Daniela

8 Ame ngöne la hnaakönine macatre ne mus i Belesaza, ame ni Daniela, hetre hnenge hmaca hna meköle goeën. 2 Eni pala kö a goeën, nge öhne ju hi ni laka, eni hë e Susani, lo traon hna eköhagen* ka ej ngöne la provës e Elama; nge hnenge fe hna öhne laka, eni ezine la ketre tim, lo hna hën ka hape, Ulai. 3 Nge ame la eni a gala draië, öhne ju hi ni la ketre mamoe trahmany, kola cile qëmekene la tim, nge ka lue jian. Ka tru asë hi la lue jian, ngo tru catre kö la ketre hune la ketre, nge ame lai ka tru, ke ka cia pë hë e thupen. 4 Hnenge hna öhne la mamoe trahmany a anyimua jum la lue jian ej a tro koië, me kolopi, me kolojë; pëkö ca öni wael ka atreine cile kow ej, nge pëkö ka atreine kötrene la musi* ne ej. Eje kö a kuca la ajan ej, me pi tru.

5 Eni pala kö a goeën, nge mama pi hi la ketre nani trahmanyi ka fetra qa koië,* ej a nyinyapëne la fen, ngo goi tha ketre fe ej la ihnadro. Hetre jian ej ka mama cil nyipine la lue alameken ej. 6 Ej a tro meköt kowe lo mamoe trahmanyi ka lue jian, nge ka cil qëmekene la tim; hnen ej hna nyinyape catr kowe la mamoe trahmanyi memine la trengehni atraqatr.

7 Öhne ju hi ni lo ej a easenyine fë trengehni* kowe la mamoe trahmany. Hnene la nani trahmany hna jenge la mamoe trahmany, ame hna xecie pi la lue jian ne lai mamoe trahmany, nge pë hë trengecatren ej troa cil kowe la nani trahmany. Matre hnene la nani hna trij ej e kuhu hnadro me tro waja, nge pëkö ka atreine thapa la mamoe trahmany qaathene la musin* ej.

8 Qa ngöne lai, pi tru catre jë hi la nani trahmany. Ngo ame ju hi la ej a catr, xecie pi hi la jian ka tru ne ej, ame hna nyihnane la jiane cili hnene la 4 lao jian, ka isa cia hmekun la 4 lao cane la fen.*

9 Qa ngöne la ketre jian, hna xulu la ketre jian ka co, nge hnene ej hna tru trootro a tro kolojë, me koië,* me kowe la Emingömingön. 10 Hnene ej hna draië catr uti hë la traqa kowe la itre trongene isi e hnengödrai, nge hnene ej hna amalan kowe la fen la itre xaa atrene la trongene isi cili me itre xaa wëtresij, me tro waja. 11 Nge goi pi tru fe ej kowe la Tane ne la trongene isi, ame hna cipan la itre huuj hna tro fë lapane* kowe la Tan, nge hna ukapiën la hnë hmi hnei nyidrëti hna acile hutin. 12 Nge pine la hna eni wathebo, hna nuaxöje pë hë la ketre trongene isi memine la itre huuj hna tro fë lapan; nge hnene la jian hna trije la nyipici e kuhu hnadro, ame hna eatre la mekunan ej.

13 Thupene lai, hnenge hna drenge la kola ithanata hnene la atr ka hmitrötr, nge hnene la ketre hna hnyingë angeic ka hape: “Uti hë eu la troa meköle goeën la huuj hna tro fë lapan, memine la iapatreny ka xulu qa ngöne la hna eni wathebo, memine la kola tro waja la götran gaa hmitrötr memine la trongene isi?” 14 Matre öni angeice koi ni: “Uti hë la kola traqa koi 2 300 lao heji me hmakany. Thupene lai, tro hmaca ha acile la götran gaa hmitrötr ngöne la göhnen* ej.”

15 Ame eni, Daniela, hnenge hna goeën la hna meköle goeën me thele troa trotrohnin, ame hna aca tro mama qëmekeng la ketre ewekë ka ceitu me atr. 16 Thupene lai, hnenge hna drenge la nine la ketre atr nyipine la Ulai, kola sue ka hape: “Gaberiela, qejepengöne jë la hnei angeic hna öhn.” 17 Matre hnei angeic hna easenyine la götran hnenge hna cile ngön, ngo ame ju hi la angeic a traqa, ke kei qe ipië ju hi ni e kuhu hnadro hnei xou. Öni angeice jë hi: “Nekö i atr, lapa atre ju laka, tro ha eatr la hna meköle goeën ngöne la itre drai ne la pun.” 18 Angeic pala kö a ithanata koi ni, ame hnenge hna hmulizië me meköl qe ipië e kuhu hnadro. Matre hnei angeic hna ketri ni, me acilë ni ngöne lo götran hnenge hna cile ngön. 19 Thupene lai, öni angeice koi ni: “Tro hë ni a amamai ö la ka troa traqa ngöne la pune la ijine elëhni,* ke tro kö lai a traqa ngöne la pune la ijin hna sa.

20 “Ame la mamoe trahmanyi ka lue jian hnei ö hna öhn, ke ej a nyihatrene la itre joxu ne Madai me Peresi. 21 Nge ame pena lo nani trahmany ka tru pen, ke ej a nyihatrene la joxu ne Geres. Nge ame la jiane ka tru nyipine la lue alameke ne ej, ke kola nyihatrene la pane joxu. 22 Nge hnen ej hna xeci, ame hna nyihnan hnene la 4 lao jian: tro ha mejë la 4 lao baselaia qa ngöne la joxu cili, ngo tha tro kö angatr a catr tune lo hnapan.

23 “Nge ngöne la kola troa nyipune la mus i angatr, ke sasaithi tulu pala ha* la aqane eni wathebo, tro ha mejë la ketre joxu ka pi öni hatrë la iqëmek, nge ka trotrohnine la itre trenge iaö.* 24 Tro hë angeic a catrecatr, ngo tha hnene kö la sipu trengecatre i angeic. Tha aqane tro kö a ngazo* la itre thangan la huliwa i angeic elany; tro angeic a eatrën la hnei angeic hna mekun, me huliwa inamacan. Tro hë la itre atr ka catr memine la nöj ne la itre atr ka hmitrötr a jol hnei angeic. 25 Tro angeic a iaö matre eatrëne la itre mekuna i angeic; tro la hni i angeic a tiqa hnei pi tru; nge ame ngöne la ijine tro la itre atr a mele tingeting,* tro hë angeic a axulune la jol thene la ka ala nyim. Nge goi tro fe angeic a cil kowe la Tane ne la itre tan, ame pe, tro ha apatrenyi angeic, ngo tha hnei ime i atre kö.

26 “Ka nyipici hi la hna qaja ngöne la hna meköle goeën göne la itre hej me hmakany. Ngo tha tro pi kö eö a qaja la hna meköle goeën celë, ke thatraqane la itre drai epin.”*

27 Ame hneng Daniela, hna pane kucakuca me wezipo koi nyimu drai. Thupene lai, hnenge hna mejë me huliwa koi joxu; ngo kucakuca pala kö ni pine la hna meköle goeën, nge pëkö ala cas ka trotrohnine lai.