Pane Tus Samuela
31 Hnei angetre Filisiti hna isi me angetre Isaraela. Nge hnene la itre soce i Isaraela hna ikötreny, ngo ala nyimu la itre hna humuth hune la wetre Gileboa. 2 Matre hnene la itre soce i angetre Filisiti hna weje huzu Saulo, me itre nekö i nyidrë. Nge angatr a ea ju la itre nekö i Saulo, me humuthi Ionathana, me Abinadab, me Malekisua. 3 Thupene lai, catrehnine hë la isi xötreithi Saulo, nge itre ka huji pehna a pehna* Saulo ju, nge ngazo catre la aqane eatre i nyidrë. 4 Matre Saulo a qaja ju kowe la atre ajö jia ne isi i nyidrë ka hape: “Uthe pi la taua i eö, nge thinyi ni ju, wanga axösisi ni menu* jë, me kuluhmathi ni hnene la itre atre celë, itre hna tha xötrehatren.”* Ngo xele kö nyën, ke xou nyën. Matre Saulo a uthe pi la taua i nyidrë, me kei hun ej. 5 Nge ame hë la kola öhne hnene lai ka ajö jia ne isi laka, meci hë Saulo, nyën a kei ju fe kowe la taua i nyën, nge meci ju fe hi nyën ezi Saulo. 6 Haawe, ngöne la drai cili, hnei Saulo hna ce mec me köni nekö i nyidrë, memine la hlue ka ajö jia ne isi, me nöjei atre ka isigöli nyidrë. 7 Matre ame hë la kola dreng hnei angetre Isaraela ka lapane la hnathup, me itre götran ezin e Ioridrano laka, kötre hë lo itre soc, nge meci hë Saulo me itre nekö i nyidrë, angatr a trotrije ju la itre traon, me ikötreny. Matre hnei angetre Filisiti hna traqa pë hë e thupen troa lapan.
8 Haawe, ngöne la drai thupen, lo angetre Filisiti a traqa troa thepe mo, öhne ju hi angatre la ngönetrei Saulo, me köni nekö i nyidrë hune la wetre Gileboa. 9 Angatr a thupa pi la he i Saulo, me thapa la itre jia ne isi i nyidrë. Thupene lai, angatr a upe pi la itre ka tro fë maca ngöne la nöje Filisiti, troa qaja trongën hnine la itre uma ne hmi ne la itre idrola i angatr, me kowe la nöje i angatr. 10 Thupene lai, angatr a amë ju la itre jia ne isi nyidrë hnine la uma ne hmi i Aseira, me athipe la ngönetrei i nyidrë hune la ihag atraqatr e Bethe-San. 11 Ngo ame hë la angetre Iabese-Gileada a dreng la hna kuca hnei angetre Filisiti koi Saulo, 12 hnene la itre atre ka catr hna tro ju ngöne la jidri ka pexej. Angatr a autine pi qa hune la ihag e Bethe-San, la ngönetrei Saulo me itre nekö i nyidrë. Nge angatr a bëeke fë jë a tro Iabese me dreuth. 13 Thupene lai, angatr a xome pi la itre trepe jun me kelem e Iabese, fene lo itamaris, me tha xeni koi 7 lao drai.