Hnaaluene Tus i Samuela
7 Lö hë Dravita ngöne la uma atraqatr i nyidrë, nge tingetinge hë Dravita jëne Iehova, ke nyidrëti a amele Dravita qaathene la itre ithupëjia xötreith. 2 Ame hnei Dravita joxu hna qaja koi Nathana perofeta, ka hape: “Eni a lapa hnine la uma* hna kuca hnei sinöe aseri, ngo ame la Pua ne la nyipi Akötresie, ej pe hi fene la uma maano.” 3 Sa jë hi Nathana ka hape: “Kuca jë la aja i nyipë, ke ce Iehova me nyipë.”
4 Ngo ngöne la jidri cili, öni Iehova koi Nathana ka hape: 5 “Tro jë a qaja koi Dravita hlueng ka hape, ‘Hane hi la hna qaja hnei Iehova: “Hnauëne la eö a troa xupi uma nyine tro ni a lapan? 6 Ke qaane lo eni a thepe angetre Isaraela qa Aigupito, nge uti hë enehila, tha hnenge kö hna lapa hnine la ketre uma, ngo hnenge pala hi hna feke* trootro, me lapa hnine itat, me uma maano. 7 Nge ngöne lo ijine eni a ce tro me Isaraela,* hnenge kö hna qaja kowe la ketre tan hnenge hna acil hui Isaraela ka hape, ‘Hnauëne laka tha xupe kö eö la ketre uma aseri koi ni?’”’ 8 Haawe, tro jë eö a qaja koi Dravita hlueng ka hape, ‘Hane hi la hna qaja hnei Iehova, joxu ne la itre trongene isi e hnengödrai: “Eni la ka xomi eö qa ngöne la itre hlapa hnei eö hna thupë mamoe, matre acili eö troa joxu ne Isaraela nöjeng. 9 Nge tro pala hi ni a ce me eö ngöne la nöjei jë i eö, nge tro ni a apatrene la nöjei ithupëjia me eö, me ahlemune la ëje i eö, tune lo ëjene la itre xa atre ka tru ne la fen. 10 Tro ni a hamë götran kowe la nöjeng Isaraela, tro ej a mele tingeting e cili, nge pëkö ka troa ajolëne la nöjeng. Tha tro hmaca kö la itre atre ka ngazo a qanangazone la nöjeng, tune lo hnei angatr hna majemin, 11 qaane lo eni a acile la itre atre iameköti hune la nöjeng Isaraela. Tro ni a thue tingetinge i eö, me amele eö qaathene la nöjei ithupëjia me eö.
“‘“Nge ame ni Iehova, ase hë ni qaja koi ö ka hape, tro Iehova a xomi ö nyine trepene la ketre xötre joxu. 12 Nge e traqa ha la ijine tro eö a mec, me tro kowe la itre qaaqaa i ö, tro hë ni a acili joxun la matra* i ö, ene la sipu nekö i ö.* Nge tro ni a acatrene la baselaia i angeic. 13 Angeice hi la ka troa xupe la uma kowe la ëjeng, nge tro ni a acatrene la musi angeic uti hë epin. 14 Nge tro ni a keme i angeic, nge tro angeic a neköng. Nge e traqa jë angeic kuca la ngazo, tro ni a wesitrë angeic, me lepi angeic, tune la aqane kuca ne la itre atr.* 15 Tha tro kö ni a nuaxöji angeic, tune lo aqane kuca ni koi Saulo, lo hnenge hna apatren qëmeke i ö. 16 Tha tro kö a patre la itre xötre joxu* me musi angatr qaathene la fami ö. Nge tro la musi* ö a cile hut epine palua.”’”
17 Ame hnei Nathana hna tro fë koi Dravita la itre trengewekë celë, me itre hnei angeic hna meköle goeën.
18 Ame hnei Dravita joxu hna mejë, me lapa e kuhu hnadro qëmeke i Iehova, nge öni nyidrë: “Iehova fe, Joxu Ka Sisitria, drei ni, nge drei la faming matre kapa la itre hnei nyipëti hna kuca koi ni uti hë enehila? 19 Nge ka tune lo tha ijije kö, nyipëti fe a qaja ka hape, tro la faming* a cil uti hë epine palua; nge Iehova fe, Joxu Ka Sisitria, ewekë lai hna amekötine* thatraqane la nöjei atr asë. 20 Nge Iehova fe, Joxu Ka Sisitria, tro hmaca kö ni a qeje nemen, eni Dravita hlue i nyipë, nge atre ni hnyawa hi hnei nyipë? 21 Pine la hlue i nyipë, nge pine laka, aja i nyipëti kö lai, hnei nyipëti hna kuca la itre ewekë nyine haine celë, nge hnei nyipëti hna qejepengöne kowe la hlue i nyipë. 22 Celë hi matre, draië catre kö nyipë Iehova, Joxu Ka Sisitria. Pëkö ka tui nyipë, nge pëkö xa Akötresie, ngo nyipëti hi. Kola anyipicine lai hnene la nöjei ewekë hne huni hna dreng. 23 Nge hune la ihnadro, drei la nöj ka tune la nöje i nyipë Isaraela? Akötresieti fe, hnei nyipëti hna itöne la nöje ce, troa nöje i nyipë. Hlemu hë la ëje i nyipë, ke hnei nyipë hna kuca la itre huliwa ka tru nge nyine hain, thatraqane la nöje i nyipë. Hnei nyipëti hna helëne la itre nöj, me haze i angatr pine la nöje i nyipë, lo hnei nyipëti hna itön thatraqai nyipëti qa Aigupito. 24 Hnei nyipëti hna ië Isaraela troa nöje i nyipë uti hë epin. Nge Iehova, nyipëti hë la Akötresi angatr.
25 “Nge enehila Iehova Akötresie, epi troa ej epine palua la hnei nyipëti hna sisiny kowe la hlue i nyipë, me fami* angeic. Nge epi tro nyipë a aeatrëne la hnei nyipëti hna sisiny. 26 Nge epi troa atrun epine palua la ëje i nyipë, nge epi tro la itre atr a qaja ka hape, ‘Iehova, joxu ne la itre trongene isi e hnengödrai, la Akötresi Isaraela!’ Nge epi tro la xötre joxu* i Dravita hlue i nyipë a cile hut qëmeke i nyipë. 27 Ke nyipëti hi Iehova, joxu ne la itre trongene isi e hnengödrai, la Akötresi Isaraela, ka qaja kowe la hlue i nyipë ka hape, ‘Tro ni a xomi eö nyine trepene la ketre xötre joxu.’* Celë hi matre ka mejiune* ni troa hamëne la thithi celë koi nyipë. 28 Haawe, Iehova Joxu Ka Sisitria, nyipëti hi la nyipi Akötresie, nge ka nyipici pala hi la hnei nyipëti hna qaja, nge hnei nyipëti hna sisinyi fë la itre ewekë ka lolo kowe la hlue i nyipë. 29 Nge enehila, epi madrine nyipë troa amanathithine la fami* ne la hlue i nyipë. Nge epi tro pala hi ej a mel uti hë epine palua qëmeke i nyipë, ke Iehova Joxu Ka Sisitria, nyipëti kö la ka sisiny. Nge epi tro pala hi nyipëti a amanathithine la faming.”*