Hnaaluene Tus i Samuela
9 Ngöne la ketre drai öni Dravita: “Hetre ka mele pala kö ngöne la fami i Saulo? Ke hnenge lo hna sisinyi koi Ionathana troa amamane la ihnimi nyipicing kowe la itre matra i angeic.” 2 Nge hetre hlu ne la fami Saulo ekö, Ziba la ëjen. Matre hna hë angeice koi Dravita, nge öni Dravita: “Ziba eö?” Öni angeice ka hape: “Joxung, eni hi.” 3 Matre önine la joxu: “Hetre ka mele pala kö ngöne la fami Saulo, matre tro ni a amamane la ihnimi nyipici tui Akötresie?” Haawe, sa jë hi Ziba ka hape: “Hetre nekö i Ionathana pala kö, nge ka peje* la lue ca i angeic.” 4 Ame hnei joxu hna hnyinge ka hape: “Ekaa angeic?” Öni Ziba: “Thei Makiri, nekö i Amiela e Lodeba.”
5 Dravita joxu a canga iupi jë troa hë angeic qaathei Makiri, nekö i Amiela e Lodeba. 6 Matre ame hë la Mefiboseth, lo nekö i Ionathana, nekö i Saulo a öhnyi Dravita, canga sa iwatingöneca pi hi angeic me thil. Nge öni Dravita: “Mefiboseth!” Sa jë hi angeice ka hape: “Eni hi, hlue i nyipë joxung.” 7 Dravita a thuecatre jë koi angeic me hape: “The xou kö, ke tro ni a amamane la ihnimi nyipicinge koi eö, tune lo hnenge hna sisiny koi Ionathana keme i eö. Tro hmaca ni a hamë eö lo itre hnepadro i Saulo qaaqaa i eö. Nge ketre, tro fe eö a xeni* e nöjei drai ngöne la laulaung.”
8 Mefiboseth a sa iwatingöneca hmaca pi me hape: “Drei ni matre tro nyipëti a nyipiewekën,* nge kuli ka meci ni?” 9 Ame hnei joxu hna hë Ziba, lo hlue i Saulo, me hape: “Ame asë hi la itre ewekë i Saulo me fami nyidrë, eni a hamën kowe la api ne la maseta i eö. 10 Nge ame eö, me ha nekö i eö, me itre hlue i eö, tro epuni a eëny koi Mefiboseth, nge tro epuni a hlem acone la hna menuën, matre thuane la fami ne la api ne la maseta i eö. Ngo ame Mefiboseth, api ne la maseta i eö, tro angeic a xeni ngöne la laulaung e nöjei drai.”
Nge ame Ziba, ala 15 lao nekö i angeic trahmany, nge ala 20 lao hlue i angeic. 11 Matre öni Ziba koi Dravita ka hape: “Joxunge fe, eni a drei nyipë. Ame asë hi la hnei nyipëti hna qaja, tro ni a kuca.” Nge qaane ju hi lai, Mefiboseth a xeni ju ngöne la laulau i Dravita,* kösë ketre nekö i joxu. 12 Nge hetre nekö i Mefiboseth ka co, Mika la ëjen. Nge ame la nöjei atr ka lapa ngöne la uma i Ziba, itre hlue i Mefiboseth asë hi angatr. 13 Nge Mefiboseth a lapa e Ierusalema, ke angeic a xeni e nöjei drai ngöne la laulau i joxu. Nge ka peje la lue ca i angeic.