Hnaaluene Tusi Itre Joxu
12 Ngöne la kola 7 lao macatre ne musi Iehu, hna acili Ioasa troa joxu. Hnei nyidrëti hna musi e Ierusalema koi 40 lao macatre. Zibia la ëjene la thine i nyidrë, nge föe ne Bere-seba eahlo. 2 Hnei Ioasa hna kuca la loi koi Iehova, ngöne lo ijine Iehoiada atre huuj a hamë ithanata koi nyidrë. 3 Ngo tha hna apatrene kö la itre hnë hmi gaa hmitrötr, nge itre atrene la nöje pala kö a tro fë huuj e cili, me huhajine la itre huuje i angatr.
4 Öni Ioasa jë hi kowe la itre atre huuj ka hape: “Hlem asë jë la mani hna traqa fë kowe la uma ne hmi i Iehova, lo hna traqa fë kowe la itre huuj ka hmitrötr, memine la nyine troa isa kuiën, memine la hna kapa qaathene la itre ka sisiny, memine la hna isa hamëne xeci hnene la itre atr ka traqa kowe la uma ne hmi Iehova. 5 Nge tro hë la itre atre huuj a kapa la mani qaathene la itre ka hamën,* me huliwan ej nyine nyihnyawane la itre götrane gaa thöni ne la uma.”
6 Ngo traqa ha koi 23 lao macatre ne mus i Ioasa, nge tha hna nyihnyawane pala kö la uma ne hmi hnene la itre atre huuj. 7 Ame hnei Ioasa joxu hna hë Iehoiada atre huuj, me itre xa atre huuj me hape: “Hnauëne laka, tha kuca hnyawane kö epuni la Uma? The kepe mani hmaca kö, ngo tro hi a kapa göi troa nyihnyawane la uma ne hmi.” 8 Qa ngöne lai, tha hnei itre atre huuj hmaca kö hna kepe mani qaathene la nöj, nge tha pelethe kö angatr la itre gaa thöni ne la uma ne hmi.
9 Ame hnei Iehoiada atre huuj, hna xome la ketre neköi pua, me axulune la thingen, me amë ezine la ita ne huuj ngöne la götrane maca, hmekune la hnë lö kowe la uma ne hmi Iehova. Itre atre huuj ka thupë qëhnelö, a kuiën e cili la mani hna traqa fë kowe la uma ne hmi Iehova. 10 Matre ame hë la angatr a öhne laka, tiqa ha hnei mani, kola traqa hnene la sekreter i joxu memine la atre huuj ka sisitria, troa hleme* la mani hna traqa fë hnine la uma ne hmi Iehova, me e la etrun. 11 Nge e ase hë e la mani, nyidroti a hamëne pi koi itre atrekë hnëqane troa nyihnyawane la uma ne hmi Iehova. Nge itre tane huliwa a huliwane la mani cili, troa nyithupene la itre ka huliwa sinöe, me itre ka huliwa batima, itre ka nyihnyawane la uma ne hmi Iehova, 12 me itre ka xupi uma, me itre ka thupe etë. Nge angatre fe a itö sinöe me etë hna thupathupa, nyine nyihnyawane la uma ne hmi Iehova. Nge angatre fe a huliwane la mani cili, troa nyithupene la nöjei ewekë hna ajan, matre kuca hnyawane la uma ne hmi.
13 Ngo ame la mani hna traqa fë kowe la uma ne hmi Iehova, tha hna huliwane kö nyine kuci itrap sileva, me itre ifizi, me itre kap, me itre trutru, me nöjei ewekë gool me sileva, thatraqane la uma ne hmi Iehova. 14 Hna hamëne hi la mani cili koi itre ka huliwa, nge angatr a huliwane la mani, nyine kuca hnyawane la uma ne hmi Iehova. 15 Nge pine laka, hna mejiun kowe la itre atre cili, tha hna hnyingë angatre kö lo aqane trongene la mani nyine nyithupene la itre ka huliwa. 16 Ngo ame la mani thatraqane la itre huuj ne ietra, memine la mani ne la itre huuj thatraqane la ngazo, ke tha hna xome kö nyine nyihnyawane la uma ne hmi Iehova, ngo hna hamëne pe kowe la itre atre huuj.
17 Ngöne la ijine cili, hnei Hazaela joxu ne Suria, hna tro troa isi me Gatha, me thapa la nöj. Thupene lai, hnei nyidrëti hna mekun troa isi* me Ierusalema. 18 Matre hnei Ioasa joxu ne Iudra, hna eöth asë la itre ahnahna ka hmitrötr ne la itre qaaqaa i nyidrë, ene Iehosafata, me Iorama, me Ahazia, itre ahnahna hna hamën hnene la itre joxu ne Iudra thatraqane la hmi.* Nge nyidrëti a xome ju fe la itre ahnahna ka hmitrötr i nyidrë, memine la gool qa ngöne la hnahag ne ami ahnahna ne la uma ne hmi i Iehova, me ngöne la hnalapa i joxu. Thupene lai, nyidrëti a iupi fë asë jë koi Hazaela joxu ne Suria, ame hnei angeic memine la trongene isi angeic hna mejë qa Ierusalema.
19 Nge ame la mele i Ioasa me nöjei huliwa i nyidrë, hna fejan asë hnine la itusi ne la mele ne la itre joxu ne Iudra. 20 Thupene lai, hnene la itre ka huliwa koi joxu hna ce mekun troa humuthi nyidrë. Nge angatr a humuthi nyidrëti ju ngöne la uma e Bethe-Milo,* ngöne la gojenyi ka uti a tro Sila. 21 Nge ame la ëjene la itre hlu ka humuthi nyidrë, ke Iozakara nekö i Simeatha, me Iehozabada nekö i Somera. Ame hna kelemi Ioasa me itre qaaqaa i nyidrë ngöne la Traone i Dravita. Nge hna acili joxu Amazia nekö i nyidrë, troa nyihna i nyidrë.