Itre Edromë
28 Kola kötre la itre atr ka ngazo ngo pëkö ka weje huzun,
Ngo ame la itre atr ka meköt, ke ka catr tune la liona.*
2 Ame la itre atrene la nöj a eni wathebo,* ke kola saze joxu lapaa,
Ngo jëne la ixatua ne la atr ka atreine waiewekë nge ka hetre atrehmekun, tro ha mus aqeanyi la nekö i joxu.*
3 Ame la atre pë ewekë ka atrekënö la itre ka co
Ke ceitu i angeic memine la mani ka theng asë la itre xen.
4 Ame la itre ka nuetrije la wathebo, ke angatr a qaja aloine la atr ka ngazo,
Ngo itre ka metrötrëne la wathebo a elëhni koi angatr.
5 Ame la itre atr ka ngazo, ke tha trotrohnine kö angatre la meköt,
Ngo trotrohnin asë hi hnene la itre ka thele Iehova.
6 Ka loi ju kö la atr ka pë ewekë nge ka mele nyipici
Hune la trenamo ka huliwa qenatrekënö.
7 Ame la nekön ka inamacan, ke ka metrötrëne la wathebo,
Ngo ame la ka ce tro lapaa me itre ka tru hna xen, ke ka ahmahmane la keme i angeic.
8 Ame la ka akökötrene la trengamo i angeic qa ngöne la hna huliwa qenatrekënö, me hën atrune la thupen
Ke angeic a xawan kowe la atre hnime la itre ka pë ewekë.
9 Ame la atr ka xele ma drenge la wathebo
Ke troa methinëne la thith i angeic.
10 Ame la atre ukune la itre ka meköt troa kuca la ngazo, ke tro angeic a kei hnine la hnaop hnei angeic hna sin,
Ngo ame la itre atr ka mele nyipici, tro angatr a kapa la loi.
11 Kola mekun hnene la trenamo laka, ka inamacan angeic,
Ngo öhne hnyawa hi la atr ka pë ewekë me ka atreine waiewekë, la pengöne la atre cili.
12 Ewekë ka mingöming la kola huun la itre atr ka meköt,
Ngo troa zae la itre atr e troa mus la itre atr ka ngazo.
13 Troa luzi la atre juetrëne la itre tria i angeic,
Ngo troa utipine la atre qajaqaja me nuetrij la aqane ujë i angeic.
14 Madrine la atr ka hmeke pala hi,*
Ngo ame la atre axetine la hni i angeic, ke tro hë angeic a kei kowe la akötr.
15 Tune la liona ka ho, memine la bea ka iwej
Celë hi pengöne la joxu ka ngazo, ka musi kow la nöj ka thatreine cil koi angeic.
16 Ame la he ne nöj ka thatreine waiewekë, ke angeic a huliwane menune la mus i angeic,
Ngo ame la ka xele ma kapa la thupen hna huliwa qenatrekënö, ke tro angeic a mel aqeany.
17 Ame la atre ihumuth, ke tro pala hi angeic a zae uti hë la angeic a mec.*
Pë pi kö ka troa xatua angeic.
18 Troa amelene la atr ka pë gelen,
Ngo troa aca tro kei la atre huliwa qenatrekënö.
19 Ame la atre eëny, ke troa tru hnei falawa i angeic,
Ngo ame la atre kuca la itre huliwa ka pë alien, ke tro angeic a mej hnei pë ewekë.
20 Nyimutre la itre manathith hna troa kapa hnene la atr ka mele nyipici,
Ngo thatreine kö troa pë engazon la atr ka ajan troa canga trenamo.
21 Tha ka loi kö troa ië hna hnim;
Ngo ijije hi tro la ketre atr a kuca la ngazo matre hetre sine falawa.
22 Ame la atre piin,* ke ka ajan troa canga trenamo,
Ngo thatre kö angeic ka hape, troa lepi angeic hnene la pë ewekë.
23 Tro hmaca kö a wangatrune la ka hamë eamo
Hune la atr ka qaja aloinyi ketre hnene la thinem ka thoi.
24 Ame la ka atrekënö la kem me thine i angeic me hape: “Pëkö engazon,”
Ke ceitu i angeic lai memine la atr* ka axulune la akötr.
25 Ame la atr ka pi hetreny, ke angeic a amejëne la iwesitrë,
Ngo ame la atre mejiune koi Iehova, ke troa lolo la mele i angeic.*
26 Ame la atr ka kei thenge la hni i angeic, ke ka hmo lai,
Ngo ame la atre huliwa inamacan, ke tro angeic a neëne la akötr.
27 Ame la atre ham kowe la ka pë ewekë, ke tha tro kö angeic a hane pë,
Ngo ame la atr ka thë troa tha öhnyi angatr, ke tro pë hë angeic a hnëjin.
28 Maine troa musi la itre atr ka ngazo, ke tro ha zae la nöjei atr,
Ngo maine troa patre la itre atr ka ngazo, ke tro ha mana la itre atr ka meköt.