Iosua

10 Drenge hë Adonizedeka joxu ne Ierusalema laka, hnei Iosua hna thapa me apatren la traon ne Ai, nge ame la hnei angeic hna kuca kowe la traon cili me joxu i angatr, ke ceitu memin lo hnei angeic hna kuca koi Ieriko me joxu i angatr. Nge hnei nyidrëti mina fe hna drenge laka, hnene la angetre Gibeona hna thele tingeting me ce mel memine la angetre Isaraela. 2 Ame hnei nyidrëti hna xou, ke ketre traon atraqatre Gibeona, tune la itre traon ne la itre joxu; tru kö ej hune la traon ne Ai, nge itre ka catre isi asë hi la itre trahmany e cili. 3 Matre hnei Adonizedeka joxu ne Ierusalema hna iupi fë la maca celë koi Hoham joxu ne Heberona, me Pirama joxu ne Iamuth, me Iafia joxu ne Lakisa, me Debira joxu ne Egelona: 4 “Traqa pi matre xatua ni troa lep la angetre Gibeona, ke ase hë angatr thele tingeting me Iosua me angetre Isaraela.” 5 Ame hnene la 5 lao joxu ne Amora (ene la joxu ne Ierusalema, me joxu ne Heberona, me joxu ne Iamuth, me joxu ne Lakisa, me joxu ne Egelona) hna icasikeu memine la itre trongene isi i angatr. Thupene lai, hnei angatr hna tro a tro Gibeona, me lapa xötreith matre lepe la traon.

6 Matre hnene la angetre Gibeona hna iupi fë maca koi Iosua ngöne la lapa e Gilegala me hape: “The nuetrije kö la itre hlue i nyipë. Canga traqa pi! Amele huni jë nge xatua huni jë! Hnen asë hi la itre joxu ne Amora ka lapa ngöne la itre wetr hna icasikeu troa lepi hun.” 7 Ame hnei Iosua hna elë a tro Gilegala memine la trongene isi i angeic, me itre soc ka catre i angeic.

8 Nge öni Iehova jë hi koi Iosua: “The xouene kö la itre joxu cili, ke ase hë ni nue angatre koi ö. Thatreine kö la ketre e angatr troa cile koi ö.” 9 Matre, thupene la hnei Iosua hna tro la jidri ka pexej qa Gilegala, hnei angeice hna asesëkötrë angatr me lepi angatr. 10 Ame hnei Iehova hna amenune la itre ithupëjia. Hnene la angetre Isaraela hna lepi angatre hnyawa e Gibeona, me huzu angatr ngöne la gojeny ka elë a tro Bethe-Horona, me humuthi angatr uti hë e Azeka me Makeda. 11 Angatr pala kö a kötrene la angetre Isaraela ngöne la gaa utiut e Bethe-Horona, la Iehova a amalane hui angatr la wene mani ka catr nge ka tru uti hë e Azeka. Ngo eje hi laka, ala nyimu hmaca ju kö la itre soc ka mec hnei wene mani ka catr, hune la itre hna lep hnei taua hnene la angetre Isaraela.

12 Ngöne la drai cili, hnei Iehova hna lep la angetre Amora qëmekene la angetre Isaraela. Matre öni Iosua jë hi koi Iehova qëmekene la angetre Isaraela:

13 Ame hna cile ju la jö me treu, uti hë la angetre Isaraela a ase lepe la itre ithupëjia me angatr. Nge hna cinyianyine lai ngöne la itus i Iasera. Hnene la jö hna cil nyipine la hnengödrai, nge ngöne la drai ka pexej, tha canga lö kö ej. 14 Pëkö drai ka tune lai ekö me e thupen, ke hnei Iehova hna drenge la ketre atr. Eje hi, hnei Iehova hna isigöline la angetre Isaraela.

15 Thupene lai, hnei Iosua hna bëeke hmaca kowe la lapa e Gilegala memine la angetre Isaraela asë.

16 Nge ngöne la ijine cili, hnene lo 5 lao joxu hna kötre zae ngöne la ngönemenyi e Makeda. 17 Ame hna thuemacanyi Iosua ka hape: “Hna öhne la 5 lao joxu ka zae ngöne la ngönemenyi e Makeda.” 18 Matre öni Iosua jë hi: “Ukune pi la itre etë ka tru kowe la hnë lö ne la ngönemenyi. Nge upe jë la itre xan troa thupën ej. 19 Ngo ame kö epun, the cile kö. Weje jë la itre ithupëjia me epun, nge lepi angatre jë qa hutrö. The nue angatre pi kö troa lö ngöne la itre traone i angatr, ke ase hë Iehova Akötresi epun, nue angatre koi epun.”

20 Ame hnei Iosua me angetre Isaraela hna ngaane la itre ithupëjia: hna humuthi angatr asë, ngo mele ju pe kö la itre xan ka kötr kowe la itre traon hna eköhagen. 21 Thupene lai, hnene la trongene isi ne Isaraela asë, hna bëeke hmaca memine la tingeting koi Iosua ngöne la lapa e Makeda. Nge pë hmaca kö ka qeje* angatr. 22 Matre öni Iosua jë hi koi angatre ka hape: “Fe pi la hnë lö ne la ngönemenyi, nge traqa fë pi koi ni lo 5 lao joxu.” 23 Ame hnei angatre hna lö fë koi Iosua la itre joxu cili (ene la joxu ne Ierusalema, me joxu ne Heberona, me joxu ne Iamuth, me joxu ne Lakisa, me joxu ne Egelona). 24 Ame hë la itre joxu a cil qëmeke i Iosua, hnei angeice hna hëne la itre trahmanyi ne Isaraela, me itre tan ne isi ka ce tro me angeic, me hape: “Trohemi, nge waja ju la nyinawa ne la itre joxu.” Ame hnei angatre hna tro me waja la nyinawa ne la itre joxu cili. 25 Ngo öni Iosua jë hi: “The xou kö nge the hmengöhmengöne kö. Catre pi nge hni ne trahmanyi jë* ke celë hi aqane tro Iehova a kuca kowe la itre ithupëjia ka icilekeu me epun.”

26 Thupene lai, hnei Iosua hna humuthi angatr, me athipe la itre ngönetrei i angatr hune la 5 lao sinöe, nge hnei angatr hna thip e cili uti hë e hej. 27 Ngo ame hë la kola lö la jö, hnei Iosua hna iup troa autine la itre ngönetrei i angatr qa ngöne la itre sinöe, matre kuië angatr ngöne la ngönemenyi hnei angatre hna zae ngön. Thupene lai, hna thinge la ngönemenyi hnei etë ka tru: nge itre ej pala hi e cili enehila.

28 Ngöne ju kö la drai cili, hnei Iosua hna thepe Makeda me humuthe la itre atren hnei taua. Hnei angeic hna apatrene la joxu ne Makeda, memine la itre atr ka lapa ngöne la traon, pëkö ca atr hnei angeic hna nue pe. Hnei angeic hna kuca kowe la joxu ne Makeda, tune lo aqane kuca i angeice kowe la joxu ne Ieriko.

29 Thupene lai, hnei Iosua memine la angetre Isaraela asë hna ce tro qa Makeda a tro Libena, matre lepe la traone cili. 30 Hnei Iehova mina fe hna nue la traon cili, memine la joxu i angatr kowe la angetre Isaraela. Hnene la angetre Isaraela hna humuth hnei taua la nöjei atr ka lapa ngöne la traon, pëkö ca atr hnei angatr hna nue pe. Nge hnei angatre hna kuca kowe la joxu ne Libena, tune lo aqane kuca i angatr kowe la joxu ne Ieriko.

31 Thupene lai, hnei Iosua memine la angetre Isaraela asë hna ce tro qa Libena a tro Lakisa. Hnei angatre hna acil la itre itate i angatr e Lakisa, matre lepe la traone cili. 32 Hnei Iehova hna nue Lakisa kowe la angetre Isaraela, matre hnei angatre hna thapa la traon ngöne la hnaaluene drai. Nge tune lo hnei angatre hna kuca e Libena, hnei angatr hna humuthe hnei taua la nöjei atr ka lapa ngöne la traon.

33 Ame hnei Horema joxu ne Gezera hna tro troa xatuane la angetre Lakisa, ngo hnei Iosua hna humuthi nyidrë me la trongene isi i nyidrë. Pëkö ca atr hnei Iosua hna nue pe.

34 Thupene lai, hnei Iosua memine la angetre Isaraela asë hna ce tro qa Lakisa a tro Egelona. Hnei angatre hna acile la itre itate i angatr e Egelona, matre lepe la traone cili. 35 Ngöne ju kö la drai cili, hnei angatre hna thapa la traon me humuth hnei taua la itre atren. Ngöne la drai cili, hnei angatr hna apatren la nöjei atr ka lapa ngöne la traon, tune lo hnei angatre hna kuca e Lakisa.

36 Thupene lai, hnei Iosua memine la angetre Isaraela asë hna ce tro qa Egelona a tro Heberona, matre troa lepe la traone cili. 37 Hnei angatr hna thapa la traone cili, memine la itre traon ezin, me humuthe hnei taua la joxu ne Heberona, memine la itre atrene la itre traon cili. Pëkö ca atr hnei angeic hna nue pe. Nge tune lo hnei angeice hna kuca e Egelona, hnei angeice fe hna apatrene la itre traone cili me itre atren.

38 Ase jë hi lai, hnei Iosua memine la angetre Isaraela asë hna ce tro a tro Debira matre lepe la traone cili. 39 Hnei angatr hna thapa la traone cili, me humuth hnei taua la itre atren, me joxu i angatr, memine la itre atrene la itre traon ezin. Hnei angatr hna apatren asë la nöjei atr ka lapa ngöne la itre traone cili, nge pëkö ca atr hnei angatre hna nue pe. Hnei Iosua hna kuca koi Debira me joxu i angeic, tune lo aqane kuca i angeic koi Heberona, me koi Libena me joxu i angeic.

40 Hnei Iosua hna thapa la nöjei götran, ene la itre wetr, memine la Negeb, me Sefela, me itre gaa utiut ne la itre wetr. Hnei angeic hna lep asë la itre joxu cili, nge pëkö ca atr hnei angeice hna nue pe; hnei angeic hna apatren la nöjei ewekë asë ka mano, tune lo hnei Iehova Akötresi Isaraela hna amekötin. 41 Hnei Iosua hna thapa la itre nöj qaan e Kadesi-Banea uti hë e Gaza, memine la nöje Gosena asë uti hë e Gibeona. 42 Hnei Iosua hna aca tro lep la itre joxu, me thapa la itre nöje i angatr, ke Iehova Akötresi Isaraela la ka isigöli Isaraela. 43 Thupene lai, hnei Iosua memine la angetre Isaraela asë, hna bëeke hmaca kowe la lapa i angatr e Gilegala.