Hnaaluene Tusi Itre Joxu

7 Öni Elisaia jë hi: “Pane drenge ju la maca i Iehova, hane hi la hna qaja hnei Iehova, ‘Elany, hmekune la hawa ce, ngöne la qëhnelö e Samaria,* tro ha ca sekel la ca sea* ne farin ka lolo. Nge tro ha ca sekel* la lue sea ne bali.’” 2 Ame hnene la tan hna mejiune kow hnei joxu, hna qaja kowe la atre ne la nyipi Akötresie, ka hape: “Maine tro ju hë Iehova a fe la hnengödrai, ngo tro lai* a eatre tune kaa?” Matre sa jë hi Elisaia ka hape: “Tro hi eö a goeën, ngo tha tro kö eö a hane xen.”

3 Nge hnene la 4 lao lepera hna lapa ngöne la hnë lö ne la traon, nge angatr a iqajakeune ka hape: “Hnauëne laka, easë a treqene troa mec e celë? 4 E tro sa lö kowe la traon, tro sa mec, ke pëkö xeni e cili. Nge e tro sa lapa e celë, tro pala hi sa mec. Ngo ma ka loi e tro sa tro kowe la lapa ne sooc i angetre Suria, ke e pëkö hnei angatr hna kuca koi së, ka mele hë së lai, ngo maine tro angatr a humuthi së, ke tro pala hi sa mec.” 5 Matre ame hë e hej, hnei angatr hna mejë troa tro kowe la lapa ne sooc i angetre Suria. Nge traqa ju hi angatr a öhne laka, pëkö ca atr.

6 Ke eje hi, hnei Iehova hna kuca matre tro angetre Suria a drenge la itre mejene ikatr me itre hos, tune la mejene la ketre trongene isi ka tru. Matre hnei angatr hna iqajakeune ka hape: “Drenge hi epun, hnene la joxu ne Isaraela hna hëne la itre joxu ne Heth, me Aigupito troa lepi së!” 7 Matre ame hë la kola hejihej, hnei angatr hna canga mejë, me kötr qa la. Nge lapa ju pe hi la itre itate i angatr, me itre hos, me itre boliko. Hnei angatr asë hna trotrije la lapa i angatr, me kötre mel.

8 Matre ame hë la kola traqa hnene la 4 lao lepera kowe la lapa ne sooc, angatr a lö ju hnine la ketre itat, me xeni me ij. Thupene lai, hnei angatre hna eöthe la itre sileva, me gool, me itre iheetr hnine la itat, nge angatr a tro ju troa juetrën. Ase jë hi, angatr a bëeke hmaca jë, me lö hnine la ketre itat, me eöth hmaca la nöjei pengöne ewekë, me juetrëne hmaca.

9 Ame hnei angatre hna iqajakeune ka hape: “Ka ngazo la thiina së, loi e tro sa qaja kowe la itre xane la maca ka loi celë. Ke e tha qaja kö së qëmekene troa kaqa ne lai, ke tro hë sa jol. Ngo ka loi pe tro sa thuemacane la hnalapa i joxu.” 10 Matre angatr a tro ju troa hëne la itre ka thupë qëhnelö, me qaja la ewekë ka traqa. Öni angatr: “Hne huni hna lö hnine la lapa ne sooc i angetre Suria, nge pëkö ca atr, nge pëkö ca mej. Itre hos hmekuje hi me itre boliko hna hnöth, memine la itre itat.” 11 Matre hnene la itre ka thupë qëhnelö, hna canga sue troa thuemacane la hnalapa i joxu.

12 Nge hnene la joxu hna canga mejë e hnenyipajidr me hape: “Tro ni a qejepengöne koi epun la mekuna i angetre Suria. Atre hi angatr laka, easë a mecijiin. Matre hnei angatr hna trotrije la lapa ne sooc, me zae hnine la itre hlapa. Nge angetre Suria a mekune ka hape, ‘Tro hë angatre lai a tro qa ngöne la traon, nge tro hë sa xolouth amele angatr. Nge tro fe sa lö hnine la traon i angatr.’” 13 Ame hnene la ketre atre i joxu hna qaja koi nyidrë ka hape: “Hane hi la nyine tro sa kuca. Loi e tro la itre xan a xome la 5 lao hos ka lapa pe hnine la traon. Nge tro angatr a tro troa wange la lapa. Matre e humuthi angatre jë, ka loi ju kö lai, hune la troa lapa e celë, me ce meci me easë angetre Isaraela.” 14 Matre hnene la joxu hna upe la itre xan troa tro kowe la lapa i angetre Suria. Hna hamë angatr la lue ikatr me itre hos, me hape: “Tro jë troa wang la lapa.” 15 Ame hnei angatr hna xötrethenge la gojenyi hna xom hnei angetre Suria, nge angatr a traqa ju e Ioridrano. Nge e cahu gojeny, kola meköle la itre iheetr, me itre xa ewekë hna nuetrij hnei angetre Suria, lo angatr a nyinyape hmohmo. Thupene lai, angatr a bëeke hmaca jë troa qaja koi joxu la nöjei ewekë hnei angatr hna öhn.

16 Matre hnene la nöj hna tro qa hnine la traon, me eöth asë la itre ewekë hnine la lapa ne sooc i angetre Suria. Pine lai, hna salemëne la ca sea ne farin ka lolo koi ca sekel, nge lue sea ne bali koi ca sekel, tune lo aqane qaja i Iehova. 17 Nge hnene la joxu hna ahnithe kowe la tane hnei nyidrëti hna mejiune kow, troa thupëne la qëhnelö ne la traon. Ngo meci ju hi angeic, ke hnene la nöj hna waja trongë angeic ngöne la hnë lö ne la traon. Matre eatre ju hi lo hna qaja hnene la atre ne la nyipi Akötresie, lo kola wai angeic hnene la joxu. 18 Eatre asë hi la hna qaja hnene la atre ne la nyipi Akötresie, lo öni angeic: “Hmekune la hawa ce, ngöne la qëhnelö e Samaria, tro ha ca sekel la ca sea ne farin ka lolo. Nge tro ha ca sekel la lue sea ne bali.” 19 Ngo hnene lo tane hna sa kowe la atre ne la nyipi Akötresie ka hape: “Maine tro ju hë Iehova a fe la hnengödrai, ngo tro lai* a eatre tune kaa?” Nge hnei Elisaia lo hna sa ka hape: “Tro hi eö a goeën, ngo tha tro kö eö a hane xen.” 20 Nge celë hi la ka traqa koi angeic, hnei angeic hna mec, ke hna waja trongë angeic hnene la itre atr ngöne la qëhnelö ne la traon.