Pane Tusi Itre Joxu
4 Solomona joxu a mus hui Isaraela asë. 2 Hane hi la itre atre ka tru ka huliwa* koi nyidrë: Azaria nekö i Zadoka la atre huuj, 3 nge Eliorefa me Ahia lue nekö i Sisa la lue sekreter, nge Iehosafata nekö i Ahiluda la atre feja itus, 4 nge Benaia nekö i Iehoiada la tane la trongene isi, nge Zadoka me Abiathara la lue atre huuj, 5 nge Azaria nekö i Nathana la tane la itre tan, nge Zabuda nekö i Nathana la atre huuj, me sinee ne la joxu, 6 nge Ahisara la atre thupë hnalapa, nge Adonirama nekö i Abeda, la tane la itre hna up troa huliwa koi joxu.
7 Nge 12 lao tane huliwa i Solomona e Isaraela. Hnëqa i angatr troa hamë xeni koi joxu, me nöjei atr ka lapa ngöne la hnalapa i nyidrë. Tro la itre tane cili a isa eatrëne la ca treu troa ithue xen. 8 Hane hi la itre tane cili: Nekö i Huro la atrekë hnëqane la götrane la wetr Efaraima, 9 nge nekö i Dekera, la atrekë hnëqane e Makaza me Salabim, me Bethe-semes, me Elona-bethe-hanan 10 nge qa Aruboth, kola thupë Soko memine la nöje Hefera asë hnene la nekö i Heseda. 11 Nge nekö i Abinadabe la atrekë hnëqane la itre sasala ne Dora, (hnei angeic hna faipoipo me Tafatha nekö i Solomona jajiny), 12 Nge Baana nekö i Ahiluda, la atrekë hnëqan e Tanaka me Megido, me Bethe-seana asë. Ame la nöje cili, ej a itretrengekeu me Zaretana, fene Iezerela, nge ej a tro qa Bethe-seana, uti hë e Abela-mehola, nge uti hë e Iokameama. 13 Nge qa Ramothe-gileada, nekö i Gebera (a thupëne la itre lapa i Iaira, nekö i Manase e Gileada. Nge angeice hi la atrekë hnëqan e Aregoba ngöne la nöje Basana: 60 lao traon atraqatr, me itre ihag xötreith, me itre qëhnelö hna acatren hnei itre agö kopa.) 14 Nge Ahinadaba nekö i Ido, la atrekë hnëqan e Mahanaima; 15 nge Ahimaza la atrekë hnëqan e Nafatali, (hnei angeice hna faipoipo me Basimathi nekö i Solomona jajiny); 16 nge Baana nekö i Husai la atrekë hnëqan e Asera me Aloth; 17 nge Iehosafata nekö i Parua la atrekë hnëqan e Isakara; 18 nge Simei nekö i Ela la atrekë hnëqan e Beniamina; 19 nge Gebera nekö i Uri la atrekë hnëqan e Gileada, hna musinën ekö hnei Sihona, joxu ne Amora, me Oga, joxu ne Basana. Hetrenyi fe e cili la tane la itre tan ne la nöj.
20 Ala nyimu catre la angetre Iudra me Isaraela, kösë wene ngöni ne hnagejë. Angatr asë a isa xeni me ij, me madrin.
21 Solomona a musi kowe la nöjei baselaia, qaane la Hneopegejë* uti hë la nöje i angetre Filisiti, nge uti fe hë la ifego ne Aigupito. Ngöne la mele i Solomona, itre baselaia i nyidrë a isa kuië mani hna athip, me drengethenge nyidrë.
22 Nge ame göi troa thue a i Solomona, me itre ka lapa ngöne la hnalapa i nyidrë, troa hamën e nöjei drai la 30 lao kori* ne farin ka loi, me 60 lao kori ne farin menu, 23 me 10 lao kau hna axöj hnine la uma i öni, me 20 lao kau hna axöj e trön, me 100 lao mamoe, me itre drube,* me itre waco ka kökötr. 24 Solomona a musi kowe la götrane celë ne la hneopegejë,* qaane Tifesa uti hë Gaza. Itre joxu ngöne la itre götrane cili a drei nyidrë, nge kola tingetinge ngöne la nöje i nyidrëti asë. 25 Ngöne la ijine musi Solomona, itre atre Iudra me Isaraela a mele tingeting, fene la itre vin* me iwacua i angatr, qaane Dana uti hë Bere-seba.
26 Nge thei Solomona la 4 000* lao hnahage i hos, thatraqane lo itre hos ka hule la itre ikatre i nyidrë, me 12 000 lao hos.*
27 Itre tan a hamë xen koi Solomona, me itre ka xeni ngöne la laulau i nyidrë. Angatr a isa eatrën la huliwa cili koi ca treu, nge angatr a thupën matre tha tro pi kö a pë la ketre ewekë. 28 Nge thenge la hna ajan, angatr a traqa fë bali me qitr kowe la itre hos, me koi itre hos ka huli ikatr. Angatr a isa traqa fë la etrun hna athipe koi angatr.
29 Hnei Akötresie hna hamën koi Solomona la inamacan ka ketre pengön, me atreine troa waiewekë. Nge hnei Akötresie hna kuca matre troa mana thei Solomona la atreine waiewekë,* tune la aqane mana la wenengöni ne hnagejë. 30 Tru catre kö la inamacane i Solomona hune la itre xa nöj ne Kohië, me hune la inamacan ne Aigupito. 31 Inamacane catre kö Solomona hune la itre xa atr. Inamacane kö nyidrë hui Ethana atre Ezera, me Heman, me Kalekol, me Dada, itre nekö i Mahola. Hlemu catre hë Solomona ngöne la itre nöje xötreith. 32 Hnei nyidrëti hna sile* la 3 000 lao edromë,* me sile la 1 005 lao nyima. 33 Atreine hi Solomona qejepengöne la itre iengen,* qaane la arasi ne Lebanona, uti hë la hisop ka cia hune ihag. Nge atreine hi nyidrë qejepengöne la itre öni ka foa lao wacan, me itre waco,* me itre öni ka wewë, me itre ie. 34 Itre atr qa ngöne la nöjei nöj a traqa troa drenge la inamacane i Solomona. Nge goi traqa fe la itre joxu qa ngöne la nöjei götrane la fen, ke hnei angatr hna drei mejene la inamacane i Solomona.