Ezekiela
22 Nge hnei Iehova hmaca hna ewekë koi ni, me hape: 2 “Hapeu nekö i atr, ka hnëkë kö eö troa qaja la pun* kowe la traon ka ihumuth, me amamai angeic la nöjei huliwa ka sis i angeic? 3 Qa i ö troa qaja ka hape: ‘Hane hi la hna qaja hnei Iehova Joxu Ka Sisitria: “Traone fe atre aneni madra, traqa ha la ijine i ö, eö lo ka kuca la itre idrola ka sis* matre puingazo hë eö, 4 hetre ngazo i ö hë pine la madra hnei ö hna anenin, nge puingazo hë eö pine la itre idrola i ö ka sis. Hnei ö hna asasaqene la pun ne la itre drai i ö, nge traqa ha la pun ne la itre macatre i ö. Haawe, tro hë ni a kuca matre tro la itre atr a methinë eö, nge tro la itre nöj a hnyimasai ö. 5 Tro la itre nöj ka easeny me ka nanyi a hnyimasai ö, ke puingazo hë la ëje i ö, nge tiqa ha eö hnei gomegom! 6 Dreng! Ame asë hi la itre tan ka lapa e Isaraela, ke angatr a huliwane la mus i angatr matre troa aneni madra. 7 Kola methinëne la kem me thin thei ö me qenatrekënön la trenyiwa, me qanangazon la nekön hna mecitrij hnei kem, memine la sine föe.”’”
8 “‘Eö a wangangazon la itre hnë hmi koi ni, me adrone la itre sabathing. 9 Hetrenyi thei ö la itre ka silitrengathoi nge ka ajane troa aneni madra. Thei ö, kola öni la itre ewekë hna huujën kowe la itre idrola hune la itre wetr, nge thei ö, kola kuci ngazo. 10 Thei ö, kola ahmahmane la ili ne la kem,* me angazone la föe ka puingazo, ke ka meci föe. 11 Nge thei ö, ketre trahmanyi a kuca la nyine sisin memine la föe ne la atre lapa easenyi angeic, nge ketre trahmanyi a thaipiën la tresi i nyidrë hnene la aqane ujë i nyidrë ka sis, nge ketre mina fe a angazone la xa i angeic, lo nekön ne la keme i angeic. 12 Thei ö, kola kepe mani troa ihumuth, nge eö fe a hamën göi thupen maine hamën göi troa kepe mani atruny,* nge eö a qenatrekënön la atre lapa easenyi ö. Eje hi, ase hnyawa ha eö thëthëhmi ni,” öni Iehova Joxu Ka Sisitria.
13 “‘Dreng! Eni a sisin me xexe la lue imeng la eni a goeën la etrune mani hnei ö hna kapa, qa ngöne la hna huliwa qenatrekënö, me itre ihumuth hna kuca thei ö. 14 Hapeu, tro kö eö a catr* nge tro kö la lue ime i ö a catr, e tro ni a lepi ö? Ase hë ni Iehova ithanata, nge tro kö ni a eatrën. 15 Tro ni a aije eö nyipine la itre atr, me aisaije eö nyipine la itre nöj; tro hë ni a nyipune la aqane puingazo i ö. 16 Tro ha thaipië eö qëmeken la itre nöj, nge tro hë eö a atre e cili laka, Iehova ni.’”
17 Thupene lai, hnei Iehova hmaca hna ewekë koi ni me hape: 18 “Nekö i atr, tha nyipiewekë hë koi ni la nöje Isaraela, tune la itre sikori.* Ceitui angatr asë hi memine la kopa, me kapa, me fao, me plo ngöne la ifur. Angatre hnyawa hi la itre wamine sikori qa ngöne la sileva.
19 “Matre hane hi la hna qaja hnei Iehova Joxu Ka Sisitria: ‘Pine laka, tha nyipiewekë hë epun tune la sikori, eni ha acasi epun e Ierusalema. 20 Tune la kola xawane la sileva, me kopa, me fao, me plo, me kapa ngöne la ifur, me ipicone la eë matre ahmun, tro fe ni a acasi epun ngöne la elëhning me trengehning, me ahmunyi epun hnene la enyine la qëng. 21 Tro ni a acasi epun me ufe koi epun la idreuthine la elëhning, nge tro hë epuni a hmu ngöne la traon. 22 Tune la sileva hna ahmun ngöne la ifur, tro fe epuni a hmu ngöne la traon. Nge tro hë epuni a atre laka, ase hë ni Iehova nenge koi epuni la trengehning.’”
23 Nge hnei Iehova hmaca hna ithanata koi ni me hape: 24 “Nekö i atr, hape jë koi angeic: ‘Eö la ketre nöj hna tha ahmitrötrën, nge hna cipane la mani ngöne la ijine elëhni. 25 Hnene la itre perofeta thei ö hna ce thë la ngazo, tune la liona ka ho nge ka heje zezene la tha ne ej. Angatr a öni hatrëne la itre atr. Angatr a thapa la itre mo me itre ewekë ka tru thupen. Nge zöi angatr la kola tiqa hnei sine föe thei ö. 26 Hnene la itre atre huuj thei ö hna ena la wathebong, nge angatre pala hi a adrone la itre hnë hmi koi ni. Ame koi angatr, ceitune hi la ewekë ka hmitrötr memine la ketre ewekë menu. Nge tha qaja amamane kö angatr la eisapengöne la ka puingazo memine la ka hmitrötr. Xele kö angatr ma metrötrëne la itre sabathing, nge hna adronyi ni thei angatr. 27 Ceitune hi la itre nekö i joxu thei ö me itre luko ka heje zezene la tha i angatr; angatr a aneni madra me humu atr, matre kepe mani qa ngöne la hna huliwa qenatrekënö. 28 Nge hnene la itre perofeta thei ö hna peidrën awiën la itre huliwa i angatr ka ngazo. Angatr a meköl goeëne la thoi, me perofetane la itre ewekë ka tha nyipici kö; öni angatr: “Hane hi la hna qaja hnei Iehova Joxu Ka Sisitria,” ngacama tha hnei Iehova kö hna ithanata. 29 Hnene la itre atrene la nöj hna huliwa qenatrekënö me atrekënö. Hnei angatr hna qanangazon la ka aja ixatua memine la ka pë ewekë, me huliwa qenatrekënö kowe la trenyiwa, me cipane la meköt koi angeic.’
30 “‘Hnenge hna thel nyipi angatr la ketre atr ka pele ihag etë, maine ka cil ngöne la gaa thöni troa isigöline la nöj, matre thupën ej. Ngazo pe, tha öhne ju kö ni la atre cili. 31 Qa ngöne lai, tro ni a neng hui angatr la elëhning, me apatrenyi angatr hnene la idreuthine la trengehning. Tro hë ni a kuca matre tro angatr a xeni pun la aqane ujë i angatr,’ öni Iehova Joxu Ka Sisitria.”