Ezekiela
17 Hnei Iehova hmaca hna ithanata koi ni me hape: 2 “Nekö i atr, qaja jë la ketre ijelaxötra me ketre ifejicatre* göne la nöje Isaraela. 3 Qa i ö troa qaja ka hape: ‘Hane hi la hna qaja hnei Iehova Joxu Ka Sisitria: “Traqa ha e Lebanona la aeto atraqatr, ka tru iapen, nge ka hetre pen ka qea, me hmekön, me nyimu han. Hnene ej hna sili hon ne arasi. 4 Hnene ej hna sil la hone ka draië catr, me tro fë kowe la nöj ne la itre ka salem,* me amë ngöne la ketre traon ne la itre ka salem. 5 Thupene lai, hnene ej hna xom la itre xaa feja ne la nöj, me jum ngöne la hlapa ka lolo ezine la itre tim, tune lo sinöe sol. 6 Ame hna cia pi la ketre vin ka lapalapa, nge ka xötr. Ame la itre drön, ke itre ej a sa ewa koi hnin, nge kola xötre la itre iwaan e kuhu fene ej. Celë hi hnene ej hna kuca matre xöle pi la itre picin,* me itre picin ka ija pala kö.
7 “‘“Ame hna traqa pi la ketre aeto atraqatr ka tru iapen, nge ka hetre pen ka qea. Matre hnene la ivine cili hna canga pi xötr ananyine la götran hna traan ej, uti hë la traqa kowe la aeto. Nge hnene ej hna easenyine la itre drön ej matre tro la aeto a fii. 8 Ame pe, hna traan eje lo ezin la tim ngöne la hlapa ka lolo, matre tro ej a hetre picin, me wa wen, me cia hlöeë.”’
9 “Hape jë: ‘Hane hi la hna qaja hnei Iehova Joxu Ka Sisitria: “Hapeu, tro kö ej a cia hnyawa? Tha tro jë kö la ketre atr a fejetrij la itre iwaan ej, me kuca matre troa pi la itre wen ej, me fitre la itre hon ne ej? Tro hë eje lai a qaqacil, matre tha nyipiewekë hmaca kö troa fej hnene la ime ka catr maine hnene la ka ala nyim. 10 Ngacama hna xome ju hë la hon ne ej troa traane hmaca, ngo hapeu, tro kö eje lai a cia hnyawa? Tha tro kö ej a aca tro fitr e troa hnahna la enyi qa koië? Eje hi, tro ej a fitr ngöne la itre ihnadro hnene ej hna cia.”’”
11 Nge hnei Iehova hmaca hna ewekë koi ni me hape: 12 “Pane qaja jë kowe la nöj ka tha idrei ka hape: ‘A tha trotrohnine kö epuni la aliene lai?’ Qaja jë koi angeic ka hape: ‘Dreng! Traqa ha la joxu ne Babulona e Ierusalema, nge hnei nyidrëti hna bëeke hmaca memine la joxu me itre nekö i joxu a tro Babulona. 13 Ketre, hnei nyidrëti hna xome la ketre matra i joxu, me isisinyikeu me angeic, me musinë angeic troa sisiny. Thupene lai, hnei nyidrëti hna xome fe la itre atr ka tru ne la nöj, 14 matre troa thaipiëne la baselaia, nge tha tro hmaca kö ej a mejë, nge tro hmekuje hi ej a cile hut, e tro la nöj a metrötrën la isisinyikeu. 15 Ngo hnene la joxu hna icilekeu me nyidrë: hnei angeic hna upe la itre ka tro fë maca a tro Aigupito, matre troa hetre hos me ketre trongene isi ka tru. Hapeu, tro kö angeic a hun? Tha tro kö a hane xeni pun hnene la atre kuca la itre ewekë cili? Ijiji angeice kö troa thë la isisinyikeu me mel?’
16 “‘“Maine nyipici laka, ka mele ni,” öni Iehova Joxu Ka Sisitria, “tro angeic a meci e Babulona, ngöne la nöj ne la joxu* ka acili joxu angeic,* lo joxu hnei angeic hna tha metrötrën la hna sisiny, me thë la isisinyikeu. 17 Ame pe, tro ha gufa la ixatua ne la trongene isi ka tru me itre soce i Farao ngöne la isi, ngöne la ijine troa acile draië la itre ija ne isi, me itre ihage ne isi nyine humuthe la ka ala nyim. 18 Hnei angeic hna tha metrötrën la hna sisiny, me thë la isisinyikeu. Hnei angeic hna kuca la itre ewekë cili, ngacama ase hë angeice lo sisiny.* Pëhë jëne kötre i angeic.”’
19 “‘Hane hi la hna qaja hnei Iehova Joxu Ka Sisitria: “Hnei angeic hna tha metrötrën la hna sisiny, me thë la isisinyikeu. Matre, maine nyipici laka, ka mele ni, tro hë ni a kuca matre tro angeic a xeni pun. 20 Tro ni a nue la ifileng koi angeic, nge tro angeic a jötr. Tro ni a tro sai angeic a tro Babulona, nge e cili tro ni a të koi angeic pine tha mele nyipici koi ni. 21 Tro asë hi la itre soc i angeic ka kötr a meci hnei taua, nge tro pë hë a isaijen la itre ka mele pe ngöne la nöjei götran.* Nge tro hë epuni a atre laka, ase hë ni Iehova ithanata.”’
22 “‘Hane hi la hna qaja hnei Iehova Joxu Ka Sisitria: “Tro ni a xome la hon ne arasi atraqatr me traan ej; tro ni a sil la ketre hone ka ija hune la itre xaa hone ka pepeija, me traan ej hune la wetr ka draië catr. 23 Tro ni a traan ej hune la wetr ka draië ne Isaraela. Tro ha cia la itre picin ej, me wa wen, me cia hlöeë. Nge tro hë la nöjei pengöne waco a tro cili, me zae fen la itre drön ej. 24 Nge e cili, tro hë la nöjei sinöe ngöne la itre hlapa a atre laka, eni Iehova la ka aipiëne la sinöe ka draië, me adraiëne la sinöe ka ipië. Nge eni fe la ka amecin la sinöe ka hatr, me kuca matre enge jë la sinöe ka qaqacil. Eni Iehova la ka qaja me kuca lai.”’”