Iosua
11 Ame ju hi la Iabin joxu ne Hazura a dreng la ewekë ka traqa e cili, hnei nyidrë hna iupi fë maca koi Iobab joxu ne Madon, me kowe la joxu ne Simerona, me kowe la joxu ne Akesafa. 2 Nge hnei nyidrëti fe hna iupi fë maca cili kowe la itre joxu ka mel ngöne la itre wetr e kolopi, me kowe la itre ka mel ngöne la itre gaa paapa* e kolojë e Kinereth, me kowe la itre ka mel ngöne la Sefela, me e kuë ngöne la itre sasala ne Dora, 3 me kowe la angetre Kanana e koië me kuë, me kowe la angetre Amora, me angetre Heth, me angetre Perizi, me angetre Iebuzi ka mel ngöne la itre wetr, me angetre Hivi ka mel fene Heremona ngöne la nöje Mizepa. 4 Ame hnei angatre hna traqa itrony memine la itre trongene isi i angatr. Ala nyimu catre la itre soc i angatr, tune la itre wene ngöni ne hnagejë, nge nyimutre catre la itre hos i angatr, me itre ikatre i angatr. 5 Hnen asë hi la itre joxu cili hna ce traqa itrony, me acile la itre itate i angatr ezine la itre tim e Meroma matre lep la angetre Isaraela.
6 Matre öni Iehova jë hi koi Iosua: “The xoue angatre kö, ke ame elany ngöne la hawa ce, tro ni a nue angatr koi Isaraela, nge tro epuni a humuthi angatr asë. Qa i ö troa sa la itre fekatro ne la itre hos i angatr, me dreuthetrije la itre ikatre i angatr.” 7 Ame hnei Iosua memine la trongene isi i angeic, hna ce ut troa asesëkötrë angatr ngöne la itre tim e Meroma. 8 Matre hnei Iehova hna nue angatr kowe la angetre Isaraela. Hnene la angetre Isaraela hna lepi angatr me weji angatr uti hë e Zidona Ka Tru, me Miserefo-Maim, nge uti hë la hnathup e Mizepa e koië. Hnene la angetre Isaraela hna humuthi angatr asë, nge pëkö ca atr hnei angatr hna nue pe. 9 Thupene lai, hnei Iosua hna kuca thenge la hnei Iehova hna amekötin koi angeic: hnei angeice hna sa la itre fekatro ne la itre hos i angatr, me dreuthetrije la itre ikatre i angatr.
10 Ketre, hnei Iosua hna bëeke hmaca, me thapa la traon e Hazura, me humuthe la joxu hnei taua, ke Hazura hi la traon ka sisitria ne la itre baselaia cili. 11 Hnene la angetre Isaraela hna lepe hnei taua la nöjei atr ka lapa ngöne la traon; celë hi aqane apatren angatr la itre atre cili, nge pëkö ca atr ka mel.* Thupene lai, hnei Iosua hna dreuthetrije la traon ne Hazura. 12 Hnei Iosua hna thapa la nöjei traone cili, me humuthe la itre joxu i angatr hnei taua. Hnei angeic hna apatrene la itre traone cili, tune lo hna amekötin hnei Mose hlue i Iehova. 13 Ame pe, tha hnene kö la angetre Isaraela hna dreuthetrije la itre xaa traon hune la itre sasala, ngo Hazura hmekuje hi; celë pe hi la traon hnei Iosua hna manith. 14 Hnene la angetre Isaraela hna xom asë la itre mo me itre öni hnei angatr hna öhn ngöne la itre traone cili. Ngo hnei angatre pe hna humuthe hnei taua la nöjei atr, uti hë la kola apatrenyi angatr asë, nge pëkö ca atr hnei angatr hna nue pe. 15 Ame la nöjei ewekë hnei Iehova hna amekötine koi Mose hlue i nyidrë, ke hnei Mose pë hë hna ahnithe koi Iosua, nge celë hi la hna kuca hnei Iosua. Hnei Iosua hna kuca asë, tune lo hnei Iehova hna amekötin koi Mose.
16 Hnei Iosua hna thapa la nöje cili, ene la itre wetr, memin la Negeb, memin la nöje Gosena asë, memine la Sefela,* me Araba, memine la itre wetr me itre gaa ipië ne Isaraela, 17 qaane la wetre Halaka ka elë a tro Seira, uti hë e Baala-Gada ngöne la hnathup e Lebanona, fene la wetre Heremona. Hnei angeice hna ea me humuthe la itre joxu ne la itre götrane cili. 18 Qea catre la hnei Iosua hna isi memine la itre joxu cili. 19 Pëkö xaa traon ka thele tingeting memine la angetre Isaraela, ngo angetre Hivi hmekuje hi, lo itre ka lapa e Gibeona. Nge ame asë hi la itre xaa traon, ke hnei angatr hna isi memin me thapa. 20 Iehova la ka nue la itre nöje cili troa axetine la hni i angatr, matre tro angatr a isi me angetre Isaraela, nge matre troa apatrenyi angatr me tha utipi angatr. Ngo tro pe a apatrenyi angatr, tune lo hnei Iehova hna amekötin koi Mose.
21 E cili hi la ijine Iosua a apatren la angetre Anaka ka lapa ngöne la itre wetr e Heberona, me Debira, me Anabi, me ngöne la itre wetr e Iudra, me ngöne la itre wetr asë e Isaraela. Hnei Iosua hna apatren asë la itre atr e cili me itre traon i angatr. 22 Matre pëhë matrane la angetre Anaka ngöne la itre götran ne la angetre Isaraela; ngo hetrenyi pe kö e Gaza, me Gatha, me Asedoda. 23 Celë hi aqane thapa Iosua la nöj asë, tune lo hnei Iehova hna sisinyi koi Mose. Thupene lai, hnei Iosua hna hamën ej nyine edrö kowe la itre tribu ne Isaraela, matre troa ce thawa thenge la isa ca tribu. Nge hnene la nöj hna mel ngöne la tingeting, nge pëkö isi.