Iosua

14 Ngo hane hi la itre götran hnei angetre Isaraela hna kapa nyine edrö ngöne la nöje Kanana. Hnei Eleazara atre huuj, me Iosua nekö i Nuna, me itre tixe ne lapa ne la itre tribu ne Isaraela hna hamë angatr la itre götrane cili. 2 Nge hna uthidrönegöti* matre troa thawa la edrö ne la 9 lao tribu nge sin, tune lo hnei Iehova hna amekötin jëne Mose. 3 Nge ame pë hë lo lue tribu nge sin, ke hnei Mose hë hna hamë edrö i angatr ngöne la ketre götran* ne la hneopegejë Ioridrano. Ngo tha hnei angeice kö hna hamë edrö kowe la angetre Levi nyipine la itre xaa tribu. 4 Ame la itre matra i Iosefa, ke hna e angatr ceitu me lue tribu: ene Manase me Eferaima. Tha hna hamë götrane kö kowe la angetre Levi ngöne la nöj, ngo hna hamë angatre hi la itre traon me itre hnepadro ezin, thatraqane la itre öni i angatr me itre ewekë i angatr. 5 Ame hnene la angetre Isaraela hna thawa la nöj, tune lo hnei Iehova hna amekötin koi Mose.

6 Matre hnene la itre trahmanyi ne Iudra hna tro troa wai Iosua e Gilegala. Nge öni Kaleba jë hi lo nekö i Iefune qa Kenaza ka hape: “Atre hnyawa hi ö lo hnei Iehova hna qaja göi nyiso koi Mose, lo atre ne la nyipi Akötresie, lo nyiso e Kadesi-Banea. 7 Traqa koi 40 lao macatreng, lo kola upi ni hnei Mose hlue i Iehova qa Kadesi-Banea troa waipengöne la nöj. Nge hnenge hna bëeke fë la itre ithuemacanyi ka nyipici.* 8 Ame kö lo itre trejin ka ce tro me eni, ke hnei angatr hna akucakucane* la nöj, ngo ame ni, hnenge hna drengethenge Iehova Akötresing hnene la hning ka pexej. 9 Matre ame ngöne la drai cili, hnei Mose hna sisinyi koi ni ka hape: ‘Ame la itre götran hnei ö hna tro waja, ke edrö lai ka epine palua thatraqai ö me itre nekö i ö, pine eö drengethenge Iehova Akötresi ö hnene la hni i ö ka pexej.’ 10 Traqa ha enehila koi 45 lao macatre, thupene lo Iehova a sisiny la ewekë cili jëne Mose, ngöne lo Isaraela a tro ngöne la hnapapa. Nge tune lo hnei nyidrëti hna sisinyi koi ni, hnei Iehova hna thupëne la meleng. Matre 85 hë lao macatreng enehila, nge ka mele pala hi ni. 11 Nge tune lo ijine Mose a upi ni, ka egöcatre pala hi ni. Casi pala hi la trengecatreng troa isi me kuca la itre xaa huliwa. 12 Haawe, hamë ni pi lo itre wetr hnei Iehova hna sisiny troa hamë ni ngöne la drai cili. Hna lapane la götrane cili hnene la angetre Anaka ka hetre traon atraqatr hna eköhagen, tune lo hnei ö hna dreng ngöne la ijine cili. Ngo tro kö Iehova a ce me eni, nge tro ni a helë* angatre qa lai, tune lo hnei Iehova hna sisiny.”

13 Ame hnei Iosua hna amanathithi Kaleba nekö i Iefune, me hamë Heberona nyine edrö i angeic. 14 Celë hi matre, uti hë la drai ce, Heberona la götrane i Kaleba nekö i Iefune qa Kenaza, ke hnei angeic hna drengethenge Iehova Akötresi Isaraela hnene la hni i angeic ka pexej. 15 Ame la ëje i Heberona ekö, ke Kiriath-Areba (Areba la ketre atr ka tru thene la angetre Anaka). Matre hnene la nöj hna mele tingeting, nge pëkö isi.