Deuteronomi

28 “Nge maine tro eö a drenge la nine i Iehova Akötresi ö, me trongëne la itre wathebo hnenge hna hamë eö ngöne la drai celë, tro hë Iehova Akötresi ö a acili ö hune la nöjei nöj asë e celë fen. 2 Hane hi la itre manathithi hnei ö hna troa kapa, e tro pala hi ö a drenge la nine i Iehova Akötresi ö:

3 “Tro hë eö a manathith ngöne la traon, me ngöne la hlapa.

4 “Tro ha manathithi la itre nekö i ö, me itre wen ne la hlapa i ö, me itre nekön ne la itre si i ö, me itre neköi kau i ö, me itre neköi mamoe i ö.

5 “Tro ha manathithi la trenge i ö, memine la nyine xupi falawa i ö.

6 “Tro hë eö a manathithi ngöne la nöjei tronge i ö, me nöjei huliwa i ö.

7 “Tro Iehova a aijijë eö troa ngaan la itre ithupëjia ka cile koi ö. Tro angatr a uti koi ö qa ngöne la ca gojeny, me kötre eö qa ngöne la 7 lao gojeny. 8 Tro hë Iehova a amanathithine la itre hnë ami xen i ö, memine la nöjei ewekë hnei ö hna mekun troa kuca; eje hi, tro nyidrëti a amanathithi ö ngöne la nöj hnei Iehova Akötresi ö hna hamë eö. 9 Tro Iehova a acili ö troa nöje ka hmitrötr i nyidrë, tune lo hnei nyidrëti hna sisiny koi ö, e tro pala hi ö a thupëne la itre wathebo i Iehova Akötresi ö, me trongëne la itre jë i nyidrë. 10 Loi e tro la nöjei nöj asë e celë fen a öhne laka, eö la ka xom la ëje i Iehova, nge e cili, tro hë angatr a xoue eö.

11 “Tro Iehova a kuca matre mana pi la itre nekö i ö, me itre si i ö, me itre wen ne la ihnadro i ö, ngöne la nöj hnei Iehova hna sisiny kowe la itre qaaqaa i ö troa hamë eö. 12 Tro hë Iehova a fe koi ö la hnë ami ewekë ka lolo i nyidrë e hnengödrai, me maniëne la nöje i ö ngöne la nyipi ijin, me amanathithine la nöjei huliwa i ö asë. Nge tro hë eö a hamëne kowe la itre nöj ka nyimutre, ngo tha tro kö eö a hane sipo ewekë. 13 Tro Iehova a kuca matre tro eö a tune la he, ngo tha tune kö la pun; e tro pala hi ö a drenge la itre hna amekötin hnei Iehova Akötresi ö, lo hnenge hna ahnith koi ö ngöne la drai celë, ene la troa metrötrën me trongën itre ej, ke tro eö a lapa e koho, ngo tha e kuhu feni kö. 14 Nge qa ngöne la itre hna amekötin hnenge hna ahnithe koi ö ngöne la drai celë, tha tro kö eö a jea kowe la götrane maca me mi, me xötrethenge me nyihluen la itre xaa haze.

15 “Ngo maine tha drenge kö eö la aqane ewekë i Iehova Akötresi ö, nge e tha trongëne kö eö la itre wathebo me itre hna amekötin hnenge hna hamë ö ngöne la drai celë, ke hane hi la itre hnëjin ka troa traqa koi ö:

16 “Tro hë eö a hnëjin ngöne la traon, me ngöne la itre hlapa.

17 “Tro ha hnëjine la trenge i ö, memine la nyine xupi falawa i ö.

18 “Tro ha hnëjine la itre nekö i ö, me itre wen ne la hlapa i ö, me itre neköi kau i ö, me itre neköi mamoe i ö.

19 “Tro hë eö a hnëjin ngöne la nöjei tronge i ö, me nöjei huliwa i ö.

20 “Tro Iehova a axulune la hnëjin, me iamenumenu, me akötr,* ngöne la nöjei ewekë hnei ö hna mekun troa kuca. Nge tro hë eö a canga patr me mec, pine la itre huliwa ka ngazo hnei ö hna kuca, nge pine eö nuetriji nyidrë. 21 Tro Iehova a kuca matre tha tro kö a patre la mec qaathei ö, uti hë la troa apatrenyi ö qa ngöne la nöj hnei ö hna troa thapa. 22 Tro hë Iehova a axulune koi ö la meci ne idrefitr,* me fiva,* me keu, me idreuthine la ngönetrei, me taua, me itre wene feja ka qaqacil, me xojene fao;* tro la itre akötre cili a xötrethenge eö, uti hë la tro eö a patr. 23 Nge hune la he i ö, tro la hnengödrai a tune la kopa, nge e kuhu fen, tro la ihnadro a tune la fao. 24 Tro Iehova a saze la mani ne la nöje i ö koi xaxau me paudra, nge tro ej a trotro koi ö qa hnengödrai uti hë la tro eö a patr. 25 Tro Iehova a nue eö kowe la itre ithupëjia me eö. Nge tro eö a uti koi angatr qa ngöne la ca gojeny, me kötre angatr qa ngöne la 7 lao gojeny. Tro hë la nöjei nöj e celë fen a sisi ö. 26 Nge tro la itre ngönetrei i ö ka mec a ithuane la itre waco ne hnengödrai, me nöjei öni e celë fen, pëkö ala cas ka troa axouenyi nyudren.

27 “Tro Iehova a lepi ö hnei ithewek qa Aigupito, me hnei fini wene ka akötr,* nge tro ha xuje la ngönetrei i ö me si ixelek, nge pëkö nyin ka ijij. 28 Tro Iehova a amenu eö, me atimekë eö, me axouenyi ö. 29 Tro eö a thelethel e hnaipajö, tune la timek ka thelethel ngöne la gaa mit. Pëkö huliwa hnei ö hna troa kuca ka troa eatr, nge tro pala hi a xom la itre ewekë i ö, me atrekënö eö, nge pëkö ka troa amele eö. 30 Tro hë eö a othe la ketre föe, ngo tro ha angazo nyën. Tro hë eö a xupi uma, ngo tha tro kö eö a lapan. Tro hë eö a eënyi vin, ngo tha tro kö eö a ije la itre pane wen. 31 Tro ha humuthe la kau i ö qëmekei ö, ngo tha tro kö eö a öni. Tro ha atrekënö la boliko i ö qëmekei ö, nge tha tro hmaca kö ej a bëek. Tro ha nue la itre mamoe i ö kowe la itre ithupëjia, ngo pëkö ka troa amele eö. 32 Tro ha nue la itre nekö i ö trahmany me jajiny kowe la ketre nöj; tro pala hi ö a treije pi angatr, ngo pëkö hnei ö hna atreine kuca. 33 Ame asë hi la itre wen ne la hlapa i ö, me itre hnei ö hna menuën, ke tro ha xen hnene la ketre nöj hnei ö hna thatre, nge tro pala hi a thapa la itre ewekë i ö, me thaipië eö. 34 Tro hë eö a hmo hnene la itre ewekë hnei ö hna öhn.

35 “Tro hë Iehova a lepe la lue iwatingöneca i ö me lue itrepë i ö, hnene la itre ithewek ka catrehnin, nge tha ka meu kö. Tro ha lapan asë la ngönetrei i ö, qane ju hi la iwaca uti hë la he. 36 Tro hë Iehova a tro sai ö, memine la joxu hnei ö hna acil kowe la ketre nöj hnei ö me itre qaaqaa i ö hna thatre. E cili, tro eö a nyihluene la itre xaa haze hna tratraun hnei sinöe me etë. 37 Tro ha sisi ö hnene la itre nöj hnei Iehova hna tro sai ö kow, nge tro hë angatr a xele ma wai ö me hnyimasai ö.

38 “Tru la itre wene feja hnei ö hna troa jum ngöne la hlapa i ö, ngo co hi la hnei ö hna troa menuën, ke tro ha xen hnene la sipa. 39 Tro eö a traan me eënyin la itre vin, ngo tha tro kö eö a iji waina qa ngön, me menuën la itre wen, ke tro ha xuj asë hnei itre wanak. 40 Tro ha hetre ioliv* ngöne la zi i ö, ngo tha tro kö eö a hane sië oel, ke tro ha mala la itre wene oliv. 41 Tro hë eö a hnaho nekö trahmany me nekö jajiny, ngo tha tro kö angatr a lapa thei ö, ke tro ha kötre sai angatr. 42 Tro la hnënge öni ka co* a xeni asë la itre sinöe i ö, me itre wen ne la hlapa i ö. 43 Ame la trenyiwa ka lapa thei ö, tro angeic a draië hui ö, ngo ame kö eö, tro eö a ipië trootro. 44 Tro angeic a hamë ewekë koi ö, ngo thatreine kö eö troa hane hamë ewekë i angeic. Tro hë angeic a tune la he, nge tro pë hë eö a tune la pun.

45 “Tro ha traqa koi ö la nöjei hnëjine cili, tro itre ej a weji ö me lepi ö uti hë la tro eö a patr, ke tha hnei ö kö hna dreng la aqane ewekë i Iehova Akötresi ö, nge tha hnei ö kö hna trongëne la itre hna amekötin, me itre wathebo hnei nyidrëti hna hamëne koi ö. 46 Tro hë itre ej a tune la ketre hatren nyine hmekë eö me itre matra i ö uti hë epin, 47 ke tha hnei ö kö hna nyihlue i Iehova Akötresi ö cememine la madrin me loi hni, ngöne lo kola tru la itre ewekë i ö. 48 Tro Iehova a upe la itre ithupëjia koi ö, nge tro hë eö a nyihlue i angatr ngacama eö a meci hnei pi xen me pi ij, nge tha heetre hnyawa kö eö, nge pëhë ca ewekë i ö. Tro hë nyidrëti a atë la fao ne iothekeun hune la nyinawa i ö, uti hë la tro nyidrëti a apatrenyi ö.

49 “Tro Iehova a axulune koi ö la ketre nöj ka traqa qa gaa nany, qa ngöne la ketre cane la fen, nge tro ej a aca tro lepi ö tune la ketre aeto ka sesë troa thapa la tha ne ej, nge tha tro kö eö a trotrohnine la qene hlapa ne la nöje cili, 50 ketre nöj ka calogitre iqëmek, nge ka pë metrötr kowe la itre qatr me pë utipin kowe la itre xötr ka co. 51 Tro hë angatr a öni la itre nekön ne la itre si i ö, me itre wenen la hlapa i ö, uti hë la troa apatrenyi ö. Tha tro kö angatr a nue koi ö la itre munëne wene feja, me waina ka hnyipixe, me oel, me neköi kau, me neköi mamoe, uti hë la troa apatrenyi ö. 52 Tro hë angatr a lapa xötreithi ö: tro hë angatr a umë eö ngöne la itre traon* ne la nöje i ö, uti hë la troa kei la itre ihag atraqatre i ö, lo hnei ö hna mejiune kow. Tro angatr a lapa xötreithe la nöjei traon asë ne la nöj hnei Iehova Akötresi ö hna hamë eö. 53 Nge pine laka, tro la ithupëjia me eö a lapa xötreithi ö, nge tro ha jole catre la mele i ö, tro hë eö a öni la itre sipu nekö i ö, ene la ijöne la itre nekö i ö trahmanyi me jajiny, lo hna hamë eö hnei Iehova Akötresi ö.

54 “Ame fe la trahmanyi ka menyik nge ka loi thiina nyipi epun, ke tha tro kö angeic a utipine la trejin me angeic, memine la föe hnimina i angeic, me itre nekö i angeic trahmanyi ka mele pe. 55 Goi tha tro fe angeic a ce thawa me angatre la ijön ne la itre nekö i angeic trahmanyi hnei angeic hna troa öni, ke tro ha pë xen, qa ngöne laka, jole catre pi hë la mel ngöne la itre traon hna troa lapa xötreith hnene la ithupëjia me eö. 56 Nge ame fe la föe ka menyik nge ka loi thiina, nge ka tha hane kö ketr la ihnadro hnene la iwaca i angeic, tha tro kö angeic a utipine la fö hnimina i angeic, memine la nekö i angeic trahmany maine jajiny, 57 ketre tune fe kowe la trengene hnaho ka ut nyipine la lue ca i angeic, maine kowe la nekö i angeice trahmany hnei angeic hna hnahon, tro hë angeic a öni juetrë, ke jole catre pi hë la mel ngöne la itre traon hna troa lapa xötreith hnene la ithupëjia me eö.

58 “Maine tha trongëne hnyawane kö eö la nöjei trengewekë ne la wathebo celë, hna cinyianyine ngöne la itusi celë, nge maine tha xouene kö eö la ëje ka sisitria nge nyine xouen, lo ëje i Iehova Akötresi ö, 59 tro hë Iehova a lepi ö me itre matra i ö hnene la itre akötre ka tru, itre akötre ka tru nge ka hut, me itre meci ka ngazo nge ka hut. 60 Tro hë nyidrëti a axulune koi ö lo itre mec hnei ö hna xouen e Aigupito, nge tha tro kö itre ej a patre qaathei ö. 61 Ketre, tro fe Iehova a axulune koi ö la nöjei pengöne mec, me akötr, hna tha cinyianyin ngöne la tusi Wathebo celë, uti hë la troa apatrenyi ö. 62 Nge maine nyipici laka, ala nyimu hë epun tune la itre wëtresij e hnengödrai, ngo tro ha acone la etru i epun, ke tha hnei epuni kö hna drenge la nine i Iehova Akötresi epun.

63 “Nge tune la aqane madrine Iehova troa amanathithi ö me akökötrenyi ö, tro fe Iehova a madrine troa lepi ö me apatrenyi ö. Nge tro ha fejetriji ö qa ngöne la nöj hnei ö hna troa thapa.

64 “Tro Iehova a isa ije eö ngöne la itre nöj asë, qa ngöne la ketre can uti hë la ketre cane la fen. Nge e cili, tro hë eö a nyihluene la itre haze hna tratraun hnei sinöe me etë, lo itre haze hnei ö me itre qaaqaa i ö hna thatre. 65 Nyipine la itre nöje cili, tha tro kö eö a mele tingeting, nge tha tro kö a pë hnë mano kowe la waca i ö. Ngo tro pe Iehova a hamë eö la hni ka hnehengazo, me luemeke ka lö, nge tro ha pë mejiune i ö. 66 Tro pala hi a thele troa humuthi ö, nge tro eö a mel ngöne la xou e lai me jidr; thatre kö eö laka, tro kö eö a mel. 67 Nge pine la xou ka lapane la hni i ö, memine la hna troa öhn hnene la luemeke i ö, tro hë eö a qaja e hmakany ka hape: ‘Epi canga heji pi!’ nge e hej, tro eö a hape: ‘Epi canga hmakanyi pi!’ 68 Eje hi, tro Iehova a bëeke sai ö a tro Aigupito jëne he, lo gojenyi hnenge hna wathebo eö troa trongëne hmaca. Nge e cili, tro hë eö a salemë eö nyine hlu kowe la itre ithupëjia, ngo pëkö ka troa pi itö eö.”