Ezekiela

46 “Hane hi la hna qaja hnei Iehova Joxu Ka Sisitria: ‘Tro ha thinge la qëhnelö e koië ne la kur ka he hnin, ngöne la 6 lao drai ne huliwa. Ngo tro kö a fe ngöne la drai sabath, me ngöne la drai ne la treu ka hnyipixe. 2 Tro la tan a tro qa ngöne la kur e kuhu trön, me lö qa ngöne la poretiko ne la qëhnelö, me cil ezine la hune qëhnelö. Nge tro pë hë la itre atre huuj a huujëne la itre huuj ne dreuth asë i angeic, me itre huuj ne tingetinge i angeic, nge tro angeic a thil ngöne la qene qëhnelö; thupene lai, tro hmaca angeic a tro. Ngo tha tro kö a thinge la qëhnelö e tha hejiheji pala kö. 3 Tro fe la itre atrene la nöj a thile qëmekei Iehova ngöne la qene qëhnelö cili, ngöne la itre sabath me itre drai ne la treu ka hnyipixe.

4 “‘Ame la huuj ne dreuth asë hna troa tro fë koi Iehova hnene la tan ngöne la drai sabath, ke 6 lao neköi mamoe ka pë engazon, me ca mamoe trahmany ka pë engazon. 5 Ame göne la mamoe trahmany, tro angeic a tro fë la ca efa,* nge ame göne la itre neköi mamoe, tro pë hë angeic a hamën la hnei angeic hna hetreny. Nge e ca efa, tro angeic a nyixan hnei ca hin* ne oel. 6 Nge ame göne la drai ne la treu ka hnyipixe, tro angeic a tro fë la ca neköi kau trahmany ka pë engazon qa ngöne la hnëng öni, me 6 lao neköi mamoe, me ca mamoe trahmany; tro asë hi la itre öni cili a pë engazon. 7 Ame göne la neköi kau trahmany, tro angeic a tro fë la ca efa, me ca efa göne la mamoe trahmany. Nge ame göne la itre neköi mamoe, tro pë hë angeic a hamën la hnei angeic hna hetreny. Nge e ca efa, tro angeic a nyixan hnene la ca hin ne oel.

8 “‘E tro la tan a lö, tro angeic a lö qa ngöne la poretiko ne la qëhnelö, me tro hmaca qa lai. 9 Nge ame la itre atrene la nöj a traqa qëmekei Iehova ngöne la itre ijine feet, tro angatr a lö qa ngöne la qëhnelö e kolopi matre troa hmi, me tro hmaca qa ngöne la qëhnelö e kolojë. Nge ame pena la itre ka traqa qa ngöne la qëhnelö ne kolojë, ke tro angatr a tro hmaca qa ngöne la qëhnelö ne kolopi. Tha tro kö la ala cas thei angatr a tro hmaca qa ngöne la qëhnelö hnei angeic hna lö, ke tro asë hi angatr a isa tro qa ngöne la qëhnelö qëmekei angatr. 10 Nge ame pena la tan thei angatr, ke tro angeic a lö, e lö asë hë la itre atr, me tro, e tro asë hë angatr. 11 Ame la itre huuj ne wene feja ngöne la itre drai ne feet me itre ijine feet, ke ca efa göne la neköi kau trahmany, me ca efa göne la mamoe trahmany, nge ame göne la itre neköi mamoe, tro pë hë a hamën la hna hetreny. Nge e ca efa, tro a nyixan hnei ca hin ne oel.

12 “‘Maine tro la tan a sipu tro fë huuj ne dreuth asë me huuj ne tingeting nyine ahnahna koi Iehova, tro ha fe koi angeic la qëhnelö e koië, nge tro hë angeic a tro fë la huuj ne dreuth asë me itre huuj ne tingetinge i angeic, tune lo aqane kuca i angeic e sabath. Nge ame hë la angeic a tro qa lai, tro hmaca a thinge la qëhnelö thupei angeic.

13 “‘E nöjei drai, qa i ö troa tro fë huuj ne dreuth asë koi Iehova, ene la ca neköi mamoe ka pë engazon, nge ka cas maine ka tha ca macatre pala kö. Tro eö a kuca lai e nöjei hmakany. 14 Nge tro fe eö a nyixane lai hnene la ca huuj ne wen feja hna tro fë e nöjei hmakany, ene la 2 kilo ne wene feja, nge ca litë oel me sin nyine thathane la nyipi farin; celë hi huuj ne wene feja hna troa tro fë lapane koi Iehova. Celë hi wathebo ka epine palua. 15 E nöjei hmakany, troa tro fë la ca neköi mamoe, memine la huuj ne wene feja me oel, nyine huuj ne dreuth asë hna tro fë lapan.’

16 “Hane hi la hna qaja hnei Iehova Joxu Ka Sisitria: ‘Maine tro la tan a thewe götran kowe la itre nekö i angeice trahmany, ke ewekë i angatre hë lai. Edrö i angatre hë la götrane cili. 17 Ngo maine tro angeic a xome qa ngöne la itre götrane i angeic la ca hnepadro kowe la hlue i angeic, ke tro la hlu a lapa e cili uti hë la macatre ne inuamele; thupene lai, tro hmaca la tan a xome la götrane i angeic. Itre nekö i angeic hmekuje hi, la ka ijije troa kapa paluane la edrö i angeic. 18 Tha tro kö la tan a xome la ketre ewekë hna hamën nyine edrö ne la nöj; tha tro kö angeic a helëne la itre atr qa ngöne la itre götrane i angatr. Tro hi angeic a hamë hnepadro kowe la itre nekö i angeic qa ngöne la itre götrane i angeice kö, matre tha tro kö a helën la ketre atrene la nöjeng qa ngöne la zi i angeic.’”

19 Thupene lai, hnei angeic hna tro sai ni kowe la hnë lö ezine la qëhnelö ka tro kowe la itre hnë xen ka hmitrötr ne la itre atre huuj, lo itre hnahag ka qëmeke kolopi. Nge e cili, hetre götran hnenge hna öhn e kuë pun. 20 Nge öni angeice jë hi: “Tro la itre atre huuj a boelën e cili, la huuj ne qeje menu, memine la huuj ne ngazo, nge e cili fe la hnë tro angatr a atrone la itre huuj ne wene feja, matre tha tro kö angatr a lö fë la ketre ewekë kowe la kur e kuhu trön, nge matre tha tro kö a xötre la ehmitrötre* i angatr kowe la nöj.”

21 Ame hnei angeic hna tro sai ni kowe la kur e kuhu trön, me tro xomi ni kowe la 4 lao kona ne la kur. Nge hnenge hna öhne la ketre kur ngöne la 4 lao kona cili. 22 Ngöne la 4 lao kona ne la kur e kuhu trön, hetre itre neköi kur: traqa koi 40 kubit* la eqean, nge 30 kubit la eisaisan, nge casi hi la etrune la 4 lao neköi kur.* 23 Xötreithe la itre neköi kur cili, ke hetre itre öli,* nge fene la itre öli cili, hna hnëkën la itre götran hnë atrone la itre huuj. 24 Matre öni angeice jë hi: “Itre ka huliwa ngöne la uma ne hmi a atron e cili la itre huuj thatraqane la nöj.”