Hnaaluene Tusi Itre Joxu
5 Naamana la ketre atre ka tru, nge angeice la tane la itre sooc ne la joxu ne Suria. Tru la hnei joxu* hna hnimi angeic, ke hnei Iehova hna jën angeic, matre hune* jë angetre Suria ngöne la isi. Ngo ame pe, ka lepera* la atre ka catre celë. 2 Ngöne la ketre ijin angetre Suria a tro troa isi, angatr a xome pi qa ngöne la nöje Isaraela la ketre nekönatr jajiny. Nge hna xomi nyën troa ketre hlue ne la föi Naamana. 3 Ngöne la ketre drai, önine la nekö jajiny kowe la maseta i nyën ka hape: “Ekölöini, ka loi e tro la joxung a tro troa wange la perofeta e Samaria! Nge tro hë la perofeta a nyinyine la lepera i nyidrë.” 4 Matre angeic* a tro ju troa qaja kowe la joxu i angeic, la hna qaja hnene la nekö jajiny ne Isaraela.
5 Ame hnene la joxu ne Suria hna qaja ka hape: “Canga tro jë! Tro ni a hamë tusi koi eö thatraqane la joxu ne Isaraela.” Matre Naamana a tro ju, me xometrongëne la 10 lao talane* sileva, me 6 000 lao pies gool, me 10 lao iheetr. 6 Angeic a hamëne pi kowe la joxu ne Isaraela la tus, ka qaja ka hape: “Eni a ce upe koi eö la tusi celë, me Naamana hlueng, matre tro eö a nyinyine la lepera i angeic.” 7 Ngo ame hë la kola e la tus hnene la joxu ne Isaraela, nyidrëti a kuie zezene pi la iheetre i nyidrë, me hape: “Ke Akötresieti ni matre troa humuth maine amelen? Nge kolo pena a upe koi ni la atre celë, me upi ni troa nyinyine la lepera i angeic! Öhne hi epun, angeice la a thele iwesitrë.”
8 Ngo ame hë la Elisaia, atre ne la nyipi Akötresie a drenge laka, hnene la joxu ne Isaraela hna kuie zezene la iheetre i nyidrë, angeic a canga upe pi la maca celë koi nyidrë: “Hnauëne la nyipëti a kuie zezene la iheetre i nyipë? Pane upe jë koi ni la atre cili, matre tro angeic a atre laka, hetre perofeta e Isaraela.” 9 Naamana a tro ju me itre hos, me itre ikatre i angeic kowe la hnalapa i Elisaia. 10 Ngo hnei Elisaia hna upe koi angeic la ketre atre tro fë maca, troa qaja ka hape: “Tro jë troa a 7 lao si ngöne la hneopegejë Ioridrano. Nge tro ha meu la ijöne i ö, nge tro ha aloine la meci ö.” 11 Ame hna elëhni Naamana, nge angeic a tro ju me hape: “Öninge pena kö, ‘Tro nyidrëti a tro koi ni, me cile qëmekeng. Nge tro hë nyidrëti a thithi* koi Iehova Akötresi nyidrë, me atë la ime i nyidrë hune la leperang, me aloinyi ni.’ 12 Nge hapeu, tha sisitria kö la hneopegejë ne Abana me Farapa e Damaseko, hune la itre hneopegejë asë e Isaraela? Nge tha ijijinge kö troa si e cili matre loi hmaca pi ni?” Matre hnei Naamana hna bëeke fë trenge hni.
13 Ngo hnene la itre hlue i angeic hna tro troa wai angeic me hape: “Maseta,* maine kolo ju a upi nyipë hnene la perofeta troa kuca la ketre ewekë ka jol, tro nyipëti lai a dreng, eje hi? Nga hnauëne laka, tha kuca kö nyipë, ke hnei angeice hi hna hape, ‘Sie pi matre loi jë eö’?” 14 Ame hnei Naamana hna uti kowe la Ioridrano, me a 7 lao si,* tune lo aqane qaja ne la atre ne la nyipi Akötresie. Nge meu pi hi la ikupeine i angeic kösë ikupeine nekönatr, nge loi pi hi angeic.
15 Thupene lai, hnei angeic me itre sinatronge* i angeic hna bëeke hmaca kowe la atre ne la nyipi Akötresie. Nge Naamana a cile qëmekene la perofeta me hape: “Ame enehila, atre hë ni laka, pëkö Akötresie e cailo fen, ngo e Isaraela hmekuje hi. Matre, epi kapa ju la ahnahnang.”* 16 Ngo öni Elisaia ka hape: “Qëmeke i Iehova Akötresie ka mel, lo hnenge hna nyihluen,* tha tro kö ni a kapa la ahnahna i eö.” Matre Naamana a iele nyidrëti hmaca jë, ngo xele pala hi Elisaia. 17 Ame hnei Naamana hna qaja ka hape: “Nga pane hamë ni pi la trepadro ne la nöje ce, matre nyi ehnefene la lue miul, ke tha tro hmaca kö ni a tro fë huuj ne dreuth asë, me itre xa huuj kowe la itre xa haze, ngo koi Iehova hmekuje hi. 18 Nge epi tro Iehova a nue la ngazonge celë: Ame la kola tro hnene la joxung troa thil hnine la uma ne hmi i Rimona, nyidrëti a hujane la imeng, nge tro fe ni a thil hnine la uma ne hmi i Rimona. Matre ame la eni a troa thil hnine la uma ne hmi i Rimona, epi tro Iehova a nue la ngazong.” 19 Nge öni Elisaia jë hi: “Tro jë cememine la tingeting.” Matre Naamana a tro ju, nge nango nanyi hë angeic. 20 Ame hnei Gehazi, lo hlue i Elisaia, lo atre ne la nyipi Akötresie, hna mekune ka hape: ‘Ka lolo pala ha la thiina ne la masetang koi Naamana atre Suria. Tha kapa kö nyidrë la hnei angeic hna traqa fë. Ngo qëmeke i Iehova Akötresie ka mel, tro ni a huzu angeic, me xome la ketre ewekë qaathei angeic.’ 21 Matre hnei Gehazi hna nyinyape thenge Naamana. Nge ame ju hi la Naamana a öhne laka, hetre ka huzu angeic, angeic a uti pi qa hune la ikatre i angeic, me tro kowe lai atr. Öni angeice jë hi: “Hetre ewekë?” 22 Sa jë hi Gehazi ka hape: “Pëkö. Ngo hnene la masetang hna upi ni troa sipo nyipë ka hape, ‘Dreng, hna nyipi traqa la lue thupëtresij kowe la hnalapang, nyidroti a traqa qa ngöne la itre wetr ne Eferaima, nge lue nekö i perofeta. Matre pane hamëne pi koi nyidro la ca talane sileva, me lue iheetr.’” 23 Öni Naamana jë hi: “Hane hi la lue talan, xome jë.” Nge hnei angeic hna iele Gehazi troa xom, me atuthe la lue talane sileva hnine la lue watreng, me lue iheetr. Nge angeic a upe pi la lue hlue i angeic, troa tro fë qëmeke i Gehazi.
24 Matre ame hë la Gehazi a traqa e Ofela,* angeic a xome pi la lue watreng, me amë hnine la hnalapa i angeic. Nge angeic a upe hmaca pi la lue hlu. Nge ame hë la nyidroti a tro, 25 Gehazi a bëeke jë kowe la maseta i angeic. Matre öni Elisaia: “Qa i eö kaa Gehazi?” Öni angeic: “Maseta, eni pala hi la.” 26 Matre öni Elisaia: “Ame la mekuna i ö ka hape, thatre kö ni laka, hnei ö hna huzune lo atr, nge hnei angeic hna ut qa hune la ikatre i angeic troa drei ö? Nge hapeu, ijine tro la a kepe sileva, me iheetr, me itre hlapa oliv, me itre hlapa vin, me itre mamoe, me itre kau, me itre hlu trahmanyi me jajiny? 27 Nga tro hë la lepera i Naamana a fedre koi ö, me itre matra i ö uti hë epine palua.” Ame hnei Gehazi hna canga lö pi, ke wië kaca ha angeic tune la kiona.*