Ezekiela
28 Hnei Iehova hmaca hna ithanata koi ni, me hape: 2 “Nekö i atr, hape jë kowe la joxu ne Turo: ‘Hane hi la hna qaja hnei Iehova Joxu Ka Sisitria:
“Pine laka, pi tru hë la hni i ö, eö pala hi a selën ka hape: ‘Ketre akötresieti ni.
Eni a të hune la theron ne la ketre akötresie nyipine la hnagejë.’
Ngo ame pe, ketre atre hi ö, nge tha Akötresieti kö,
Ngacama eö ju hë a mekun ka hape, Akötresieti ö.
3 Matre ka inamacane kö eö hui Daniela?
Hapeu, pëkö ewekë hna juetrëne koi ö?
4 Trenamo hë eö hnene la inamacane i ö me aqane waiewekë i ö,
Nge eö a xawa gool me sileva ngöne la itre hnahag ne ami mo i ö.
5 Trenamo catre hë eö, ke atreine catr eö kuci biznes,
Matre pi tru hë la hni i ö hnene la etrune la trenge manie i ö.”’
6 “‘Haawe, hane hi la hna qaja hnei Iehova Joxu Ka Sisitria:
“Pine laka, eö a mekun e kuhu hni i ö laka, ketre akötresieti ö,
7 Tro hë ni a hëne la itre trenyiwa troa lepi ö, ene la nöje ka iaxösisi catre kö,
Tro angatr a uthe la taua i angatr matre apatrene la itre ewekë ka mingöming hnei ö hna kapa jëne la inamacane i ö
Nge tro angatr a adrone la elolo i ö.
9 Matre hapeu, tro pala kö eö a qaja kowe la atre humuthi ö ka hape, ‘akötresieti ni’?
Tha tro kö eö a akötresie, ngo tro hi ö a ketre atre menu ngöne la ime ne la itre ka adronyi ö.”’
10 ‘Jëne la ime ne la itre trenyiwa, tro eö a mec tune la itre atr hna tha xötrehatren,
Ke ase hë ni qaja,’ öni Iehova Joxu Ka Sisitria.”
11 Nge hnei Iehova hmaca hna ewekë koi ni, me hape: 12 “Nekö i atr, thinge jë la nyima ne latresi* göne la joxu ne Turo, nge hape jë koi angeic: ‘Hane hi la hna qaja hnei Iehova Joxu Ka Sisitria:
“Eö hi lo tulu ne la ka pexej,*
Ka inamacan eö nge ka pexej la emingömingö i ö.
13 Eö hi lo e Edrena, ngöne la djardë i Akötresie.
Hna heetrë eö lo hnene la nöjei etë ka tru thupen:
Ene la sadio, me topazio, me aloma; me berulo, me soama, me iasepi; me safairo, me semerado, me bereketh;
Hna kuca hnei gool la itre nyine acatrene la itre etë cili.
Hna hnëkëne lai ngöne lo drai ne xupi ö.
14 ö hi lo kerubi hnenge hna iën* troa ithupë.
Hnei ö hna cil hune la wetr ka hmitrötre i Akötresie, nge eö lo a tro nyipine la itre etë eë.
15 Qane lo kola xupi ö, pëkö nyine qaja göne la aqane ujë i ö
Uti hë la kola öhne thei ö la thiina ka tha meköti kö.
16 Pine eö kuci biznesi lapa,
Tiqa ha eö hnei iakötrë, matre hnei ö pë hë hna kuca la ngazo.
Kerubi fe ka ithupë, tro hë ni xom ananyi ö qa ngöne la itre etë eë,
Me helë eö qa hune la wetre i Akötresie me apatrenyi ö, ke pui ngazo hë eö.
17 Pi tru hë la hni i ö hnene la emingömingö i ö.
Ase hë eö angazon la inamacane i ö hnene la elolo i ö.
Tro ni a triji ö e kuhu hnadro.
Tro ni a kuca matre tro la itre joxu a goeë eö.
18 Pine la etrune la itre ngazo i ö memine la aqane huliwa qenatrekënö i ö, hnei ö hna adron la itre hnë hmi i ö.
Tro hë ni a amelene la ketre eë thei ö, nge tro ej a dreuthetriji ö.
Tro ni a kuca matre hnatresije pi ö hune la ihnadro, qëmekene la itre ka goeë eö.
19 Tro asë hi la itre ka atre eö nyipine la itre nöj, a goeëtili ö me sesëkötre ngazo.
Canga tro hi a traqa la pun ka ngazo koi ö,
Nge tro hë eö a patre palua.”’”
20 Ame hnei Iehova hmaca hna ewekë koi ni me hape: 21 “Nekö i atr, xei jë koi Zidona, nge perofetane jë la akötr ka troa traqa koi angeic. 22 Qa i ö troa qaja ka hape: ‘Hane hi la hna qaja hnei Iehova Joxu Ka Sisitria:
“Zidona fe, tro ni a cile koi ö nge tro ha atrunyi ni nyipi ö;
Nge tro ha mama laka, Iehova ni, e eatrëne jë ni la hna amekötin koi angeic, nge e tro ha ahmitrötrë ni jën angeic.
23 Tro ni a upe la itre meci ka ixötrekeu koi angeic, nge tro ha neni la madra ngöne la itre gojenyi angeic.
Tro la itre hna humuth a kei nyipi angeic, ngöne la kola traqa la taua troa lepi angeic qa ngöne la nöjei götran;
Nge tro ha mama e cili laka, Iehova ni.
24 “‘“Thupene lai, tha tro hmaca kö a lapa xötreithe la nöje Isaraela hnene la itre feja ka ixöj me itre ka ithiny, ene la itre nöj ka methinë angeic. Nge tro ha mama e cili laka, Iehova ni Joxu Ka Sisitria.”’
25 “‘Hane hi la hna qaja hnei Iehova Joxu Ka Sisitria: “Ame hë la eni a troa acasin la nöje Isaraela, me abëekë angatr qa ngöne la itre nöj hna aisaije angatre kow, ke tro la itre nöj a ahmitrötrë ni jën angeic. Nge tro hë angatr a lapane la nöje i angatr, lo hnenge hna hamën koi Iakobo hlueng. 26 Tro angatr a mele tingeting e cili, me xupi uma, me traa vin. Eje hi, tro hë angatr a mele tingeting, e ase hë ni eatrën la hna amekötin kowe la itre ka lapa xötreithi angatr, me ka methinë angatr. Nge tro hë angatr a atre laka, Iehova ni Akötresi angatr.”’”