Hnaaluene Tus i Samuela
19 E thupen, hna qaja koi Ioaba ka hape: “Kola treij hnei joxu, me hnëmeci Abasaloma.” 2 Matre ame hë la itre soc a drenge laka, joxu a treije pine la nekö i nyidrë ka mec, saze pi hi la drai ne madrine* troa drai ne hnëmec, kowe la trongene isi asë. 3 Ame hnei angatre hna bëeke thaup kowe la traon, tune la itre trahmanyi ka hmahma, ke hna kötr qëmekene la ithupëjia. 4 Nge hnene la joxu hna thunge la ialameke i nyidrë, me treij, me sue ka hape: “Abasaloma neköng! Abasaloma neköng! neköng!”
5 Ame hnei Ioaba hna lö hnine la uma hna lapa hnei joxu, nge öni angeic: “Enehila, hnei nyipëti hna ahmahmane la itre soce i nyipëti asë. Ngo hnei angatre pe hna amele nyipë, me itre nekö i nyipë trahmanyi me jajiny, me itre nyipi föi nyipë, me itre xa föi nyipë. 6 Nyipëti a hnime la itre ka methinë nyipë, me methinëne la itre ka hnimi nyipë. Ase hë nyipëti amaman enehila ka hape, pëkö pengöne koi nyipë la itre tane soc i nyipë, me trongene isi i nyipë. Ke atre hi ni laka, aja i nyipë tro Abasaloma a mel, nge tro huni asë a mec. 7 Matre enehila, cile jë nge tro jë troa akeukawane* la itre soce i nyipë. Ke e tha kuca kö nyipë, eni a sisinyi qëmeke i Iehova laka, ngöne la drai ce, pë hmaca kö ala casi ka troa ce xöle me nyipë. Nge tro kö lai a ngazo catr, hune la nöjei itupath hnei nyipëti hna melën qaane lo nyipëti a co.” 8 Ame hnei joxu hna tro ju troa lapa ngöne la qëhnelö ne la traon, nge hna thuemacanyine la nöjei soc ka hape: “Lapa ha joxu ngöne la qëhnelö ne la traon.” Nge angatr a isa tro ju troa cil qëmeke i joxu.
Ngo ame la munëne la angetre Isaraela, hnei angatre hna kötr me bëeke koi isa hnalapan. 9 Nge ngöne la nöjei tribu ne Isaraela kola iwesitrë me hape: “Hnei Dravita joxu hna thepe së qaathene la itre ithupëjia, hnei nyidrëti hna amele së qaathene la angetre Filisiti. Ngo enehila, nyidrëti a trotrije la nöj pi Abasaloma. 10 Ngo ame lo Abasaloma hne huni hna acile troa joxu, meci hë angeic ngöne la isi. Matre nemene la ka ajolë epuni troa abëekë Dravita joxu?”
11 Hnei Dravita joxu hna iupi fë maca koi Zadoka me Abiathara, lo lue atre huuj. Öni nyidrë: “Qaja ju kowe la itre qatr ne Iudra ka hape, ‘Hnauëne laka, epuni a hmitr troa bëeke sai joxu, nge traqa ha e celë thei joxu la trenge ithanata i Isaraela asë? 12 Itre trejin easë, nge casi hi la madra së, matre hnauëne la epuni a uthe la ijine troa bëeke fë la joxu i epun?’ 13 Nge tro fe epon a qaja koi Amasa ka hape: ‘Tha casi kö la madra i nyiso? Loi e tro Akötresie a të la ngazo koi ni, e tha acili eö kö ni troa tane la trongene ising, me nyihna i Ioaba enehila.’”
14 Hane hi la aqane ahmalane Dravita la hni ne la nöjei trahmanyi ne Iudra. Matre hnei angatr hna ce axeciën troa iupi fë la maca celë koi Dravita: “Bëeke jë nyipë me nöjei atre i nyipë.”
15 Nge hnene la joxu hna xötrëne hmaca la gojenyi ne bëek kowe la Ioridrano. Nge ame la itre atre Iudra, angatr a tro ju a tro Gilegala troa ixelë me joxu, matre ce sasaithe me nyidrë la Ioridrano. 16 Ame hnei Simei nekö i Gera, atre Beniamina qa Bahurim, hna canga uti troa ixelë me Dravita joxu, me itre atre Iudra. 17 Ce Simei me 1 000 lao atre Beniamina. Nge hnei Ziba fe, lo hlue i Saulo, me 15 lao nekö i angeic trahmany, me 20 lao hlu, hna canga nyimenyime uti kowe la Ioridrano troa ixelë me joxu. 18 Angeic* a sasaithe jë la gaa tëtë ne la Ioridrano, matre xatuane la fami i joxu troa sasaithe la hneopegejë. Nge angeic a treqene ju troa upi angeic hnei joxu. Matre ame ju hi la joxu a troa sasaithe la Ioridrano, Simei nekö i Gera a sa iwatingöneca pi qëmeke i nyidrë. 19 Nge öni angeic: “Joxu fe, the upezö ni kö, nge the lapa fë kö lo ngazo hnenge hna kuca koi nyipë, lo nyipëti a tro qa Ierusalema. The wangatrune kö la ngazong, 20 ke atre hi ni laka, ka ngazo la hnenge hna kuca. Celë hi matre, enehila, eni la pane atrene la hnalapa i Iosefa, ka uti troa ixelë me nyipë joxung.”
21 Ame hnei Abisai, nekö i Zeruia hna qaja ka hape: “Tha nyine humuthe kö lae Simei? Hnei angeic hna ejine la atre hna iën hnei Iehova.” 22 Nge öni Dravita: “A kolo pena a uë epun itre nekö i Zeruia? Hnauëne la epuni a cil kowe la mekunang? Ame la drai ka tun enehila, pëkö ala cas hna troa humuth e Isaraela. Nge ame la mekuna i epun ka hape, thatre kö ni laka, joxu hmaca ha ni e Isaraela?” 23 Nge önine la joxu koi Simei: “Tha tro kö eö a mec.” Nge joxu a sisinyi ju.
24 Nge hnei Mefiboseth, api Saulo, hna hane fe traqa troa kepe joxu. Ngo qaane lo joxu a tro, uti hë la kola bëek memine la tingeting, tha kuca hnyawane kö Mefiboseth la lue waca i angeic, me xöj acone la ienaje i angeic, me wasine la itre iheetre i angeic. 25 Matre ame la Mefiboseth a traqa e Ierusalema troa ibozu me joxu, önine la joxu: “Mefiboseth, hnauëne laka, tha ce tro kö eö me eni?” 26 Matre öni Mefiboseth: “Hnene la hlueng hna trane la heng joxu. Ka peje ca ni, matre öninge lo, ‘ati biritine ju la bolikong, matre tro ni a ce tro me joxu.’ 27 Hnene la hlueng hna thoi koi nyipë joxu, ngo ceitune hi la inamacane i nyipë me angela i Akötresie, matre kuca jë la mekuna i nyipë. 28 Joxu, ijiji nyipëti lo troa humuth asë la lapa ne la kemeng, ngo hnei nyipëti pe hna aijijë ni troa ce xen me itre ka xeni ngöne la laulau i nyipë. Matre joxu, tha ijijinge kö troa hane eetre koi nyipë.”
29 Ngo önine la joxu: “Loi ju hë hna ithanata, ase hë ni mekun tro eö me Ziba a thawa la itre hlapa.” 30 Matre öni Mefiboseth ka hape: “Xom asë jë angeic, tha nyipiewekë hë koi ni, ke bëeke hë la joxu kowe la hnalapa i nyidrë memine la tingeting.”
31 Nge hnei Bazilai atre Gileada, hna traqa fe qa Rogel troa ce tro me joxu, uti hë la gaa tëtë ne la hneopegejë Ioridrano. 32 Qatre catre hë Bazilai, ke 80 hë lao macatre i nyidrë. Trenamo nyidrë, nge hnei nyidrëti lo hna traqa fë xeni kowe la joxu, lo joxu a lapa e Mahanaima. 33 Matre önine la joxu: “Sasaithe jë me eni, nge tro nyipëti a xeni ngöne la laulaung e Ierusalema.” 34 Ngo öni Bazilai: “Joxu fe, ije drai* ne tro pe hi ni a mel? Goi tha ijije fe lai troa ce elë me nyipë a tro Ierusalema. 35 Traqa ha koi 80 lao macatreng, nge tro pala kö ni a atreine wangatrehmekune la loi me ngazo? Tro pala kö ni hlue i nyipë a atreine tupathe la nyine xeni me ij? Tro pala kö ni a atreine dreng la nin ne la itre ka nyima? Tha ajane kö ni troa thip ahacenyi nyipë joxung. 36 Waea, tha ijijinge kö la ahnahna cili. Ngo ketre manathithi ka tru hë koi ni troa ce tro me nyipë kowe la Ioridrano. 37 Matre, nue ni pi troa bëeke kowe la hnalapang. Pi tro ni a mec ngöne la zing, ezine la hua i kaka me nenë. Ngo hane hi lae Kimeama, xomi angeice jë troa huliwa koi nyipë. Tro angeic a ce sasaith la Ioridrano me nyipë joxu, nge huliwa angeice jë thenge la mekuna i nyipë.”
38 Önine la joxu ka hape: “Tro Kimeama a ce sasaithe me eni, nge tro ni a kuca koi angeic la ka loi koi nyipë. Tro ni a kuca asë la hnei nyipëti hna upi ni.” 39 Ame hnene la itre atr asë hna sasaithe la hneopegejë Ioridrano. Ngo qëmekene tro la joxu a sasaith, Dravita a pane dremi Bazilai ju, me amanathithi nyidrë. Nge Bazilai a bëeke ju kowe la hnalapa i nyidrë. 40 Ame hnei joxu hna sasaithe la hneopegejë me tro Gilegala. Nge ce Kimeama me nyidrë. Nge hnene la itre atrene Iudra asë, memine la sin ne la nöje Isaraela, hna ce sasaithe me joxu la hneopegejë.
41 Nge hnene la itre xa atre Isaraela hna hnying koi joxu ka hape: “Hnauëne la itre trejin me eahun qa Iudra a atrekënö la joxu hun, me ce sasaith me nyidrë la Ioridrano, me fami i nyidrë, me itre atre i nyidrë?” 42 Ame hnene la itre atre Iudra hna sa koi angetre Isaraela ka hape: “Fami huni lai joxu. Hnauëne la epuni a wesitr? Tha hnei joxu kö hna thue ai eahun, me hamë ahnahna koi hun.”
43 Ngo hnene la itre atre Isaraela hna sa koi angetre Iudra ka hape: “10 lao tribu hun, matre hnëqa huni troa kuca lai koi Dravita, ngo tha epuni kö. Matre hnauëne laka, epuni a wangaconyi hun? Eahuni la itre ka troa bëeke fë la joxu hun.” Ngo ka catre kö la hna qaja hnei angetre Iudra hui angetre Isaraela.