Hnaaluene Tusi Itre Joxu
10 Ame Ahaba, traqa koi 70 lao nekö i nyidrë trahmany e Samaria. Ngo hnei Iehu hna cinyianyi tus koi itre neköi joxu ne Iezerela, me kowe la itre qatr, me kowe la itre ka thupëne la itre nekö i Ahaba me hape: 2 “Thei epun la itre nekö i Ahaba joxu, me itre ikatr, me itre hos, me itre traon hna xupi hagen, me itre jia ne isi. Ngo ame hë la epun a troa kapa la tusi celë, 3 iëne jë la ketre atr ka sisitria nge ka maca* thene la itre neköne la joxu i epun, nge alapa angeice ju hune la theron ne la keme i angeic. Nge isigöline jë la lapa ne la joxu i epun.”
4 Ngo angatr a isa meci hnei xou me hape: “Luetre la lue joxu, ngo tha hune kö nyidro! Matre tro sa atreine hune tune kaa?” 5 Ame hnene la atre thupëne la hnalapa i joxu memine la gavena, me itre qatr, me itre ka thupë nekönatr, hna iupi fë la maca celë koi Iehu: “Eahuni la itre hlue i nyipë, nge tro huni a kuca asë la hnei nyipëti hna upi hun. Tha tro kö huni a acili ketre joxu. Kuca jë la hnei nyipë hna mekun.”
6 Matre hnei Iehu hna cinyianyine la hnaaluene tus koi angatr me hape: “Maine ce epuni me eni, nge aja i epun troa drei ni, nga traqa fë pi elanyi ngöne la hawa ce, la hene la itre neköne la joxu i epun e Iezerela.”
Nge ame lo 70 lao nekö i joxu, nyudren a lapa thene la itre atr ka tru ne la traon, nge angatre la ka hetru nyudren. 7 Matre ame hë la angatr a kapa la tus, angatr a xome jë la 70 lao neköi joxu, me humuthi nyudren. Nge angatr a amë ju la itre he i nyudren hnine la itre treng, me tro fë koi Iehu e Iezerela. 8 Ame hna traqa pi la ketre atre tro fë maca koi Iehu me hape: “Ase hë angatr traqa fë la itre he ne la itre nekö i joxu.” Matre öni Iehu: “Thawa luëne pi ngöne la hnë lö ne la traon, nge amë ju e cili uti hë e hmakany.” 9 Nge ame la drai thupen e hmakany, hnei Iehu hna lö pi, me cile qëmekene la ka ala nyimu me hape: “Pëkö ngazo* i epun. Ngo ame ni, hnenge hna tra thethine la joxung me humuthi nyidrë. Ngo ame la itre atre ce, drei la ka humuthi angatr? 10 Haawe, lapa atre ju laka, tha tro kö a gufa la trengewekë i Iehova, memine la hnei Iehova hna qaja göne la fami Ahaba. Ase hë Iehova eatrëne lo hnei nyidrëti hna qaja jëne Eli, lo hlue i nyidrë.” 11 Nge hnei Iehu hna humuthe fe la fami Ahaba ka lapa e Iezerela, me itre sinee i nyidrë, me itre atr ka tru me itre atre huuj ka huliwa koi nyidrë. Pëkö ca ka mel hnei Iehu hna nu.
12 Ame hnei Iehu hna tro e Samaria. Nge ngöne la gojeny, hetre hnalapa ne la itre ka thupë mamoe, ketre götrane lai hna hnöthe la itre mamoe.* 13 Nge hnei Iehu hna ixelë e cili memine la itre trejine me Ahazia joxu ne Iudra. Matre öni Iehu koi angatr ka hape: “Drei epun?” Öni angatr: “Itre trejin me Ahazia. Eahuni a tro troa wang la itre nekö i joxu, me itre neköne la thine i joxu.” 14 Matre öni Iehu: “Xolouthi angatre ju!” Nge hnene la itre sooc hna xolouth me humuthi angatr, hmekune la sima ne la itre ka thupë mamoe. Ala 42 angatr, nge pëkö ca ka mel hnei Iehu hna nu.
15 Matre ame hë la Iehu a tro qa lai, hnei angeic hna ixelë me Ionadaba, nekö i Rekaba. Nge hnei Iehu hna ibozu* me Ionadaba, me hnyingë angeice ka hape: “Ka pexeje kö la hni ö koi ni, tune la aqane pexeje la hninge koi ö?”
Öni Ionadaba: “Öö.”
Nge sa jë hi Iehu ka hape: “Line pi la ime i ö.”
Matre, Ionadaba a line pi la ime i angeic, nge Iehu a ati Ionadaba jë hune la ikatr i nyidrë. 16 Nge öni Iehu: “Treilo! Nge tro kö eö a öhne laka, cane methinge la troa mele thoi* koi Iehova.” Ame hnei Iehu me Ionadaba hna ce tro hune la ikatre i nyidrë. 17 Nge traqa ju hi nyidrëti e Samaria, matre nyidrëti a humuth asë jë la fami Ahaba e Samaria. Pëkö ca ka mel, tune lo aqane qaja i Iehova jëne Eli.
18 Ame hnei Iehu hna hëne asë la nöj me hape: “Hnei Ahaba hna nango atrunyi Baala, ngo ame kö Iehu, tro ha tru catre la aqane tro angeic a atrunyi Baala. 19 Haawe enehila, tro epuni a hëne asë la itre perofeta i Baala, me itre ka hmi koi Baala, me itre atre huuje i Baala. Tha tro kö a patre la ketre, ke eni a troa kuca la ketre huuj ka tru koi Baala. Nge tro ha humuthe la ka patr.” Ngo Iehu pe a tra thethi angatr, ke aja i nyidrë troa apatren asë la itre ka nyihlue i Baala.
20 Öni Iehu hmaca: “Amekötine* jë la ijine tro sa ce atrunyi Baala.” Ame hnei angatr hna amekötin.
21 Thupene lai, hnei Iehu hna upe la itre ka tro fë maca ngöne la nöje Isaraela, ame hna traqa asë la itre ka nyihlue i Baala, nge pëkö ca ka patr. Angatr a lö ju hnine la uma ne hmi Baala, nge ka tiqa hnyawa la uma, qaane ju hi la ketre can uti hë la ketre can. 22 Matre, hnei Iehu hna qaja kowe la ketre atre thupë hnahag ka co ka hape: “Hamëne pi la itre iheetr ne hmi kowe la itre ka nyihlue i Baala.” Ame hnene la atr thupë hnahag hna hamën asë la itre iheetr kowe la itre ka nyihlue i Baala. 23 Nge hnei Iehu hna lö hnine la uma ne hmi Baala me Ionadaba, nekö i Rekaba. Öni Iehu jë hi kowe la itre ka nyihlue Baala: “Pane goeëne hnyawa ju e celë ka hape, pëkö hlue i Iehova, ke tro hi a lapa la itre ka nyihlue i Baala.” 24 Nge itre hlue i Baala a tro ju troa huujëne la itre huuj, me itre huuj ne dreuth asë. Ame hnei Iehu hna acile la 80 lao sooc e kuhu trön, me qaja koi angatr ka hape: “Eni a ahnithi angatre la koi epun. Ngo maine troa kötre la ketre, tro ha humuthi epun.”
25 Matre ame hë la Iehu a ase huujëne la itre huuj ne dreuth asë, öni Iehu kowe la itre atre thup* me itre tan ka ixatua: “Lö jë, nge humuthi angatre asë pi! Nge the nue ketre kö troa kötr!” Ame hnene la itre atre thup me itre tan, hna humuthi angatr hnei taua, me triji angatr e kuhu trön. Nge hnei angatr fe hna tro ngöne la götran e hnine* la uma ne hmi Baala. 26 Nge angatr a xome asë jë la itre idrola ka hmitrötr qa hnine la uma ne hmi Baala, me dreuthetrij asë. 27 Nge angatr a thëtrije pi la hnasaatr ka hmitrötr i Baala, memine la uma ne hmi Baala, matre xupi hnë troagö.* Nge eje pala kö uti hë enehila.
28 Haawe, celë hi aqane apatrenyi Baala hnei Iehu qa ngöne la nöje Isaraela. 29 Ngo ame pe, tha hnei Iehu kö hna iananyi memine la itre ngazo hna kuca hnei Isaraela, fene la musi Ieroboama nekö i Nebata. Nge goi tha nuetrije fe nyidrë la itre kau gool e Bethela me Dana. 30 Matre, öni Iehova koi Iehu: “Pine laka, lolo la aqane ujë i ö, nge hnei eö hna kuca la ka loi koi ni, lo eö a të asë la hnenge hna amekötin kowe la fami Ahaba, tro hë la itre nekö i ö trahmany, a lapane la theron ne Isaraela koi 4 lao xötr atr.” 31 Ngo tha pexeje kö la aqane trongëne Iehu la Wathebo i Iehova Akötresie Isaraela. Nge tha hnei nyidrëti kö hna iananyi memine la itre ngazo hna kuca hnei Isaraela, fene la musi Ieroboama.
32 Nge ngöne la ijine cili, hnei Iehova hna nyiqane thapa la itre xa götran e Isaraela, ase jë ketre hnepadro matre ketre hnepadro. Nge tha mano kö Hazaela lepe trongë Isaraela ngöne la nöj asë, 33 qaan e Ioridrano götrane koië, memine la nöje Gileada (ene la nöje i angetre Gada, me Reubena, me Manase). Me qaan e Aroera, ezine la hnathup ne Arenona uti hë e Gileada me Basana.
34 Nge ame la mele i Iehu me nöjei huliwa i nyidrë, memine la ecatre i nyidrë, ke hna fejane asë hnine la itre itus ne la mele ne la itre joxu ne Isaraela. 35 Ame hnei Iehu hna meköl me itre qaaqaa i nyidrë ngöne la mec, nge hna kelemi nyidrë e Samaria. Ame hna acili joxu Iehoaza nekö i nyidrë, troa nyihna i nyidrë. 36 Hnei Iehu hna mus hui Isaraela koi 28 lao macatre e Samaria.