Hnaaluene Tusi Itre Joxu
1 Thupene la meci Ahaba, hnei angetre Moaba hna icilekeu me Isaraela.
2 Nge ame lo Ahazia a cil ngöne la hnalapa i nyidrë e Samaria, kei pi hi nyidrë qa ngöne la hna pewal ne la hnahage i nyidrë, e koho hune la uma, nge eatre ju hi nyidrë. Matre nyidrëti a upe jë la itre ka tro fë maca, troa hnyingë Belezebuba haze ne Ekerona ka hape, tro kö a meu la eatre i nyidrë. 3 Ngo önine la angela i Iehova koi Elia* qa Tisebi ka hape: “Mejë jë, nge tro jë troa ixelë me itre hna up hnene la joxu ne Samaria, nge hape jë, ‘Hapeu, pëkö Akötresie e Isaraela matre epuni a hnyinge koi Belezebuba haze ne Ekerona? 4 Hane hi la maca i Iehova kowe la joxu, “Tha tro hmaca kö eö a mejë qa ngöne la ili ö, ke tro hë eö a mec.”’” Thupene lai, hnei Elia hna tro hmaca pi.
5 Nge hnene la itre ka tro fë maca hna bëeke kowe la joxu, matre ame hë la angatr a traqa, önine la joxu: “Hnauëne laka, epuni hmaca ha la?” 6 Nge sa jë hi angatre ka hape: “Kolo ke hnene la ketre trahmanyi hna ixelë me eahun, me hape, ‘Hane hi la maca i Iehova, “Hapeu, pëkö Akötresie e Isaraela matre eö a hnyinge koi Belezebuba haze ne Ekerona? Pine lai, tha tro hmaca kö eö a mejë qa ngöne la ili ö, ke tro hë eö a mec.”’” 7 Matre önine la joxu ka hape: “Ka tune kaa lo atre ixelë me epun, nge ka qaja la maca cili?” 8 Sa jë hi angatre ka hape: “Nyidrëti a heetrë iheetr hna kuca hnei pene öni, nge hna othe la gö i nyidrë hnei beletr hna kuca hnei kupeine öni.” Nge canga öni joxu ka hape: “Elia qa Tisebi lai.”
9 Ame hnei joxu hna upe la ketre tane sooc me 50 lao sooc, matre troa bëeke sai Elia. Nge Elia a nango lapa hune la wetr, matre hnene la tane sooc hna elë koi angeic me hape: “Atre ne la nyipi Akötresie, öni joxu, uti pi.” 10 Ngo sa jë hi Elia ka hape: “Maine nyipici laka, atre ne la nyipi Akötresieti ni, tro la eë a mala qa hnengödrai, me dreuthetriji eö memine la 50 lao sooce i eö. ” Ame hnene la eë qaathei Akötresie hna mala qa hnengödrai, me dreuthetrije la tan, memine la 50 lao sooce i angeic.
11 Thupene lai, hnei joxu hna upe hmaca la ketre tan, me 50 lao sooc troa thei Elia. Nge hnene la tan hna tro troa qaja kowe la perofeta ka hape: “Atre ne la nyipi Akötresie, önine la joxu koi nyipë ka hape, uti pi enehila.” 12 Ngo sa jë hi Elia ka hape: “Maine nyipici laka, atre ne la nyipi Akötresieti ni, tro la eë a mala qa hnengödrai me dreuthetriji eö, memine la 50 lao sooce i eö. ” Ame hnene la eë qaathei Akötresie hna mala qa hnengödrai, me dreuthetrije la tan, memine la 50 lao sooce i angeic.
13 Ame hnene la joxu hna upe hmaca la hnaakönine tan, memine la 50 lao sooc. Ngo hnene la tane cili hna elë koi Elia, me sa iwatingöneca qëmeke i Elia, me hape: “Ekölöini atre ne la nyipi Akötresie, epi tro la meleng, memine la mele ne la itre atre celë a tru koi nyipë. 14 Alua mala ha qa hnengödrai la eë, nge hnen ej hna dreuthetrij la lue pane tan, memine la isa 50 lao sooce i nyidro. Ngo enehila, epi tro la meleng a tru koi nyipë.”
15 Ame hnene la angela i Iehova hna qaja koi Elia ka hape: “Ce uti pi me angeic, nge the xoue angeice kö.” Haawe, Elia a mejë jë, me ce uti me angeic troa wange la joxu. 16 Matre öni Elia kowe la joxu ka hape: “Hane hi la maca i Iehova, ‘Hnei eö hna upe troa hnyinge koi Belezebuba haze ne Ekerona, ngo hapeu, pëkö Akötresie e Isaraela? Hnauëne laka, tha hnyinge kö eö koi nyidrë? Pine lai, tha tro hmaca kö eö a mejë qa ngöne la ili ö, ke tro hë eö a mec.’” 17 Ame hna meci hnei Ahazia, tune lo hna qaja hnei Iehova jëne Elia. Pëkö nekö i Ahazia trahmany, matre hna acili Iorama pë hë troa joxu. Hna traqa lai, ngöne la hnaaluene macatre ne musi Iorama* joxu ne Iudra, nekö i Iehosafata.
18 Nge ame la mele i Ahazia, me nöjei huliwa i nyidrë, hna fejan asë hnine la itre itus ne la mele ne la itre joxu ne Isaraela.