Pane Tusi Itre Joxu
20 Ngöne la ketre drai, hnei Benadada joxu ne Suria hna acasine la trongene isi angeic, me 32 lao joxu me itre hos, me itre ikatr i angatr. Nge angeic a tro ju troa isi me Samaria. 2 Thupene lai, angeic a upe jë la itre ka tro fë maca koi Ahaba joxu ne Isaraela ngöne la traon, me hape: “Hane hi la maca i Benadada koi nyipë, 3 ‘Itre ewekënge la sileva me goole i eö, me itre föi eö ka mingöming, me itre nekö i eö trahmanyi ka mingöming.’” 4 Matre önine la joxu ne Isaraela ka hape: “Eni a drei nyipë joxung, nge ame ni me nöjei ewekëng, ke itre ewekë i nyipëti asë.”
5 E thupen, hnei itre ka tro fë maca hna bëeke koi Ahaba me hape: “Hane hi la maca i Benadada koi nyipë, ‘Ase hë ni lo qaja koi eö ka hape: “Traqa fë pi koi ni la sileva me goole i eö, me itre föe me itre nekö i eö trahmany.” 6 Matre elany, hmekune la hawa ce, tro ni a upe la itre atrenge koi eö, nge tro angatr a ithele hnine la uma i eö, me uma ne la itre atrene la hnalapa i eö. Nge tro angatr a eöthe la nöjei ewekë ka tru koi eö.’”
7 Ame hnei Ahaba hna acasine la itre qatr ne la nöj, me hape: “Öhne hi nyipunie laka, xecie hnyawa kowe la atre ce troa axulune la akötr koi së. Ase hë angeic sipone la itre föeng, me ha nekönge trahmany, me silevang, me gooleng, nge pëkö ca ewekë hnenge hna cipan.” 8 Matre önine la nöjei qatr, memine la nöj asë: “The drenge kö la atre cili, the kapa kö la sipo i angeic.” 9 Qa ngöne lai, öni Ahaba koi itre ka tro fë maca: “Hape jë kowe la joxunge ka hape, ‘Ame lo hnei nyipë hna pane sipon, tro ni a hamë nyipë. Ngo ame la sipo celë, thatreine kö ni kapa.’” Matre hnene la itre ka tro fë maca, hna tro ju troa qaja koi Benadada.
10 Ame hnei Benadada hna upe la maca celë: “Tro ni a lep apatrenyi Samaria, nge pine laka, ala nyimu catre la trongene ising, matre tha ijije kö la itre mutine dro ne Samaria troa atiqane la ca hnatrapaim kowe la itre atreng. Epi tro la itre haze a të la ngazo koi ni, e tha kuca kö ni lai!” 11 Ame hnene la joxu ne Isaraela hna iupi fë maca koi Benadada: “The tro kö la atre heetrë iheetr ne isi a selë angeic tune la atre una.” 12 Ame la Benadada a kapa la maca cili, angeic a ce ij me itre xa joxu ngöne la itre tate i angatr. Matre canga öni angeice jë hi kowe la itre atre i angeic ka hape: “Hnëkë jë troa isi!” Matre angatr a hnëkë jë troa isi me Samaria.
13 Ngo hnene la ketre perofeta hna tro koi Ahaba joxu ne Isaraela, me hape: “Hane hi la maca i Iehova, ‘Öhne hi eö la itre atr ka ala nyimu celë? Enehila, tro ni a aijijë eö troa ngaa angatr, nge tro hë eö a atre laka, Iehova ni.’” 14 Matre öni Ahaba: “Tro ni a ngaa angatr jëne drei?” Nge sa jë hi la perofeta ka hape: “Hane hi la hna qaja hnei Iehova, ‘Jëne la itre thupëtresij ka xatuane la itre he ne nöje* i eö.’” Nge öni Ahaba koi angeic ka hape: “Tro drei a tro fë la isi?” Matre önine la perofeta: “Nyipë!”
15 Ame hnei Ahaba hna e la etrune la itre trahmanyi hna musinën hnei itre he ne nöj, nge ala 232 angatr. Thupene lai, nyidrëti a e jë la itre trahmanyi ne Isaraela, nge ala 7 000 angatr. 16 Matre itre sooc a tro ju qa ngöne la traon e midi, nge ka hnaitö Benadada memine lo 32 lao joxu ka ce xöle me angeic, fene la itre itate i angatr. 17 Nge ame hë la kola tro hnei itre ka xatuane la itre he ne nöj, hnei Benadada hna canga upe la itre ka waipengöne la nöj troa wange la ka traqa. Matre hnei angatr hna thuemacanyi angeic laka, hetre itre trahmanyi ka tro qa Samaria. 18 Öni angeice jë hi: “Maine angatr a thele tingeting, xolouth amele angatre ju. Nge maine angatr a thele isi, xolouth amele angatre ju fe.” 19 Ngo ame ju hi la kola trotrije la traon hnei itre ka xatuane la itre he ne nöj, me itre trongene isi ka ixötrethenge, 20 hnei angatr hna isa humuth la ca ithupëjia. Matre hnei angetre Suria hna ikötreny, nge angetre Isaraela a huzu angatre jë. Nge hnei Benadada joxu ne Suria hna kötre hune hos, nge ce angeic me itre xa ka ti hos. 21 Ngo hnene la joxu ne Isaraela hna tro qa ngöne la traon, nge tha mano kö nyidrë humuthe la itre sooc ne Suria ka ti hos, me ka ti ikatr. Matre tru catre la hnei nyidrëti hna lepi* angetre Suria.
22 E thupen, hnene la perofeta hna tro hmaca troa wange la joxu ne Isaraela, nge öni angeic: “Tro jë, nge acatrene jë la itre sooce i nyipë, nge mekune hnyawa ju la nyine tro nyipëti a kuca, ke tro hmaca la joxu ne Suria a isi me nyipë ngöne la kola xejë la ketre macatre.”
23 Önine la itre atresi ne la joxu ne Suria ka hape: “Ame la Akötresi angatr, ke haze ne la wetr, celë hi la angatr a ngaa easë. Ngo e tro sa isi me angatr ngöne la gaa paapa, tro hë sa ngaa angatr. 24 Matre hane hi la nyine tro nyipëti a kuca, helëne pi la itre joxu ka nyi tane la trongene isi, nge nyihna i angatre jë hnei itre gavena. 25 Thupene lai, acasine jë la ketre trongene isi, thenge lo etrune lo pane trongene isi i nyipë ka luz, casi hi la etrune la itre hos me ikatr. Nge tro fe sa isi me angatr ngöne la gaa paapa, matre tro hë sa ngaa angatr.” Ame hnene la joxu hna kapa la eamo i angatr, me trongën asë.
26 Matre ame hë la kola xejë la ketre macatre, hnei Benadada hna hëne la itre sooc ne Suria, me tro Afeka troa isi me Isaraela. 27 Nge hna hane fe hëne la itre sooc ne Isaraela, me thue a i angatr. Nge angatr a tro ju kowe la itre sooc ne Suria. Ngo ame la itre sooc ne Isaraela a cil qëmekene la angetre Suria, ceitu i angatr me lue neköi tro nani, nge ame pena la angetre Suria, angatr a haöth asë la gaa paapa. 28 Matre hnene la atr ne la nyipi Akötresie hna tro kowe la joxu ne Isaraela, me hape: “Hane hi la hna qaja hnei Iehova, ‘Pine laka, hnei angetre Suria hna qaja ka hape, “Iehova la haze ne la wetr, ngo tha haze ne gaa paapa kö,” tro hë ni a aijijë eö troa ngaane la ka ala nyimu celë. Nge tro hë epuni a atre laka, Iehova ni.’”
29 Matre traqa koi 7 lao drai ne iqëmekekeu la lue trongene isi. Nge ame hë ngöne la hna 7 ne drai, kola nyiqaane isi. Nge ngöne la ca drai, hnene la itre sooc ne Isaraela hna humuthe la 100 000 lao sooc ne Suria ka trongë ihnadro. 30 Hnei itre xan hna kötr a tro Afeka, me zae hnine la traon. Ngo hna kei trane la ala 27 000 lao sooc ka kötre mel hnene la itra etë ne la traon. Nge hna kötre fe hnei Benadada kowe la traon, me zae ngöne la hnahag gaa mi ne la ketre uma.
31 Nge itre atre i angeic a qaja jë koi Benadada ka hape: “Hne huni hna drenge ka hape, itre ka itrotrohni* la itre joxu ne Isaraela. Matre pane nue huni pi troa tro kowe la joxu ne Isaraela, nge tro huni a othe la bëek ka tru thenyin ngöne la itre gö hun, me atu he hnei itre eno, maine jë, tro nyidrëti a nuamele nyipë.” 32 Ame hnei angatr hna othe la bëek ka tru thenyin ngöne la itre gö i angatr, me atu he hnei eno. Thupene lai, angatr a tro ju kowe la joxu ne Isaraela, me hape: “Hlue i nyipë Benadada a sipone ka hape, ‘Eni a pi mel.’” Matre öni Ahaba joxu ne Isaraela: “Mele pala kö angeic? Trejine me eni lai.” 33 Trotrohnine ju hi angatr ka hape, hatrene ka loi, nge Ahaba a nyipi ithanata. Matre öni angatr: “Trejin me nyipëti lai.” Nge öni Ahaba: “Tro jë, nge bëeke sai angeice jë.” Ame hnei Benadada hna tro ju koi Ahaba, nge Ahaba a ati angeice jë hune la ikatre i nyidrë.
34 Öni Benadada jë hi: “Ame la itre traon hnei kaka hna thapa qaathei keme i nyipë, tro hmaca ni a hamëne koi nyipë. Nge tro hë nyipëti a acili hna maketr* e Damaseko, tune lo aqane kuca i kaka e Samaria.”
Nge öni Ahaba jë hi: “Pine laka, ase hë nyiso isisinyikeu, tro hë ni a nue eö troa bëeke kowe la hnalapa i eö.”
Celë hi aqane isisinyikeu i Ahaba me Benadada, nge nyidrëti a nue angeic pi troa bëeke kowe la hnalapa i angeic.
35 Ame hnene la ketre nekö i perofeta* hna qaja kowe la ketre ka hape: “Pane faitrë ni pi,” ke Iehova la ka upi angeic. Ngo xele kö la ketre perofeta. 36 Matre öni angeice hmaca: “Pine eö tha drei Iehova, ame hë la eö a tro qaatheng, tro la liona a humuthi eö.” Nge nyipici hi, ke ame hë la angeic a nango iananyi, fetra pi la ketre liona a hej ameci angeic.
37 Thupene lai, hnene la perofeta hna sipon kowe la ketre trahmanyi ka hape: “Pane faitrë ni pi.” Matre hnene lai trahmanyi hna jeng me eatrë angeic.
38 Ame hnene lai perofeta hna tro troa treqene la joxu ezine la gojeny. Hnei angeic hna atuthe la luemeke i angeic, matre tha tro kö a wangatrehmekunyi angeic. 39 Nge ame ju hi la kola cili thenge hnei Ahaba joxu ne Isaraela, hnene la perofeta hna suene ka hape: “Eni lo a tro kowe la gaa isi catr, nge hnene la ketre sooc hna tro fë koi ni la ketre hna oth, me hape, ‘wai angeic ju, nge e traqa jë angeice kötr, tro eö a kuiëne la ca talane* sileva. Nge e tha kuiëne kö eö, tro ha humuthi eö hna i angeic.’ 40 Ngo ame ju hi la eni a kuca la ketre ewekë, patre pi hi lai hna oth.” Matre önine la joxu: “Nga tro hë eö a xeni pun, hnei eö kö hna sipu qaja la pune koi eö.” 41 Ame hnene la perofeta hna canga xometrije la ka atuth la luemeke i angeic, nge canga öhne ju hi la joxu ka hape, ketre perofeta hi. 42 Nge önine la perofeta: “Hane hi la hna qaja hnei Iehova, ‘Pine eö nuamelen lo atr hnenge hna mekun troa humuth, tro ha humuthi eö hna i angeic, nge tro la nöje i eö a mec, hnane la mele ne la nöje i angeic.’” 43 Matre hnene la joxu ne Isaraela hna bëeke kowe la hnalapa i nyidrë e Samaria, nge kola wesitramenyi me hace hni.