Pane Tusi Itre Joxu

11 Nyimu föe trenyiwa hnei Solomona joxu hna hnim, kolo nekö i Farao jajiny, me itre föe ne Moaba, me Amona, me Edoma, me Zidona, me Heth. 2 Itre föe lai ka xulu qa ngöne la itre nöj hnei Iehova hna qaja koi Isaraela ka hape: “The tro kö epuni a tro kowe la itre nöje* cili, wanga tro angatr a ajeane la itre hni i epun, troa nyihluene la itre haze i angatr.” Ngo hnei Solomona hna fedre koi nyudren,* me hnimi nyudren. 3 Ala 700 la itre sipu föi nyidrë, itre isola, nge ala 300 la itre xa föi nyidrë. Matre hnene la itre föe cili, hna ajeane* trongëne la hni nyidrë. 4 Nge ame hë la qatre hë Solomona, hnene la itre föi nyidrë hna ajeane la hni nyidrë troa nyihluene la itre xa haze. Matre tha pexeje* hë la hni i nyidrë koi Iehova Akötresi nyidrë, tune lo aqane pexejene la hni i Dravita keme i nyidrë. 5 Matre hnei Solomona hna nyihlue i Aseira, haze föe i angetre Zidona, me Milekoma,* haze ka sis i angetre Amona. 6 Hnei Solomona hna kuca la ngazo qëmeke i Iehova, matre tha mele nyipici hë nyidrë koi Iehova, tune lo aqane nyipici i Dravita keme i nyidrë.

7 Ngöne la ijine cili, Solomona a xupe jë hune la wetr ka qëmeke koi Ierusalema, la ketre hnë hmi koi Kemosa, haze ka sis i angetre Moaba, me koi Moleka, haze ka sis i angetre Amona. 8 Nyidrëti a kuca tune thatraqane la nöjei föe trenyiwa i nyidrë, matre tro angatr a tro fë huuj, me huhajine la itre huuj kowe la itre haze i angatr.

9 Ame hnei Iehova hna elëhni koi Solomona, ke nanyi hë la hni Solomona qaathei Iehova Akötresi Isaraela, atre alua mama koi angeic 10 me hmekë angeic, wanga nyihluene jë la itre xa haze. Ngo tha trongëne kö Solomona la hnei Iehova hna amekötin. 11 Ame hnei Iehova hna qaja koi Solomona ka hape: “Pine eö ngazo me tha metrötrëne la isisinyikeung, me itre wathebong tune lo hnenge hna upi ö, ka xecie hë koi ni troa thapa la baselaia qaathei ö, me hamëne kowe la hlue i ö. 12 Ngo pi Dravita keme i ö, tha tro kö ni a kuca e mele kö eö, ngo tro pe ni a thapa qaathene la nekö i ö. 13 Tha tro kö ni a thapa asë, ngo tro hi ni a nue koi angeic la ca tribu, pi Dravita hlueng, me pi Ierusalema, lo traon hnenge hna iën.”

14 Ame hnei Iehova hna axulune la ketre ka icilekeu me Solomona, Hadada qa Edoma, ketre atrene la hnanyijoxu e Edoma. 15 Ngöne lo ijine Dravita a ngaa angetre Edoma, hnei Ioaba, lo tane isi hna keleme la itre ka mec, me mekune troa humuthe la nöjei trahmanyi ne Edoma. 16 (Ke eje hi, hnei Ioaba me nöjei trahmanyi ne Isaraela hna pane lapa e cili koi 6 lao treu, uti hë la Ioaba a ase humuth asë la itre trahmanyi ne Edoma.) 17 Ngo hnei Hadada hna kötr me itre xa hlue ne la keme i angeic, itre atre Edoma. Nge hnei angatr hna kötr a tro Aigupito. Ngöne la ijine cili, nekönatre pala kö Hadada. 18 Angatr a trotrije pi la nöje Midiana,* me tro kowe la hnapapa ne Parana. E cili, angatr a xome jë la itre xa atren ne Parana, me tro e Aigupito thei Farao, joxu ne Aigupito. Ame hnei Farao hna hamë hnalapa koi Hadada, me xen me hnepadro. 19 Tru la ihnimi Farao koi Hadada, matre Farao a hamë angeice pi la jini ne la föi nyidrë, isola Tapenes.* 20 Thupene lai, hnene la jini Tapenes hna ce hnahon me Hadada la ketre nekö trahmany, Genubath la ëjen. Tapenes a hetru* nyëne jë hnine la hnalapa i Farao, nge Genubath a mel e hnine la hnalapa i Farao, nyipine la itre nekö i Farao.

21 E Aigupito, drenge hë Hadada laka, meköle hë Dravita me itre qaaqaa i nyidrë ngöne la mec, nge meci fe hë Ioaba tane lo trongene isi. Matre öni Hadada koi Farao: “Pane nue ni pi troa bëeke kowe la nöjeng.” 22 Farao a hnyingë angeice jë ka hape: “Hnauëne laka, eö a pi tro? Hetre ewekë ka pë thei eö la eö a lapa ngöne la hnalapang?” Sa jë hi Hadada ka hape: “Waea pëkö, ngo pane nue ni pi troa tro.”

23 Akötresie a axulune hmaca ju la ketre atr ka icilekeu me Solomona, Rezona nekö i Eliada. Hnei angeic hna kötr qaathene lo maseta i angeic, Hadadeza, joxu ne Zoba. 24 Ngöne lo ijine Dravita a ngaa* angetre Zoba, Rezona la tane la itre atrekënö, lo itre atr hnei angeic hna acasin. Hnei angatre hna tro Damaseko, me lapa e cili, me thapa la mus e Damaseko. 25 Haawe, Rezona la ketre ithupëjia me Isaraela, nge hna tun ngöne la ijine mus i Solomona. Hnei angeic hna nyixane la akötr hnei Hadada hna kuca koi Isaraela. Nge hnei angeic hna methinë Isaraela ngöne la ijine angeic a mus e Suria.

26 Nge hna icilekeu* fe hnei Ieroboama memine la joxu, ene lo nekö i Nebata atre Eferaima qa Zereda, lo hlue i Solomona. Zeruia la ëjene la thine i angeic, ketre sine föe eahlo. 27 Hane hi la kepin matre hnei Solomona hna xupe la Hna Ji Dro,* me thinge la gaa kaqa ne la ihag ne la traone i Dravita keme i nyidrë. 28 Atre ka atreine huliwa Ieroboama, matre ame hë la Solomona a öhne laka, ka huliwa catre angeic, hnei Solomona hna acili angeic troa atre thupëne la itre ka huliwa, itre hna hën qa ngöne la tribu i Iosefa. 29 Ngöne la ketre ijin, Ieroboama a tro ju qa Ierusalema. Nge e cahu gojeny, hnei angeic hna ixelë me Ahia, ketre perofeta qa Silo, nge nyidrëti a heetrë iheetr ka hnyipixe. Nyidroti casi hi ngöne la itre hlapa. 30 Ahia a kuie zezene pi la iheetre ka hnyipixe i nyidrë, me thawa koi 12 lao hnep. 31 Thupene lai, öni nyidrë koi Ieroboama: “Xome jë la 10 lao hnep, ke hane hi la hna qaja hnei Iehova Akötresi Isaraela, ‘Tro hë ni a thapa la baselaia qaathei Solomona, nge tro ni a hamë eö la 10 lao tribu. 32 Ngo tro pe hi ni a nue koi Solomona la ca tribu pi Dravita hlueng, me pi Ierusalema, lo traon hnenge hna iën nyipine la nöjei tribu ne Isaraela. 33 Tro ni a kuca lai pine angatr trotriji ni, ke hnei angatr hna thili koi Aseira, haze föe i angetre Zidona, me qëmeke i Kemosa haze ne Moaba, me qëmeke i Milekoma haze i angetre Amona. Tha trongëne hmaca kö angatr la hnenge hna qaja, memine la ka meköt koi ni, nge tha trongëne hë angatr la itre wathebong, me itre hnenge hna amekötin, tui Dravita keme i Solomona. 34 Ngo tha tro kö ni a thapa la baselaia asë qaathei Solomona, nge tro kö ni a nue angeic troa mus e mele pala kö angeic. Tro ni a kuca lai pine la ihniming koi Dravita, lo hnenge hna iën, ke hnei Dravita hna drenge la itre wathebong, me kuca la hnenge hna amekötin. 35 Tro pe ni a thapa la baselaia qaathene la nekö i Solomona, nge tro ni a hamë eö, nge tro hë eö a mus kowe la 10 lao tribu. 36 Ngo tro hi ni a nue la ca tribu kowe la nekö i angeic. Qa ngöne lai, tro pala hi a hetre laame* ka mele i Dravita qëmekeng e Ierusalema, lo traon hnenge hna iën göne la ëjeng. 37 Eö la hnenge hna iën, nge tro eö a mus hune la nöjei götran hnei eö hna ajan. Tro eö a joxu ne Isaraela. 38 E tro eö a drengethenge ni, me kuca la hnenge hna qaja, me kuca la ka meköti koi ni, me trongëne la itre wathebong, me itre hnenge hna amekötin, tune lo aqane i Dravita hlueng, haawe tro fe hë ni a ce me eö, nge tro ni a acile hutine la itre matra i ö, tune lo aqane kuca ni koi Dravita, nge tro ni a hamë Isaraela koi ö. 39 Nge tro ni a ahmahmane la itre matra i Dravita pine lai, ngo tha koi epine palua kö.’”

40 Ame hnei Solomona hna thele troa humuthi Ieroboama. Ngo hnei angeic hna canga kötre zae e Aigupito, thei Sisaka joxu ne Aigupito. Angeic a lapa ju e cili uti hë la Solomona a mec.

41 Nge ame la mele i Solomona, me nöjei huliwa i nyidrë, me inamacane i nyidrë, hna fejan asë hnine la tus i Solomona. 42 Haawe, 40 lao macatre ne musi Solomona hui Isaraela asë. 43 Thupene lai, hnei Solomona hna meköl memine la itre qaaqaa i nyidrë ngöne la mec, nge hna kelemi nyidrë hnine la Traone i Dravita keme i nyidrë. Matre Reoboama nekö i nyidrë, la hna acil troa nyihna i nyidrë.