Pane Tusi Itre Joxu
3 Nge hnei Solomona hna isisinyikeu memine la joxu ne Aigupito, jëne la hna faipoipo* memine la nekö i Farao. Nge hnei nyidrëti hna lö sai eahlo hnine la Traone i Dravita. Nge hnei eahlo hna lapa e cili, uti hë la Solomona a ase xupe la uma i eahlo, memine la uma i Iehova, memine la ihag xötreithi Ierusalema. 2 Nge ngöne la ijine cili, itre atre pala kö a huuj hune la itre hnë hmi gaa hmitrötr, ke pë pala kö uma hna xup kowe la ëje i Iehova. 3 Nge Solomona a amamane la ihnimi nyidrë koi Iehova, ke nyidrëti a metrötrëne la itre hna amekötin hnei Dravita keme i nyidrë. Ngo nyidrëti pala kö a huuj hune la itre hnë hmi gaa hmitrötr, me huhajin la itre huuj koi Akötresie.
4 Ame hnei Solomona hna tro Gibeona troa huuj, ke e cili hi la hnë hmi gaa hmitrötr ka tru. Nyidrëti a huujëne jë hune la ita ne huuj cili, la 1 000 lao huuj ne dreuth asë. 5 Nge e Gibeona, hnei Iehova hna mama koi Solomona jëne la ketre pu e jidr. Öni Akötresie: “Nemene la nyine tro na hamë eö? Sipo ni jë.” 6 Matre öni Solomona: “Hnei nyipëti hna amamane la ihnimi nyipici i nyipë koi Dravita hlue i nyipë, lo kemeng. Hnei nyidrëti hna mele nyipici koi nyipë, me meköt, me huliwa nyipici. Nge uti hë enehila, nyipëti pala hi a catre amamane la ihnimi nyipici i nyipë koi kaka, ke hnei nyipëti hna hamë nekö i nyidrë trahmany, troa nyihna i nyidrë me mus. 7 Nge enehila Iehova Akötresing, hnei nyipëti hna acili ni troa joxu me nyihnai Dravita kemeng, ngo nekönatr pala kö ni, nge thatre pala kö ni koilo.* 8 Kola mus hnene la hlue i nyipë hune la nöj hnei nyipëti hna iën, ketre nöj ka ala nyimu nge hna thatreine e. 9 Matre epi hamë ni pi la hni ka idrei, matre atreine jë ni amekötine la nöje i nyipë, me wangatrehmekune la loi me ngazo. Ke drei la ka atreine amekötine la nöje i nyipë, nöje ka ala nyimu* catr?”
10 Madrine catre Iehova kowe la sipo i Solomona. 11 Matre öni Akötresie: “Tha hnei eö kö hna sipone troa mel aqeany,* maine trenamo, maine troa mec la itre ithupëjia me eö, ngo hnei eö pe hna sipo wangatrehmekun, matre meköti la aqane iameköti i eö. Haawe, pine laka, celë hi sipo i ö, 12 tro hë ni a hamë eö la inamacane me wangatrehmekun. Inamacan me wangatrehmekun hna tha hane kapa hnei ketre qëmeke i ö, me thupei ö. 13 Ngo ame fe la hnei eö hna tha sipon, tro fe ni a hamë eö, trengamo me iatruny. Matre ngöne la ijine* mele eö, pëkö ketre joxu ka troa tui eö. 14 Nge e tro eö a kuca la hnenge hna qaja, me trongëne la itre wathebong, me itre hnenge hna amekötin, tune lo aqane i Dravita keme i ö, tro fe hë ni a aijijë eö troa mel aqeany.”
15 Ame hë la Solomona a hlë, trotrohnine ju hi nyidrë ka hape, nyidrëti lo a pu. Matre Solomona a tro ju a tro Ierusalema, me cil qëmekene la pua ne isisinyikeu i Iehova. Nyidrëti a tro fë jë la itre huuj ne dreuth asë, me itre huuj ne tingeting, nge nyidrëti a hnëkë xeni atrunyi jë kowe la itre hlue i nyidrë.
16 Ngöne la ijine cili, traqa pi hi la lue föe ne gojeny koi joxu. 17 Matre önine la hnapane ka hape: “Joxung, casi hi la hnalapang memine la föe celë, matre ce eni me angeic lo eni a hnaho. 18 Nge köni drai thupen, hnene la föe celë hna hnaho. Ce nyio hi, pëkö ketre atr me nyio. 19 Ngo e hej, meci ju hi la nekö i angeic trahmany, ke hnei angeic hna meköle tith. 20 Matre e hnenyipajidr, lo eni pala kö a meköl, angeic a mejë jë troa xome la neköng ezing, me nyihnan hnene la nekö i angeic ka mec. Nge ame pena la neköng, hnei angeic hna ameköle nyën ezi* angeic. 21 Matre ame hë la eni a hlë e hmakany troa iji thine la neköng, öhne ju hi ni ka hape, meci hë nyën. Nge eni a waipengöi nyëne hnyawa ju, nge öhne ju hi ni laka, tha kolo kö lo nekönge hnenge hna hnahon.” 22 Ngo önine lai ketre föe ka hape: “Waea nekönge kö la ka mel, nge nekö i eö la ka mec.” Matre önine hmaca la hnapan: “Waea nekö i eö la ka mec, nge nekönge la ka mel.” Nge aqane iwesitrë i nyidroti lai qëmekene la joxu.
23 Ame hnei joxu hna ewekë me hape: “Öni ketre ka hape, ‘Nekönge la ka mel, nge nekö i eö la ka mec,’ ngo ketre a qaja ka hape, ‘Waea, nekö i eö la ka mec, nge nekönge la ka mel!’” 24 Matre önine la joxu: “Nga awe jë la ca taua!” Ame hna traqa fë koi nyidrë la ketre taua, 25 nge öni nyidrë: “Thupa luëne pi la nekönatr, nge hamëne pi la ketre sin kowe la ketre föe, nge ketre sin koi ketre.” 26 Ame hna amejëne la trenge ihnim ne la nyipi thin, matre önine la thinene lai nekönatr ka hape: “Waea joxung, hamë angeic pi la nekönatr, ngo the humuthi nyëne kö!” Ngo önine pe la ketre föe: “Tha tro kö a hamë ni, maine hamë eö! Thupa luëne pi.” 27 Matre önine la joxu: “Waea the humuthi nyëne kö, ngo hamëne pi kowe la pane föe, ke angeice hi la thine i nyën.”
28 Nge dreng asë hi hnene la nöje Isaraela la hna amekötin hnei joxu, matre angatr a hai* nyidrë, ke öhne hi angatr ka hape, hnei Akötresie hna hamë inamacan kowe la joxu troa atreine iameköti.