Pane Tusi Itre Joxu

2 Nge easenyi hë tro Dravita a mec, matre hnei nyidrëti hna hamëne la itre ithuecatre celë koi Solomona nekö i nyidrë: 2 “Easenyi hë la tro na mec,* ngo tro eö a catr, nge hni ne trahmanyi jë. 3 Qa i eö troa eatrëne la itre hnëqa koi Iehova Akötresi eö: Qa i eö troa trongëne la hnei nyidrëti hna qaja. Nge tro eö a metrötrëne la itre wathebo, me itre hna amekötin, me itre hna isenyin, me itre hna amekunën hnei nyidrë, itre hna fejane ngöne la Trenge Wathebo i Mose. Aqane tro eö lai a eatrëne* la nöjei huliwa hnei eö hna kuca enehila, me elany. 4 Nge tro Iehova a eatrëne la hnei nyidrëti hna sisiny koi ni, lo öni nyidrë: ‘Maine tro la itre nekö i ö a thupëne la aqane ujë i angatr, me mele nyipici koi ni hnene la hni angatr ka pexej, me mele i angatr ka pexej, tro pala hi la ketre* matra i ö a të hune la theron ne Isaraela.’

5 “Nge atre hnyawa hi eö la hna kuca koi ni hnei Ioaba nekö i Zeruia, me kowe la lue tane sooc i Isaraela, Abinera nekö i Neri, me Amasa nekö i Iethero. Hnei angeic hna humuthi nyidro. Nge ngöne la ijine tingeting, hnei angeic hna isi me aneni madra, me adrone la beletr ngöne la gö i angeic, me lue butr ngöne la lue ca i angeic. 6 Haawe, inamacane pi, nge the nue angeice kö troa uti fë iqia kowe la hua.*

7 “Nge ame kowe la itre nekö i Bazilai qa Gileada, loi hni jë koi angatr. Tro fe angatr a elë troa xen ngöne la laulau i eö, ke hnei angatr hna hnimi ni, lo eni a kötre Abasaloma mama i eö.

8 “Nge meku Simei fe kö, nekö i Gera, atre Beniamina qa Bahurim. Hnei angeice lo hna sue me eji ni, lo eni a tro Mahanaima. Ngo ame la angeic a traqa koi ni e Ioridrano, hnenge hna sisinyi qëmekei Iehova ka hape, tha tro kö ni a humuthi angeic hnei taua. 9 Ngo ame eö, the cile kö troa nyithupene koi angeic. Ka inamacan eö, nge atre kö eö la nyine kuca. Matre, the nue angeice kö troa uti fë iqia kowe la hua.”*

10 Thupene lai, meci pi hi Dravita, nge hna kelemi nyidrëti me itre qaaqaa i nyidrë, ngöne la Traone i Dravita. 11 Traqa koi 40 lao macatre* ne musi Dravita hui Isaraela: 7 lao macatre e Heberona, nge 33 e Ierusalema.

12 Matre, Solomona a të jë hune la therone i Dravita keme i nyidrë. Nge Solomona pala hi a acatrene trongëne la musi nyidrë.

13 E thupen, hnei Adonia, nekö i Hagitha hna tro troa wai Batheseba, thine i Solomona. Eahlo a hnyinge jë koi angeic ka hape: “Ka tingetinge la tronge i eö?” Nge sa jë hi angeic ka hape: “Öö. 14 Ngo ca siponge koi eapo.” Öni eahlo: “Öi qaja jë!” 15 Öni Adonia: “Atre hnyawa hi eapo laka, maine ju, eni hi la ka troa joxu, nge aqane mekuna* ne la nöje Isaraela asë. Ngo hna sewe ni troa joxu, nge hna acile la jining, pine laka, aja i Iehova kö lai. 16 Ngo enehila, eni a sipone la ca ewekë koi eapo, ngo the cipane kö.” Öni Batheseba jë hi: “Öi qaja jë.” 17 Öni Adonia: “Sipone jë koi Solomona joxu matre tro Abisaga qa Sunema a föeng. Tha tro kö nyidrëti lai a xel, ke eapo la ka sipon.” 18 Matre öni Batheseba: “Ka loi! Tro ni a ithanata me joxu göne la sipo i ö.”

19 Haawe, Batheseba a tro ju koi Solomona joxu troa qeje Adonia. Ame hnei joxu hna canga tro troa ixelë me thin, me sa iwatingöneca qëmeke i eahlo. Thupene lai, nyidrëti a të hmaca ju hune la therone i nyidrë, me upe troa traqa fë la ketre theron kowe la thine i nyidrë, matre tro eahlo a lapa ngöne la götrane maca i nyidrë. 20 Matre öni eahlo: “Ca neköi siponge koi eö, ngo the cipane kö.” Öni joxu: “Öi nenë qaja jë, tha tro kö ni a cipane koi eapo.” 21 Öni Batheseba: “Nue pi tro la mama i eö Adonia, a xomi Abisaga qa Sunema nyine föi angeic.” 22 Matre öni Solomona joxu kowe la thine i nyidrë ka hape: “Ame la eapo a sipo Abisaga qa Sunema koi Adonia, kösë eapo hi lai a sipon tro angeic a joxu, ke mamange lai, nge kola ce xöle me angeic hnei Abiathara atre huuj, me Ioaba nekö i Zeruia.”

23 Thupene lai, Solomona joxu a sisinyi jë ngöne la ëje i Iehova ka hape: “Epi tro Akötresie a të la ngazo koi ni, e tha humuthi Adonia kö ni, pine la sipo celë. 24 Qëmeke i Iehova Akötresie ka mel, atre alapa ni hune la therone i Dravita kemeng, me acatrene la musing, me hamë xötre joxu tune lo aqane sisinyi nyidrë, tro pala hi a humuthi Adonia la drai ce.” 25 Qa ngöne lai, hnei Solomona joxu hna canga upi Benaia nekö i Iehoiada, troa humuthi Adonia. Hane hi la aqane mec i Adonia.

26 Nge önine la joxu koi Abiathara atre huuj: “Tro ja lapa e Anatoth, ngöne la itre hlapa i eö. Maine ju, tro fe a hane humuthi eö. Ngo tha tro kö ni a humuthi eö la drai ce, ke hnei eö hna kapa la Pua i Iehova Joxu Ka Sisitria, lo ce eö me Dravita kemeng, nge hnei eö hna melëne la itre akötre i nyidrë.” 27 Ame hnei Solomona hna wathebo Abiathara troa atre huuj koi Iehova. Nge celë hi aqane eatre lo Iehova a eji Eli me fami angeic e Silo.

28 Matre ame hë la Ioaba a drenge lai, angeic a kötre ju kowe la uma maano i Iehova, me ea la itre jiane la ita ne huuj. Maine nyipici laka, tha hnei Ioaba kö hna ce xöle me Abasaloma, ngo hnei angeic hna ce xöle me Adonia. 29 Ame hna thuemacanyi Solomona joxu ka hape: “Hnei Ioaba hna zae ngöne la uma maano i Iehova, ezine la ita ne huuj.” Qa ngöne lai, Solomona a upi Benaia jë, nekö i Iehoiada, troa humuthi Ioaba. 30 Haawe, Benaia a tro ju kowe la uma maano i Iehova, me hape koi Ioaba: “Öni joxu, tro pi qa lai!” Ngo öni Ioaba: “Waea, tro ni a mec e celë.” Nge Benaia a tro ju troa qaja koi joxu la hna sa hnei Ioaba. 31 Nge öni joxu jë hi: “Kuca ju hö la hnei angeic hna qaja. Humuthi angeice pi, nge kelemi angeice ju. Qa ngöne lai, tha tro hmaca kö a të koi ni me fami i kaka, la madra hnei angeic hna anenine menun. 32 Ke hnei angeic hna humuthe la lue atr ka meköt, nge ka lolo kö hui angeic, ngo thatre pe kaka. Hnei angeice hna humuthi Abinera nekö i Neri, tane la trongene isi Isaraela, me Amasa nekö i Iethero, tane la trongene isi Iudra. Tro Iehova a nyithupen la hnei angeic hna ihumuth. 33 Uti hë epine palua, troa upezö Ioaba me itre xötre matra i angeic la meci ne la lue atre cili. Ngo epi tro Iehova a hamë tingeting uti hë epin koi Dravita, me itre matra i nyidrë, me itre xötre joxu i nyidrë, me kowe la baselaia i nyidrë.” 34 Ame hnei Benaia nekö i Iehoiada hna tro hmaca pi, me humuthi Ioaba, nge hna kelemi Ioaba ezine la hnalapa i angeic, ngöne la gaa qaqacil. 35 Thupene lai, joxu a acili Benaia jë nekö i Iehoiada, troa nyihna i Ioaba matre tane la trongene isi. Nge joxu a acili Zadoka jë, troa nyihna i Abiathara troa atre huuj.

36 Ame hnei joxu hna hë Simei me hape: “Tro eö a xupi uma e Ierusalema, nge tro eö a lapa e cili. Eni a wathebo eö troa tro qa ngöne la traon. 37 E traqa jë eö tro qa ngöne la traon, me sasaith la hnathup ne Kederon, tro eö a mec. Nge zö i eö kö la meci eö.” 38 Simei a sa jë koi joxu ka hape: “Ka loi hi la mekuna i nyipë. Tro ni a trongën joxung.” Matre, qea pi hë la hnei Simei hna lapa e Ierusalema.

39 Ngo thupene la köni macatre, hnene la lue hlue i Simei hna kötr koi Akisa, joxu ne Gatha, lo nekö i Maaka. Nge ame hë la Simei a drenge ka hape, nyidroti e Gatha, 40 Simei a ati biritine ju la boliko i angeic, me tro koi Akisa matre bëeke sai nyidro. Matre ame hë la Simei a bëeke qa Gatha me lue hlue i angeic, 41 hnei ketre hna qejeqeje angeic koi Solomona ka hape: “Hnei Simei hna tro qa Ierusalema a tro Gatha, nge bëeke hmaca ha angeic.” 42 Ame hnei joxu hna hë Simei me hape: “Ase hë eö sisinyi qëmeke i Iehova. Nge hnenge hna hmekë eö me hape, ‘E traqa jë eö tro qa ngöne la traon, tro hë eö a mec.’ Nge öni eö lo, ‘Ka loi hi la mekuna i nyipë. Tro ni a trongën.’ 43 Matre hnauëne laka, tha metrötrëne kö eö lo hnei eö hna sisiny qëmeke i Iehova, nge eö a ena la wathebong?” 44 Ame hnei joxu hna qaja koi Simei ka hape: “Tru la hnei ö hna akötrë Dravita kemeng. Ngo enehila, tro Iehova a të la ngazo i eö. 45 Ngo tro Iehova a amanathithi Solomona joxu, me nyipi acatrene la therone i Dravita uti hë epine palua.” 46 Ame hnei joxu hna upi Benaia nekö i Iehoiada troa humuthi Simei, nge meci ju hi Simei.

Hane hi la aqane acatrene la baselaia, fene la musi Solomona.