Deuteronomi

20 “Maine tro eö a isi memine la itre ithupëjia me eö, me öhne laka, nyimutre catre kö la itre hos, me itre ikatr, me itre trongene isi i angatr hui ö, the xoue angatre kö, ke ce eö me Iehova Akötresi ö, lo atre thepe eö qa Aigupito. 2 Ame hë la eö a troa isi me angatr, qa ne la atre huuj troa ithanata kowe la nöj. 3 Nge tro hë angeic a hape: ‘Isaraela fe, pane drenge ju! Easenyi hë tro epuni a isi memine la itre ithupëjia me epun, matre the xou kö. The hnehengazo kö nge the xoue angatre kö, the hmengöhmengöne kö pi angatr, 4 ke Iehova Akötresi epun a ce tro me epun, troa isi me itre ithupëjia me epun, matre amele epun.’

5 “Thupene lai, tro la itre tan a hape kowe la nöj: ‘Drei la ka xupi uma, nge tha ase pala kö angeice lapan? Loi e tro angeic a bëeke hmaca koi hnalapa, wanga meci pi angeic ngöne la isi, nge tro pë hë la ketre atr a lapane la uma i angeic. 6 Nge drei la atre traa vin, nge tha ase pala kö angeice menuën? Loi e tro angeic a bëeke hmaca koi hnalapa, wanga meci pi angeic ngöne la isi, nge tro pë hë la ketre atr a menuëne la itre wene rezë i angeic. 7 Nge drei la ka othe la ketre föe, ngo tha ka faipoipo pala kö? Loi e tro angeic a bëeke hmaca koi hnalapa, wanga meci pi angeic ngöne la isi, nge tro pë hë la ketre trahmany a faipoipo memine la föe hnei angeic hna oth.’ 8 Tro hmaca kö la itre tan a qaja kowe la nöj ka hape: ‘Drei la atr ka xou nge ka hmengöhmengön? Loi e tro angeic a bëeke hmaca koi hnalapa, wanga tro angeic a akucakucane* la itre trejin me angeic, tune la aqane kucakuca i angeic.’ 9 Nge ame hë la itre tan a ase ithanata kowe la nöj, tro hë angatr a acile la itre tane isi, matre troa köja gojenyine la nöj.

10 “Maine eö a tro troa isi memine la ketre traon, qa i ö troa pane thuemacanyi angatr la aqane troa thele tingeting. 11 Nge maine tro angatr a thele tingeting me eö, me fe la itre qëhnelö i angatr, tro ha ewekë i ö la itre atrene la traon, nge tro hë angatr a huliwa koi ö, me nyihlue i ö. 12 Ngo maine xele kö angatr ma thele tingeting me eö, nge tro angatr a isi me eö, qa i ö troa lapa xötreithe la traon. 13 Tro hë Iehova Akötresi ö a nue angatr kowe la lue ime i ö, nge tro pë hë eö a lepe la nojei trahmanyi asë hnei taua. 14 Ngo ame kö la itre föe, me itre nekönatr, me itre si i angatr, me nöjei ewekë ngöne la traon, ene la itre mo i angatr, tro hë eö a eöth asë thatraqai ö. Tro hë eö a xom asë la itre mo ne la itre ithupëjia me eö, lo hnei Iehova Akötresi ö hna nue koi ö.

15 “Celë hi aqane tro eö a kuca kowe la nöjei traon ka nanyi qaathei ö, ene la itre traon ka tha hane sine la itre nöj celë ka lapa ezi ö. 16 Ke ame ngöne la itre traon ne la itre nöje cili, lo hnei Iehova Akötresi ö hna troa hamën nyine edrö i ö, tha tro pi kö eö a nuamelene la ketre atr.* 17 Ngo qa i ö pe troa lep apatren asë la angetre Heth, me Amora, me Kanana, me Perizi, me Hivi, me Iebuzi, tune lo hnei Iehova Akötresi ö hna amekötin koi ö. 18 Qa ngöne lai, tha tro kö angatr a ini ö la itre thiina ka sis hnei angatr hna kuca kowe la itre haze i angatr, itre huliwa ka troa uku eö troa ngazo qëmekei Iehova Akötresi ö.

19 Maine tro eö a lapa xötreith la ketre traon nge qeadridri pi hë la hnei ö hna isi memin, tha tro kö eö a hna la ze troa apatren la itre sinöe e cili. Ijiji ö hi troa xen la itre wene sinöe, ngo tha tro pi kö eö a satrij itre ej. Ke hapeu, tro kö a lepe la ketre sinöe ngöne la itre hlapa, tune la kola lepe la ketre atr? 20 Tro hi ö a sa la sinöe laka, tha nyine xeni kö. Ijiji ö hi troa sa la sinöe me huliwan ej nyine kuci jia ne isi, matre lepe la traon hnei ö hna isi memin, uti hë la tro eö a ngaan ej.