Hnaaluene Tus i Samuela
2 Thupene lai, Dravita a hnyingë Iehova jë ka hape: “Tro kö ni a lapa e Iudra?” Sa jë hi Iehova ka hape: “Öö.” Nge öni Dravita: “Götran ekaa e Iudra?” Matre öni Akötresie: “E Heberona.” 2 Haawe, Dravita a tro ju a tro Heberona me lue föi angeic, Ahinoam qa Iezerela, me Abigaila lo hna mecitrij hnei Nabala, atre Karemela. 3 Dravita a tro ju me itre soc ka ce me angeic, angatr me isa fami i angatr. Angatr a lapa ju ngöne la itre traon xötreith e Heberona. 4 Nge hnene la itre atre Iudra hna tro Heberona, me ië Dravita troa joxu ne la tribu i angatr.
Matre önine la ketre atr koi Dravita: “Itre atr ka catr qa Iabese-Gileada la ka kelemi Saulo.” 5 Ame hnei Dravita hna upe pi la itre ka tro fë maca kowe la itre atr ka catr e Iabese-Gileada. Öni angeic: “Epi tro Iehova a amanathithi epun, ke mama hi la ihnimi nyipici epuni koi Saulo joxu, lo epuni a kelemi nyidrë. 6 Nge epi tro Iehova a hnimi epun, me nyipici koi epun. Nge tro fe ni a hane loi hni koi epun, ke hnei epuni hna ujë tune lai. 7 Haawe enehila, catre pi nge huliwa catre jë. Nyipici, meci hë Saulo joxu i epun, ngo ase hë ië ni hnene la tribu ne Iudra troa joxu.”
8 Hnei Abinera, nekö i Neri me tan la itre soc i Saulo, hna tro sai Ieseboseth nekö i Saulo, a tro Mahanaima ngöne la ketre götrane la hneopegejë. 9 Nge angeic a acili Iesebosethe jë troa joxu e Gileada, me kowe la angetre Asuri, me Iezerela, me Eferaima, me Beniamina, me Isaraela asë. 10 Ka 40 lao macatre i Ieseboseth lo angeic a joxu ne Isaraela. Nge hnei angeic hna joxu koi lue macatre. Ngo ame lo tribu ne Iudra, eje kö a nyipici koi Dravita. 11 Hnei Dravita hna musi qa Heberona kowe la tribu ne Iudra, koi 7 lao macatre nge 6 lao treu.
12 E thupen, hnei Abinera nekö i Neri, me itre soce i Ieseboseth nekö i Saulo, hna tro qa Mahanaima, a tro Gibeona. 13 Ame hnei Ioaba nekö i Zeruia, me itre soce i Dravita hna hane tro. Nge hnene la lue trongene isi hna ixelë ezine la hnaop gaa hetre tim e Gibeona. Nge nyidroti a iqëmekekeu, me cil ngöne la lue pala ne lai hnaop. 14 Ame hnei Abinera hna qaja koi Ioaba ka hape: “Loi e tro la itre thupëtresij a itrony me isi* qëmeke i nyiso.” Sa jë hi Ioaba ka hape: “Öi, trohemi hö.” 15 Angatr a tro ju, nge kola e ngöne la trongene isi i Ieseboseth nekö i Saulo, la ala 12 qaathene la lapa i Beniamina, nge 12 qaathene la itre soce i Dravita. 16 Nge hnene la itre soc hna isa ea la he ne la itre ithupëjia me angatr, me thine la wengesisila, matre meci asë hi angatr. Celë hi matre hëne jë la götrane cili e Gibeona ka hape, Helekath-Huzurim.
17 Matre kola ha ngazo catre la isi ngöne la drai cili. Hna ngaa Abinera me itre soce i Isaraela hnei itre soce i Dravita. 18 Nge Ioaba fe e cili, me Abisai me Asael, köni nekö i Zeruia. Nge ame Asael, ka nyinyape catr angeic, kösë drube* ne hnitr. 19 Angeic a huzu Abinera jë, nge tha jea pi kö angeic ngöne la götrane maca me mi. 20 Thupene lai, Abinera a tha ujë me hape: “Asael eö hi?” Sa jë hi Asael ka hape: “Eni hi.” 21 Matre öni Abinera: “Jea ju ngöne la götrane maca maine mi, nge xolouthe ju la ketre thupëtresij, nge thapa pi la itre ewekë i angeic.” Ngo xele kö Asael ma nue Abinera. 22 Öni Abinera hmaca: “Loi ju hë hna weji ni, wanga tro na humuthi eö. Nge tro hë ni a goeë Ioaba tune kaa mama i eö?” 23 Ngo xele pala hi Asael ma dreng, matre Abinera a hna ju la pune jo i angeic kowe la hni i Asael, uti hë la kola fetra ngöne la ju. Haawe, kei ju hi Asael e cili a mec. Nge ame la nöjei atr ka cili thenge, angatr a pane cile ju.
24 Ame hnei Ioaba me Abisai hna huzu Abinera. Nge ame hë la kola lö la jö, traqa ju hi angatr ngöne la sasala ne Ama qëmekene Gia, ngöne la gojenyi ne tro kowe la hnapapa e Gibeona. 25 Nge e cili, hnene la angetre Beniamina hna cile kösë ca xötre soc hutrö i Abinera, nge angatr e hune la sasala. 26 Ame hnei Abinera hna hë Ioaba me hape: “Tro la taua a ihumuth uti hë eu? Thatre kö eö ka hape, tro pala hi lai a xulu fë akötr? Eö a treqe nemen, matre troa acilëne la itre soce i eö troa huzune la itre trejin me angatr?” 27 Sa jë hi Ioaba ka hape: “Qëmekene la nyipi Akötresie ka mel, maine tha ewekë ju eö, tro hë la itre soceng a huzune la itre trejin me angatr, uti hë e hmakany.” 28 Thupene lai, Ioaba a ufe jë la trutru, nge tha huzu Isaraela ju hi hnei itre soce i angeic, nge pë pi hi isi.
29 Ame hnei Abinera me itre soce i angeic, hna trongëne la Araba ngöne la jidri ka pexej, nge angatr a sasaithe ju la Ioridrano, me elëne la hnathup, nge angatr a traqa ju e Mahanaima. 30 Nge hnei Ioaba, lo ka cile troa huzu Abinera, hna acasine la itre soce i Dravita. Nge ala 19 la ka patr, me Asael. 31 Ngo hnene la itre soce i Dravita hna ngaane la angetre Beniamina, me itre soce i Abinera. Ala 360 la hnei angatre hna humuth. 32 Angatr a xome ju la ngönetrei i Asael a tro Bethelema, me kelem ngöne la hua ne la keme i angeic. Thupene lai, hnei Ioaba me itre soce i angeic hna tro, jidri ka pexej, nge e kaqa ne lai, angatr a traqa ju e Heberona.