Hnaaluene Tus i Samuela

20 Ngo e cili fe la ketre atr ka nyixane la iwesitrë, ene Seba, nekö i Bikeri, atre Beniamina. Angeic a ufi trutru jë me hape: “Tha sine i easë fe kö Dravita! Nge pëkö edrö së qaathene la nekö i Iese! Haawe, angetre Isaraela, isa bëeke jë koi isa hazen!”* 2 Ame hnei angetre Isaraela asë hna trotriji Dravita, me xötrethenge Seba nekö i Bikeri. Ngo hnei angetre Iudra pe hna catre tro memine la joxu i angatr, qaan e Ioridrano uti hë Ierusalema.

3 Nge ame la Dravita a traqa hnine la hnalapa i joxu e Ierusalema, nyidrëti a ameköti ewekë jë kowe la itre xa föi nyidrë, lo ala 10 hna nue troa nyidrawa hnalapa. Dravita a iupe jë troa umë angatr hnine la ketre hnalapa hna thupën, uti hë la angatr a mec. Dravita pala hi a ithua i angatr, ngo tha ce meköle hmaca kö nyidrë me angatr. Angatr a mel kösë föe hna mecitrij, ngacama ka mele pala kö la föi angatr.

4 Ame hnei joxu hna qaja koi Amasa ka hape: “Hëne jë la itre trahmanyi ne Iudra. Köni drai hna nue koi angatr troa traqa, nge eö fe, loi e tro fe eö a traqa.” 5 Amasa a tro ju troa hëne la itre trahmany ne Iudra, ngo tha bëeke ju kö angeic ngöne la ijine hna sa. 6 Öni Dravita jë hi koi Abisai: “Ma loi ju kö elany la aqane angazo së hnei Abasaloma hui Seba, nekö i Bikeri. Xome jë la itre soceng, nge huzu angeice jë, wanga zae pi angeic hnine la ketre traon hna eköhagen, me kötre së.” 7 Nge hnene la itre atre i Ioaba, me angetre Kerethi me Pelethi, me nöjei soc ka catr, hna tro qa Ierusalema troa huzu Seba nekö i Bikeri. 8 Matre ame hë la angatr a traqa ezine la ietë atraqatr e Gibeona, Amasa a tro ju troa ixelë me angatr. Nge Ioaba a heetrë iheetr ne isi, nge hetre taua i angeic hna qatreng hnine itrengen, nge hna acatren kowe la beletr. Matre ame la angeic a tro koi Amasa, mala pi hi la taua i angeic.

9 Ioaba a hnyingëne jë koi Amasa ka hape: “Tune kaa eö trejin?” Nge angeic a ea ju la ienaji i Amasa hnene la ime maca i angeic, kösë angeic a pi dremi Amasa. 10 Tha hmekëne kö Amasa lo taua hna ea hnei Ioaba. Matre Ioaba a saane ju la taua kowe la hni i Amasa, nge hulia pi hi e kuhu hnadro la itrapa xele i angeic. Tha alua saane ju kö Ioaba, ke kola ha meci hnei Amasa. Thupene lai, Ioaba me Abisai trejin me angeic a tro hmaca pi troa huzu Seba, nekö i Bikeri.

11 Nge hnene la ketre soc* i Ioaba ka cil ezi Amasa hna qaja ka hape: “Tro la itre soce i Dravita ka nyixöle i Ioaba, a xötrethenge Ioaba!” 12 Ngo Amasa pala hi a meköl e kuhu nyipine gojeny hnine la madra i angeic. Matre ame la kola öhne hnene lo soc ka hape, itre xa soc a cil la angatr a traqa ezi Amasa, angeic a xomi Amasa jë qa kuhu gojeny, me amë ngöne la ketre hlapa. Thupene lai, angeic a kuiëne pi la ketre iheetr hui Amasa. 13 Ase jë hi angeic xometrije la ngönetrei Amasa, hnene la itre soc asë hna xötrethenge Ioaba, me huzu Seba nekö i Bikeri.

14 Hnei Seba hna trongëne la nöjei tribu ne Isaraela, uti hë Abela-Bethe-Maaka. Nge hnene la itre Bikeri hna ce ut troa itronyi me angeic hnine la traon.

15 Nge ame hë la Ioaba me itre atre* i angeic a traqa e Abela-Bethe-Maaka, angatr a cile xötreithi ju la traon troa xolouthi Seba. Ngo pine laka, ka draië catr la hna xup xötreithe la traon, hnene la itre soc hna otre ija matre traqa pi e koho hune la ihag. Nge hnei angatre fe hna nyiqaane thë la trepene la ihag matre akein ej. 16 Nge qa ngöne la traon, hnene la ketre föe ka trene inamacan hna sue ka hape: “Pane dreng! Pane dreng! Upi Ioaba jë a tro ce. Eni a pi ithanata me nyidrë.” 17 Nge Ioaba a easenyi jë, matre önine lai föe: “Ioaba hi nyipë?” Öni angeic: “Eni hi.” Önine jë hi lai föe: “Pane drenge ju la hna qaja hnene la hlue i nyipë.” Matre öni angeic: “Eni a drei nyipo.” 18 Önine lai föe: “Ame ekö, hna majemine qaja ka hape, ‘Loi e troa thele eamo e Abela, matre senge jë lai jol.’ 19 Eni a nyi qeneqaja ne la itre atr ka tingeting me nyipici e Isaraela. Nyipëti a pi apatrene* la traon ka tru, kösë thin e Isaraela. Hnauëne laka, nyipëti a thele troa apatrene la edrö hna hamë huni hnei Iehova?” 20 Ngo öni Ioaba jë hi: “Tha eni kö a pi lepe la traon me apatren ej! 21 Waea! Ngo hetre atr ngöne la traone i epun, Seba la ëjen, nekö i Bikeri, atre Eferaima ngöne la itre wetr. Hnei angeic hna icilekeu me Dravita joxu. Matre e tro epuni a nue angeic koi hun, angeice hmekuj, tro hë huni a bëek.” Nge önine jë hi lai föe: “Nga tro hë huni a kuiën koi nyipë la he i angeic qa hune la ihag.”

22 Ame hnene lai föe hna canga ewekë cememine la inamacan kowe la itre atrene la traon. Nge angatr a thupa pi la he i Seba nekö i Bikeri, me kuiëne koi Ioaba. Nge Ioaba a ufi trutru jë, nge itre soc a mejë jë qa lai, me isa bëeke koi hnalapan. Ngo ame Ioaba, angeic a bëeke jë a tro Ierusalema koi joxu.

23 Ngöne la ijine cili, Ioaba la ka musinëne la trongene isi Isaraela, nge Benaia nekö i Iehoiada la tane la angetre Kerethi, me Pelethi. 24 Nge Adorama la tane la itre hna up troa huliwa koi joxu, nge Iehosafata nekö i Ahiluda la atre feja itus. 25 Seva la sekreter, nge Zadoka me Abiathara la lue atre huuj. 26 Nge ame Ira atre Aira, tre ketre tane ka tru* i Dravita.