Deuteronomi

19 “E ase hë Iehova Akötresi ö apatrene la itre nöj hnei Iehova Akötresi ö hna troa hamëne koi ö, nge e ase hë eö thapa la nöje i angatr, me lapane la itre traone i angatr, me itre uma i angatr, 2 qa i ö troa hnëkën amë la köni traon nyipine la nöj hnei Iehova Akötresi ö hna troa hamën nyine edrö i ö. 3 Tro eö a thawa la nöj hnei Iehova Akötresi ö hna troa hamën nyine edrö i ö koi köni götran, nge tro eö a hnëkë gojeny matre tro la ka humu atr a kötr kowe la ketre traon cili.

4 “Ngo hane hi la ka aijijëne la atre ihumuth troa kötre mel e cili: e tha ase kö angeice thë troa eatrën la atre lapa ezi angeic, nge pëkö imethinë i angeic kowe la atre cili. 5 Ka tune la angeic a ce tro memine la atre lapa ezi angeic troa nyi sinöe ngöne la hnaxulu, nge angeic a hna la ze troa sa sinöe, ngazo pe, feke pi hi lai ze qa ngöne la tan, troa lepe humuthe la atre lapa ezi angeic. E cili, ijije tro angeic a kötre kowe la ketre traon matre mel, 6 wanga tro la atre ti madra a elëhni, me weje me humuthi angeic, ke nanyi pala ha la traon. Ame pe, tha meköti kö e tro angeic a mec, ke pëkö imethinë i angeice kowe lo atre lapa ezi angeic. 7 Celë hi kepin matre eni a upi ö ka hape: ‘Hnëkën amë jë la köni traon.’

8 “Maine tro Iehova Akötresi ö a atrune la zi i ö, tune lo hnei nyidrëti hna sisinyi kowe la itre qaaqaa i ö, me hamën asë koi ö la nöj hnei nyidrëti hna sisinyi kowe la itre qaaqaa i ö, 9 —e tro eö a thupëne hnyawa la hnenge hna amekötin koi ö ngöne la drai ce, ene la troa hnimi Iehova Akötresi ö, me trongëne pala hi la itre jë i nyidrë—tro hmaca eö a nyixane lo köni pane traon hnene la köni xan. 10 Matre tha tro kö a anenine la madra ne la atr ka pë engazon ngöne la nöj hnei Iehova Akötresi ö hna troa hamën nyine edrö i ö, nge tha tro kö a upezö eö la kola humu atr.

11 “Ngo maine hnene la ketre atr hna methinëne la atre lapa ezi angeic, me mekun troa lepe humuth la atre cili, nge meci pi hi lai atr, nge hnei angeice pë hë hna kötr kowe la ketre traon ne kötre mel, 12 qa ne la itre qatre thup ne la traone i angeic troa upe la ketre atr troa thei angeic, me nue angeic kowe la atre ti madra, matre troa humuthi angeic. 13 Tha tro kö eö a utipi angeic, ngo qa i ö pe troa apatren la ngazo qa Isaraela, ke hna anenine la madra ne la atr ka pë engazon. Qa ngöne lai, tro ha tro loi la mele i ö.

14 “Ame hë la eö a kapa la edrö i ö ngöne la nöj hnei Iehova Akötresi ö hna troa hamën nyine zi i ö, tha tro kö eö a ahuëne la itre ifego ne la atre lapa ezi ö, hna acil ekö hnene la itre qaaqaa i epun.

15 “Tha tro kö a upezöne* la ketre atr, e casi hi la temoë ka qajaqaja la tria maine ngazo hna kuca. Ngo tro ha jele nyipicin e hna acatren* hnene la luetre maine köni temoë. 16 Maine tro pena la ketre temoë ka iangazo a utisane la ketre me upezö angeic, 17 tro hë la lue ka iwesitrë a cil qëmekei Iehova, me qëmekene la itre atre huuj, me itre atre iameköti hna acil ngöne la ijine cili. 18 Thupene lai, tro hë la itre atre iameköti a ithele hnyawa. Nge maine ka thoi la temoë cili, nge hnei angeic hna utisane menun la trejin me angeic, 19 qa i ö troa kuca koi angeic tune lo hnei angeic hna mekun troa kuca kowe la trejin me angeic. Nyipiewekë tro eö a apatrene la ngazo qaathei ö. 20 Nge tro hë la itre xan a drei mejene me xou, matre pë hmaca kö ka troa kuca la ngazo cili. 21 Tha tro pi kö eö* a hetre utipin, ke mel hnane la mel, alamek hnane la alamek, nyiö hnane la nyiö, im hnane la im, nge iwaca hnane la iwaca.