Hnaaluene Tus i Samuela
16 Dravita petre hi a ase sasaithe la hune wetr, nge traqa ju hi angeic a öhnyi Ziba, hlue i Mefiboseth. Ziba a traqa fë la lue boliko ka thue la 200 lao falawa, me 100 lao gato vin* ka qaqacil, me 100 lao gato wacua me wene pama, me ca trengene waina ka tru. 2 Dravita a hnyinge jë koi Ziba ka hape: “Hnauëne la eö a traqa fë la itre ewekë celë?” Sa jë hi Ziba ka hape: “Joxu, eni a traqa fë boliko matre troa tithe hnene la fami i nyipë. Nge eni fe a traqa fë falawa, me gato hna kuca hnei wene sinöe, kowe la itre thupëtresij. Nge ame la waina, tre göi itre ka kucakuca ngöne la gaa qaqacil.” 3 Nge öni Dravita jë hi: “Nge ekaa pë hë Mefiboseth, nekö* ne la maseta i eö?” Sa jë hi Ziba ka hape: “Nyidrëti pë hë e Ierusalema, ke öni nyidrë, ‘Ijine tro hë angetre Isaraela a hamë ni la musi kaka.’” 4 Matre öni Dravita koi Ziba ka hape: “Haawe, nga ewekë i eö pë hë la nöjei ewekë i Mefiboseth.” Nge öni Ziba: “Eni a ipië qëmeke i nyipë joxu, oleti la hna kepe ni.”
5 Nge ame hë la Dravita joxu a traqa e Bahurim, hnene la ketre trahmany ne la fami i Saulo hna traqa koi Dravita, me eji nyidrë. Simei la ëjen, nge nekö i Gera. 6 Angeic a hlothi Dravita me itre ka huliwa koi joxu, me itre sinatronge i joxu, me itre soc ngöne la götrane maca me mi i Dravita. 7 Simei a ejin la joxu me hape: “Tro pi, tro pi eö atre ihumuth, pë hnënyöngön! 8 Iehova hi lai a nyithupene koi eö, ke hnei eö hna humuthe la fami i Saulo, nge hnei eö hna thapa la musi nyidrë. Hane hi lai kepin, matre Iehova a acili Abasaloma nekö i eö troa joxu. Enehila, kola traqa itrai koi eö la itre akötr, ke atre ihumuthi eö!”
9 Ame hnei Abisai nekö i Zeruia hna qaja koi joxu ka hape: “Kola ejine fë nemen la joxunge hnene la kuli ka mec? Nue ni pi troa sa la he i angeic.” 10 Nge önine la joxu: “A kolo pena a uë epun itre nekö i Zeruia? Nue angeice pi troa eji ni. E Iehova la ka upi angeic troa eji ni, tro drei a qaja?” 11 Thupene lai, öni Dravita koi Abisai me itre xa ka huliwa i joxu: “Sipu neköng la ka thele troa humuthi ni, nga the qaja pala ha la atre Beniamina! Nue angeice pi, meköti e tro angeic a eji ni, e Iehova la ka upi angeic! 12 Maine jë, tro Iehova a öhne la akötreng. Enehila kola ejine catrë ni, ngo maine jë, tro kö Iehova a amanathithi ni.” 13 Ame hnei Dravita me itre atre i angeic hna xome hmaca la gojeny, nge Simei a ixötrethenge, me tro ngöne la gaa utiut ne la wetr. Nge Simei pala hi a eji Dravita, me hlothi nyidrë hnei etë me dro.
14 Thupene lai, hnene la joxu me itre sinatronge i nyidrë hna traqa, nge kucakuca catr angatr, matre angatr a pane mano ju.
15 Ngöne la ijine cili, ce Abasaloma me itre sinexöle i angeic e Ierusalema. Ce angeice fe me Ahitofela. 16 Ame hnei Husai atre Areki, nge sinee* i Dravita hna lö koi Abasaloma me hape: “Epi manathithi la joxu! Epi manathithi la joxu!” 17 Abasaloma a hnyinge jë ka hape: “Aqane nyipici i eö hi lai kowe la sinee i eö? Hnauëne laka, tha ce eö kö me nyidrë?” 18 Ngo öni Husai: “Ame ni, eni a nyixölene la atre hna iën hnei Iehova, me atre hna iën hnene la itre atre celë, me nöjei trahmanyi ne Isaraela. Tro kö ni a lapa memine la atre cili. 19 Ke hapeu, tha nyipëti kö la neköne la sineeng? Tha tro kö ni a huliwa koi nyipë? Haawe, tune lo aqane huliwa ni kowe la keme i nyipë, tro fe ni a huliwa tun koi nyipë.”
20 E thupen, öni Abasaloma koi Ahitofela: “Matre tro sa u? Nemene la eamo i eö?” 21 Öni Ahitofela ka hape: “Ce meköle jë memine la itre xa föe ne la keme i nyipë, lo itre ka lapa troa thupën la uma i joxu. Nge e öhne jë Isaraela asë ka hape, sisi hë nyipë kowe la keme i nyipë, tro hë la itre ka nyixöle i nyipëti a catr.” 22 Qa ngöne lai, hna acile la ketre itat ngöne la hune uma, nge Abasaloma a ce meköle ju me itre xa föe ne la keme i angeic, qëmekei Isaraela asë.
23 Ngöne la ijine cili, ame la Ahitofela a ithanata, kola drei angeic, kösë* eamo qaathene la nyipi Akötresie. Celë hi aqane waipengön Abasaloma me Dravita la itre eamo i Ahitofela.