Levitiko

3 “‘Maine tro angeic a tro fë huuj ne tingeting,* me xom ej qa ngöne la itre öni ka tru, trahmanyi maine föe, loi e tro angeic a tro fë koi Iehova la öni ka pë engazon. 2 Tro angeic a ati im hune la he ne la öni, nge troa humuth ej qëmekene la hnë lö ne la itat ne icasikeu; tro la itre atre huuj ene la itre nekö i Arona, a thathane* la madra ngöne la nöjei götrane la ita ne huuj. 3 Nge tro angeic a tro fë la itre igötranene la öni ne huuj ne tingeting, nyine huuj ne eë koi Iehova: ene la giris ka atuthe la itrenge xel, memin asë la giris ka fedr ngöne la itre xel, 4 memine la lue wene thulumat memine la giris ka atuth la lue wene thulumat. Nge ame hë la angeic a hule la lue wene thulumat, tro fe angeic a xome la igiris ka heetrëne la idre. 5 Hnëqa ne la itre nekö i Arona troa atë itre ej hune la itre huuj ne dreuth asë koi Iehova, me huhajin itre ej hune la ita ne huuj. Celë hi huuj ne eë ka pui loi koi Iehova.

6 “‘Nge maine hna xome la huuje i angeic qa ngöne la itre öni ka co, nyine huuje ne tingeting koi Iehova, loi e tro angeic a huujëne la ketre öni trahmanyi maine föe ka pë engazon. 7 Maine angeic a huujëne la neköi mamoe trahmanyi nyine huuj, loi e tro angeic a tro fë qëmekei Iehova. 8 Tro angeic a ati im hune la he ne la öni, me humuth ej qëmekene la itat ne icasikeu. Nge hnëqa ne la itre nekö i Arona troa thathane la madra ngöne la nöjei götrane ne la ita ne huuj. 9 Nge tro angeic a xom la igirisine la öni ne huuj ne tingeting, matre nyine huuj ne eë koi Iehova. Tro angeic a xometrij asë la igiris ka ej ngöne la pune la öni, ezine la hutrö ne lai öni, memine la igiris ka heetrëne la itrenge xel, lo giris ka fedr ngöne la itre ixel, 10 memine la lue wene thulumat, memine la giris ka atuthe la lue wene thulumat. Nge ame hë la angeic a hule la lue wene thulumat, tro fe angeic a xome la igiris ka heetrëne la idre. 11 Nge tro la atre huuj a huhajin itre ej hune la ita ne huuj nyine xen,* matre nyine huuj ne eë koi Iehova.

12 “‘Nge maine angeic a huujën la nani föe, hnëqa i angeic troa tro fë qëmekei Iehova. 13 Tro angeic a ati im hune la he ne la öni, me humuth ej qëmekene la itat ne icasikeu; hnëqa ne la itre nekö i Arona troa thathane la madra ngöne la nöjei götran ne la ita ne huuj. 14 Nge ame la hnei angeic hna troa tro fë nyine huuje ne eë koi Iehova, ke ene la igiris ka heetrëne la itrenge xel, lo giris ka fedr kowe la itre ixel, 15 memine la lue wene thulumat, memine la giris ka atuth la lue wene thulumat. Nge ame hë la angeic a hule la lue wene thulumat, tro fe angeic a xome la igiris ka heetrëne la idre. 16 Tro la atre huuj a huhajin itre ej hune la ita ne huuj nyine xen, matre nyine huuj ne eë ka pui loi koi Iehova. Nge ame asë hi la igiris, ke thatraqai Iehova.

17 “‘Hane hi la wathebo ka cile hut kowe la nöjei xötr atre i epun ka troa lapa ngöne la nöjei götran asë: tha tro kö epuni a öni la igiris me madra.’”