mani nyine nyihnan lo itre drai ne tha huliwa angeic, uti hë la troa loi hmaca la eatre i angeic.

20 “Nge maine tro la maseta a lepe la hlue i angeic trahmanyi maine föe hnei sine sinöe, nge kola mec la hlu hnene la hna lep,* tro ha të kowe la maseta. 21 Ngo maine mele pala kö nyën koi cas maine lue drai, tha tro kö a hë thupen kowe la maseta, ke hnene la maseta hna itö nyën.

22 “Nge maine tro la lue trahmany a isi, nge tro nyidro a tro pene la ketre föe ka upune, nge mala pi hi la upune, ngo tha meci* kö la nekönatr, tro hë la atrekë zön a kuiëne la mani hna athip hnene la atrekë föen. Nge tro hë angeic a nyithupen thenge la hna athip hnene la angetre amekötin. 23 Ngo e traqa jë meci la nekönatr, tro ha hamëne la mel nyine thupene la mel, 24 alamek thupene alamek, nge nyö thupene nyö, nge im thupene im, nge iwaca thupene iwaca, 25 hna dreuthe thupene la hna dreuth, nge eatr thupene la hna eatr, nge hna lep thupene la hna lep.

26 Nge maine tro la ketre trahmany a lepe la alameke ne la hlue i angeic, trahmanyi maine föe, nge e tro la hlue i angeic a timek, tro hë la maseta a nue la hlue i angeic troa tro, nyine thupene la alameke i angeic. 27 Nge maine tro angeic a axecien la inyö ne la hlue i angeic, trahmanyi maine föe, tro hë la maseta a nue la hlue i angeic nyine thupene lai inyö.

28 Nge maine tro la kau a jeng la ketre atr, trahmanyi maine föe, nge meci pi hi lai atr, tro ha humuthe la kau, nge tha tro kö a öni la mitren. Ngo tha tro kö a hetre pune ka ngazo kowe la atrekë sin. 29 Ngo maine ka majemine isi lai kau, nge ase hë thuemacane la atrekë sin, ngo tha thupëne kö angeic, nge e traqa jë la kau humuthe la ketre atr, trahmanyi maine föe, tro ha trane hnei etë lai kau, me humuthe la atrekë sin. 30 Nge maine hna athipi thupene mel* koi angeic, qa i angeic troa kuiën asë la hna amekötine koi angeic, nyine thupene mele i angeic. 31 Nge maine tro la öni a jeng la nekö trahmany, maine nekö jajiny, tro pala hi a trongëne la hna amekötine cili kowe la atrekë sin. 32 Nge maine tro la kau a jeng la hlu, trahmanyi maine föe, tro la atrekë sin a kuiëne la 30 lao sekel* kowe la maseta ne lai hlu, nge tro ha trane la kau hnei etë.

33 Nge maine tro la ketre atr a nue angangane la hnaop, maine si hnaop ngo tha thinge pe, nge tro la kau maine boliko a kei, 34 tro hë la atrekë hnaopen a nyithupen kowe la atrekë sin, nge ewekë i angeice pë hë lai öni ka mec. 35 E tro la kau ne la ketre atr a eatrëne la kau i ketre, nge tro ej a mec, tro hë la lue atr a salemëne la kau ka mel, me ce thawa la thupene lai kau, nge tro fe nyidroti a ce thawa la öni ka mec. 36 Ngo maine atre hë ka hape ka majemine ijei la ketre kau, ngo tha hna thupëne kö hnene la atrekë sin, tro hë angeic a kuië thupen, kau thupene kau, nge ewekë i angeice pë hë la öni ka mec.