Iosua
7 Ngo tha mele nyipici hë la angetre Isaraela, ke hnei angatre hna atrekënö la itre ewekë nyine apatren. Eje hi, hnei Akana nekö i Karemi, lo nekö i Zabedi, nekö i Zera, qa ngöne la tribu ne Iudra, hna atrekënö la itre xaa ewekë nyine apatren. Matre hnei Iehova hna elëhni kowe la angetre Isaraela.
2 Ngo hnei Iosua hna upe la itre trahmanyi qa Ieriko a tro Ai, ketre traon ezine Beth-Aven, ngöne la götrane koië ne Bethela. Öni angeic: “Elë jë troa waipengöne la nöj!” Matre hnei angatre hna tro troa waipengöne la nöje Ai. 3 Nge ame hë la angatr a bëeke hmaca koi Iosua, öni angatre jë hi: “Tha nyipiewekë kö troa up asë la trongene isi, ngo tro hi a upe la ala 2 000 maine 3 000, matre troa thapa la traon ne Ai. The upi angatr asë kö, wanga tro angatr a kucakuca, ke tha tru kö hnei atr ngöne la traon.”
4 Celë hi kepin matre hna upe la 3 000 lao soc. Ngazo pe, hnei angatre hna kötr qëmekene la angetre Ai. 5 Hnene la angetre Ai hna humuthe la 36 lao soc: hnei angatr hna huzune la angetre Isaraela, qaane la qëhnelö ne la traon uti hë e Sebarima,* me humuthi angatr ngöne la gaa utiut. Matre qaane ju hi lai, hna nyiqaane ae trootro la trengecatre* ne la nöj, tune la itre timi ka neni.
6 Ame hnei Iosua hna kuie zezene la itre iheetre i angeic, me sa iwatingöneca, me thil qëmekene la Pua i Iehova, angeic me itre qatr* ne Isaraela. Hnei angatre hna lapa e cili uti hë e hej, me siëne la he i angatr hnei dro. 7 Matre öni Iosua jë hi: “Ekölöhini Iehova Joxu Ka Sisitria! Hnauëne la nyipëti a upe la nöje ce troa sasaithe la hneopegejë Ioridrano, me nuaxöji huni pë hë kowe la angetre Amora? Ekölöhini maine lapa hnyawa ju kö hun ngöne lo ketre götrane la hneopegejë! 8 Menu hë ni Iehova! Ngo nemene pe kö la hnenge hna troa qaja, ke ase hë ngaa Isaraela hnene la itre ithupëjia me angeic? 9 Maine tro la angetre Kanana, me itre xaa nöj a drenge la ewekë ka traqa, tro hë angatre lai a lapa xötreithi hun, me apatrene la ëje hun qa celë fen. Nge e cili, tro pë hë nyipëti a isigöline tune kaa la ëje i nyipë ka sisitria?”
10 Matre sa jë hi Iehova ka hape: “Mejë jë! Hnauëne la eö a thil? 11 Hnei Isaraela hna kuca la ngazo. Tha hnei angatre kö hna metrötrëne la isisinyikeung, lo hnenge hna upi angatre troa metrötrën. Hnei angatre hna xome la itre xaa ewekë nyine troa apatren. Hnei angatre hna atrekënö me juetrën la itre ewekë cili, ngöne la itre nyi i angatr. 12 Kepine hi lai matre, tha tro kö la angetre Isaraela a ngaane la itre ithupëjia me angatr. Ngo tro pe angatr a kötre bëek qëmekene la itre ithupëjia me angatr, ke tro hë angatr a tune la itre ewekë nyine apatren. Nge tha tro hmaca kö ni a ce me epun, e tro pala hi epuni a lapa fë la itre ewekë nyine apatren. 13 Haawe, mejë jë eö, nge ahmitrötrëne* jë la nöj! Hape jë koi angatr: ‘Ahmitrötrë epuni jë göi elany, ke hane hi la hna qaja hnei Iehova Akötresi Isaraela: “Isaraela fe, thei epuni pala kö la itre ewekë nyine apatren! Thatreine kö epuni troa ngaane la itre ithupëjia, e tro pala hi epuni a lapa fë la itre ewekë cili. 14 Matre loi e tro epuni a traqa itronyi elanyi hmakany, ase jë hi ketre tribu matre ketre. Nge ame la tribu hnei Iehova hna troa köjan, ke tro ej a easenyi nyidrë, ase jë hi ketre lapa matre ketre. Nge ame la lapa hnei Iehova hna troa köjan, ke tro ej a easenyi nyidrë, ase jë hi ketre fami matre ketre. Nge ame la fami hnei Iehova hna troa köjan, ke tro ej a easenyi nyidrë, ase jë hi ketre trahmany matre ketre. 15 Nge tro ha dreuthetrij la atre juetrëne la itre ewekë nyine apatren, me itre ewekë i angeic asë, ke tha hnei angeice kö hna metrötrën la isisinyikeu i Iehova, me kuca la nyine hmahman e Isaraela.”’”
16 Ame hnei Iosua hna canga ilë e hmakany, me hën asë la angetre Isaraela, thenge la itre tribu i angatr. Nge hna köjane la tribu i Iudra. 17 Thupene lai, hnei angeice hna hëne la itre lapa i Iudra, nge hna köjane la lapa i Zera. Ame hnei angeice hna hëne la itre trahmany ne la lapa i Zera, nge Zabedi la hna köjan. 18 Ase jë hi lai, hnei angeice hna hëne la itre trahmany ne la fami i Zabedi, nge hna köja Akana nekö i Karemi, lo nekö i Zabedi, nekö i Zera, qa ngöne la tribu ne Iudra. 19 Matre hnei Iosua hna qaja koi Akana ka hape: “Neköng, pane atrunyi Iehova jë Akötresi Isaraela, nge qaja jë koi nyidrë la ngazo i ö. Eni a sipo eö, qaja jë la hnei ö hna kuca, nge the juetrëne pi kö.”
20 Matre öni Akana jë hi: “Nyipici, eni hi la ka ngazo qëmekei Iehova Akötresi Isaraela. Hane hi la hnenge hna kuca: 21 Hnenge hna öhne ngöne la trengamo, la ketre iheetr qa Sinara ka mingöming nge ka ketre pengön, memine la 200 sekele* sileva, me ca sine gool ka 50 sekel la ehacen. Matre hnenge hna piin me xome la itre ewekë cili. Hna kelem itre ej ngöne la itateng, nge hna amë pë hë e kuhu fen la sileva.”
22 Ase jë hi lai, hnei Iosua hna canga upe la itre trahmanyi troa nyinyape kowe la itate i Akana. Nge e cili hi la sileva hna juetrën fene lo iheetr. 23 Ame hnei angatre hna xome la itre ewekë hna juetrën ngöne la itat, me tro fë koi Iosua me angetre Isaraela asë, nge hna amë qëmekei Iehova. 24 Matre hnei Iosua me angetre Isaraela asë hna xomi Akana nekö i Zera, memine lo sileva, memine lo iheetre ka ketre pengön, memine lo sine gool, me itre nekö i angeic trahmanyi me jajiny, me kau i angeic, me boliko i angeic, me itre mamoe i angeic, me itate i angeic, me nöjei ewekë i angeic asë, matre tro fë kowe la hnathup e Akora. 25 Nge öni Iosua jë hi: “Hnauëne la eö a axulune la akötre koi hun? Tro hë Iehova enehila a axulune la akötre koi ö!” Ame hnene la angetre Isaraela hna humuthi angatr, me tranyi angatr hnei etë, me dreuthi angatr; aqane tranyi angatre lai. 26 Thupene lai, hnei angatre hna acil hui angeic la ketre itra etë atraqatr, nge eje pala hi a cil enehila. Ame hna patre pi la elëhni i Iehova. Celë hi kepin matre, kolo pala hi a hëne la götrane cili ka hape, hnathup e Akora.*